Read Moyon Naga ROMIO 6 Bible Online

ROMIO 6 - Moyon Naga bible

ROMIO 6

¹Chunuwcha inuw ing ynchiikha riirtaruw? Tungsiih om ahenthinii khaena isii nache ongjaeh taruw chang?

²Changmahva! Ynsaangkhe isii ing ithiimuw inche amanache ongjaeh vaanchiiva?

³Jesu Khrista ningna baptais yntu inuw vakhae ama ithii nache baptais yntupa ichii nenuw ing nemanghuw mahva?

⁴Baptais yntu inge inuw Khrista thoche yndimhak vamuw, vokhehkho ithiihak vamuw, amatah nache ampa alaar isa inche ithii tanii amanring vaange, inuwkho itharpeh ringkum ing ipaarnii khaenava.

⁵Khrista ithii nache inuw va-khaekho amathoh yngkhehpang manuwve, ama ihangring vaangche inuwkho hangringrem vataruw.

⁶Isii hakchaangchu maangnaka, inuw ing isii nache apha iseehpak ing suwh eensuwh niimah khaenache, baruw meechu Aafhuw thoh ynruw ing khros nache thik haksae ichiichu inuw ing ymmanghuwsa.

⁷Ithii meechu isii ruwreng tanii abajohpa.

⁸Inuw Khrista thohche ithiihak manuwve, ymbarungriir ngamna amachuve inuwkho amathoh ynruw ing ringhakva taruw.

⁹Ithii tanii ihangring Khrista ing athar thikreehmahnii, yngkhaena ynchii imbe ithii inche ataklina chehmahnii ichii ymmanghuwsa.

¹⁰Khrista ing inuw yngkhaena ithii i isii khaenache ithiiva, amanche ama aringkum hangring i Thangnang ningna onghaknii khaena hangringva.

¹¹Havi vaange ichii ing nenuwkho isii nache ithii vatanuwve, hangring ikho Jesu Khrista ajaarna Thangnang tingche hangringping ichii ing mandenruw.

¹²Nenuw ing isii ing aadik tingche nensiimah ing, thiknaka chiirvachii nenghakchaang nakhe isii ing paarmah rasii.

¹³Nenuw nenghakchaang kha ichum ynthiing mahvaang isiiting ipeeh manchenruw; nenuw ing Thangnang jaarnache ithii ae kaartanii hangring mee vaang vokhehkho nenghakchaang kha ichum ynthiing peehvaang Thang-nang ting pidehruw.

¹⁴Isii inche nentaklina paarmah rasii, nenuw chuve vajeer chonghak derna ongmah vachuw; nenuw chuve Thangnang tungsiih inuwzii inche ongvachuw.

¹⁵Chunuwcha inuw ing vajeer chonghak dernache ongru ing tungsiih derna ongmuw khaenache, inuw ing isiichu tutaruw chang? Changchen mahnii.

¹⁶Nang ing achuw yngkheh mee asuwhchu ynsuwh ningka havi manjii kata tachiika natak ing narusahchu, thikniiva nachii vakhang nakho, ichum ynthiingnii khaena chongriir ynjii vakhang nakho, nang ing anu namanjii aafhuwchu asuwh-ping ichii nang ing manghuwmah chiikhang?

¹⁷Nenuw isii suwh vasah vakhang tanuwkho, nenuwchu imanchuwka ymmansir inuwzii ing barungriir iruwh ing nemanjii inche nemanpahnii ynsuwhrasii.

¹⁸Isii tanii nenuwchu ibajohka ichum ynthiing suwhchu ymbasuwpa.

¹⁹Nenuw hakchaang inuwzii ing isuur vachuw khaka, ki ing hakchaang yntongting ichongping. Isivasahna ichummah, ynthiingmah itufhuwmah nentu chaapkha bathennuwna, atiive nenuw nenhakchaang kha ynthiing ing ichum ynthiing suwhchu ynsuwhnii khaena Aafhuw ting pidehruw.

²⁰Nenuw ing isii suwh ing nengom raenche, ichum ynthiing tanii ruwkuwrjoh ing omvachuw.

²¹Changlaenche nenuw ing ynchii aanla nenpha? Ama nong ingkhe ningjakniichu nenphapa, ama nongkha chuve ithiichu vatah.

²²Atiive nenuwchu isii tanii ibathenka Thangnang suwh ymbasuw vakhaka, iseeng vokhehkho adongniichak ichen naemah ringkumchu nenphapa.

²³Isii ruthamen chuve ithiiva, changvakon-chu Thangnang ngareh kikthuur chuve inuw vakhae Aafhuw Jesu Khrista ajaarna ichen naemah iringniiva.