Read Moyon Naga ROMIO 12 Bible Online

ROMIO 12 - Moyon Naga bible

ROMIO 12

¹Thangnang ningchuwh jaarna kauw kanae ae nenuw vakhae neningna kaniihsahnahchuw. Nenuw chaatha ipeehvaang nenringsen ing, ynthiing ing vokhehkho Thangnang peeniivachii ing ympidehruw, ama-chuva turemva nenchii nenongruwchu.

²Havana laaruw paam thohne aanghak mahruw, changvakonchu nenbarungriir manteh nuwna mantharruw, amana chembe Thangnang ing amanden isa vokhehkho penniivachii amanche mapung iphachu ynchiiva ichii manghuwva nenta.

³Ki ing Thangnang tungsiih kikthuur kaphasah ajaar inche nenuw vakhae neningna kariirsahnah, nataksah rutukchak nakhe athi ing mandenmah, Changvakonchu naningna Thangnang ing ympeeh nathacha rutuk ingkhe nataksahchu vajeer yntusar.

⁴Hakchaang yngkhehpangna mari inempak omna amanche mari vakhae enongchu yntinmaemah.

⁵Inuw vakhae Khrista ningnache hakchaang yngkhehpang vamuw. Amavaange inuw vakhae hakchaang yngkhehpangna ruw yngkivamuw.

⁶Thangnang ing ympeehsah tungsiih inuwzii ing asiksik kikthuur ympha-sah, Thangnang chong jeernii vakhang nakho, inuw ynthacha rutuk inuwzii ing jeersataruw.

⁷Nong tunii khaena vanave, nongchu tutaruw; aanchuwmee ing vanave, manchuw taruw.

⁸Ynthohsahnii iriirpeeh khaena vanave, ynthohsahnii tutaruw, pivachii inchenkho manerru ing pirasiing, aapuh inchenkho abarungriir iruwh ing puhrasiing; ningsiih khaena nongtu mee inchenkho rotharoh ing turasii.

⁹Ningsiihchu manthiingva chiiva. Isamahva ichiichu batirruw. Isachu bachuw teehruw.

¹⁰Unae ningsiih vaangkhe yngkheh re yngkheh ningsiih ympiruw, amanche yngkheh ing yngkhehchu ynjasuwhva ichii ing ynriruw.

¹¹Thaachah mahruw nong ipirpak ing turuw, Aafhuw chu barungriir iruwhdeh ing rukuum turuw.

¹²Ningmanden nache rotha manrohruw, ijachaamchu khaang-teehruw, amanche apha vakhaena thamsaruw.

¹³Ruwrthiing ae ijachaam nache bomsa aeruw, amanche lamkhii itheng ae khaenache serung eengkhaar imongpeehruw.

¹⁴Ijachaam ympeeh mee aechu bor piaeruw; isamah phor ynvaerudeh ing bor piaeruw.

¹⁵Rotharoh aechu rotha rohfhuwruw, ichap aechu chapfhuwruw.

¹⁶Yngkheh yngkheh barungriir ynchim ing omruw; yndingmahruw, changvakonchu ynjuursahchu ruruw. Nataksah ing isingping tamahra.

¹⁷Achuw yngkheh ing nataklina isamah tunave, isamah ing barimah, changvakonchu mee vakhae mik enna sakvachiichu tura.

¹⁸Nencheh vakhae mee vakhae thoh idaejaeh ing paarruw.

¹⁹Kaarang ae, nenuw huw ynrimahruw, nenuw huw ynriva nenchii changdenna Thangnang barungsii ing huw iripeeh vaata. Ynthiing thiimziih ing ariir chuve, “Ki ing huw ripeehva kachuw, ki ing baripeehva kachuw taka Thangnang ing ariir.”

²⁰Ynthiing thiimziih ing ariirsa, “Nang ynjeehnii meechu aven chaam nave, aven manvaara, achii raarnave chii pira; ama napeeh inche aning ynjak naka arusaena mi ichuwh thoh aanghak vaata.”

²¹Chukhaenache isamah inche nenuwchu ichehmah rasii, ama changdenna isa inche isamahchu chehniirasii.