Read Moyon Naga ROMIO 15 Bible Online

ROMIO 15 - Moyon Naga bible

ROMIO 15

¹Inuw thacha ipir chaap inge isuur aechu bomsa vaanchiipae. Intaksah penniipang tuvaanchiimahva.

²Inuw ing unae aechu thacha apirnii khaena manpensavaan chiipae.

³Khrista ingkho ataksah ympensahnii tumah. Jinge ichii ing ynziihna, “Naningna ningjak ympichaap aechu kaningna buksa.”

⁴Mamaenna ynziih chaap vakhae inuwchu ynchuwnii khaenava, amana chembe ynthiing thiimziih ing ariirnache ikhaangcheh re barungriir amanungae jaarna ningmanden ymmangomnii khaenava.

⁵Ikhaang acheh vokhehkho barungriir amanungae Thangnang ing yngkheh re yngkheh barungriir ynchimnii khaena Jesu Khrista manden derna ipirasii.

⁶Nenuw ing barungriir yngkhehpang inche Jesu Khrista ampa Thangnang chu ympahnii khaenava.

⁷Khrista ing nenuwchu ymbariim vaang, Thangnang alaar saknii khaena nenuw yngkheh yngkheh ymbariimruw.

⁸Ki ing kariirnah amachuve emfhuw fhuwven ae ningna chongreep atuchu areepnii inche ichum Thangnang khaena Khrista ing vinchiip ae meenae hunginsuwhsa.

⁹Amanche reentaang mee aengkho Thangnang ympahnii khaenava. Havi jinge ichii ing ynziihna, “Reentaang mee ae kaarna manpahva kachii, vokhehkho ympahnii la ing nangchu manpahva kachii.”

¹⁰Athar vokheh jinge ariirsa, “Reentaang mee ae, nenuw Aafhuw amee ae thohche nenrotha manrohruw.”

¹¹Amanche reentaang mee vakhae, “Aafhuw manpahruw; Mee aangkheng Aafhuw manpahruw!”

¹²Athar vokheh Isaia ing ariirsa, “Jese tanii atuti bahsuwm omvaata; vokhehkho ama ing reentaang mee ae taklina paarvaata, amanche aningnache reentaang mee aenche thacha vaatae.”

¹³Ningmanden omnii Thangnang inche inungae vokhehkho idaechu nentakalina imansippeeh vaata, amana ningmanden inche sipnaka ynthiing laetha ruwreng inche eenruwfhuw vaata.

¹⁴Kauw kanae ae, ki kataksah ing kamandennah amachuve isachu sipvaata, ynghuwnii chukho sipvaata amanache yngkheh re yngkheh ymbomcheh vanenta.

¹⁵Hava takline neningna athar vokheh manthang-ning kachii akhae yngkheh omna. Thangnang ing kaningna tungsiih ympeeh khaena neningna ki ing riirning kachiiva,

¹⁶Reentaang mee ae ningna Jesu Khrista isa chong nong aatu ynsuwh ingka, ynthiing laetha ing amanthiing vasah reentaang mee aeng empeeh chaapchu arupa ichiichu ynthangnii khaena Thangnang isa chong nongchu katunah.

¹⁷Chukhaenache kajaarna Jesu Khrista ing atu vakhaene yndingsah kaphachu kakhaena chembe ichumva.

¹⁸Reentaang mee aechu puh ae ningka Thangnang chongriir emanjiinii inche Khrista ing kajaarna atu ari chupang khaenache thona isa ing chongva kata. Ama ing atu havi chongsae vokhehkho nong ajaar nava.

¹⁹Laetho vokhehkho ingiknii atu ruwreng re Thangnang ynthiing laetha ruwreng ing Jerusalem na ing Illirikum ipha ing Khrista isa chong itong kaphasahpa.

²⁰Ki ing hangsenna kamandensah chuve, Khrista ynghuwmah paamna isa chong ynthang re mee reentaang ae chongchu aanvormahnii khaenava.

²¹Jinge ichii ing ynziih vasah omna, “Aafhuw isa chong eningna ynthangmah rideh enuw inche imu phavaatae vokhehkho asiimahrideh aenche manghuw vaatae.”

²²Chutahnache ki neningting ivasinii khaena parden aajaeh omna.

²³Apaam lija vakhaena ki ing nong vakhaechu kamanchipa vokhehkho kum hangsenna nening phaning kachii inche akhae ynsuwhka nenuwchu muningka kachiivachuw.

²⁴Ki ing Spen paamting kasiraenche nening phava kata, ki kasi katung vakhaena nenuwchu muningka kachiivachuw, vokhehkho nenbuumna ongning kachiiva.

²⁵Apha nenve ki Jerusalem ting Thangnang mee ae ningna katufhuw nong omna.

²⁶Mesidonia re Akhaia mee aeng Jerusalem na ong Thangnang mee aechu inempak bomnungka enchii-nah.

²⁷Havi atatak ing engkharsah vokhehkho emandensahva, Jehudi aeng bomnungka ichii endeen laetha borchu reentaang mee aethoh phahak nungka enchii vaangkhe, reentaang mee aengkho endeensah chaap vakhae Jehudi aechu bomnungka ichii emandenva.

²⁸Havana kanong vakhae i vokhehkho eningna seerbaar ynlaen-fhuw chaap kamanchi aanuwna Spen paamting kasinii baram ing nening phava kata.

²⁹Neningna kavathengraenche Khrista ningtanii ynriimjor borchu vereenva kata ichii kamanghuwsa.

³⁰Kauw kanae ae, nenuw vakhae ing Khrista rumingna vokhehkho laetha aningsiihna kakhaena Thangnang ting ithampeeh saruw.

³¹Judia na ong thacha omah mee ae ningtanii kasuwhchehnii khaena ithampeehruw, vokhehkho Jerusalem na ong Thangnang mee aeng kanongtuchu enrunii khaenakho ithampeehsaruw.

³²Ki ing isip rotharoh thohche neningna vathengva kata, amanche Thangnang ing amanden ynsuwh nave, kavaveerchuw inche rotharoh yntharnii vaata.

³³Idae Thangnang inche nenuw vakhaethoh ong ynsuwhrasii! Amen.