Read Moyon Naga ROMIO 7 Bible Online

ROMIO 7 - Moyon Naga bible

ROMIO 7

¹Kauw kanae ae, ki ing riirva kachii i nenuw nengkheng ing manghuwsiing nenta, akhaechuve vajeer chonghak khaena nenuw ing nemanghuwsa. Laaruw mee ing aringlaen taangche vajeer chonghak ing apuhva.

²Afhuwsar om rupa-nuwchu aringkum vakhaena vajeer chonghak inche afhuwsar taklinache aphuwppa. Changvakonchu afhuwsar thiknave, afhuwsar ningna ynphuwp vajeer chonghak taniichu ynjohsa.

³Chukhaenache afhuwsar ing aringlae, reentaang pasar yngkheh thoh paarhak nave, ama rupanuw chuve basiider ichuwhmah atu meeva. Changvakonchu afhuwsar thiknave ama vajeer chonghak tanii ynjohsa, ama ing rakhii niireehkhang nakho ichuwhmah tumahsa.

⁴Amavaangche kauw kanae ae, ithii ae kaartanii ihangring Khrista mee ynsuwhnii khaenache, Khrista hakchaang ajaarna vajeer chonghak nache nenuw thiktanuwve, Thangnang ningnache aanla manla vataruw.

⁵Inuw ing hakchaang inuwzii ing yngonglaenche, vajeer chonghak ajaar inche ithii henreen niivachii aanlachu yntaklina nong amantu.

⁶Atiive inuw ympuhchu ithii vakhaka, vajeer chonghak tanii inuwchu ymbajohpa; chukhaenache baruw vajeer chonghak ynziih ing mahka, itharpeh laetha inche inuw ing rukuum yntuva.

⁷Chunuwcha inuw ynchii riirtaruw? Vajeer chonghakchu isiiva? Changmahva! Vajeer chonghak ajaarna chenmah naka ki ing isiichu manghuwmahva kachiiva. Yngkhaena ynchii imbe vajeer chonghak inche achuw mee yngkheh peehchu nang ing idikmahva nachiiva tamahnave, ama barungriirchu kaningna omahva chiiva.

⁸Vajeer chonghak ajaar inche isamah tangmah chaap yndikniichu kataklina omsa. Vajeer chonghak ynvaemah nachembe isiichu ithiiva.

⁹Ki vajeer chonghak ynvaeru ing iring vasahping, changvakonchu chonghakchu athengtah nache isiichu ringka ki ithii ing.

¹⁰Iringnii khaena chonghak havi inge kaningna ithiiniichu ynsuwhsa.

¹¹Isii inche amanden ituchehnii aphatah nache, chonghak jaarnache kichu ymmanchaepa, amanche ithehkho ynthehpa.

¹²Amatah nache vajeer chonghak kho ynthiingva, amanche chonghak kho ynthiingva, ichumva vokhehkho isava.

¹³Isa inche kaningna ithiiniichu ynsuwhva chiiva? Changchen mahnii! Isii chuve isiiva ichii yndangnii khaena, isa ajaar inche isii ing kaningna ithiinii nong tuka kaningna ithiinii ynsuwhva. Havi chonghak ajaarnache isii inche athisehseh ing isii icher hungansuwhnii khaenava.

¹⁴Vajeer chonghak chuve laethacher taniiva ichii ymmanghuwsa, changvakonchu kive isii derna ynjuwr vasah hakchaang meeping.

¹⁵Ki ing katuchu ynchii katuva ichii manghuwmah ing, yngkhaena ynchii imbe ki ing tuning kachiichu tumah ing, changvakonchu ki ing kabatirchu katunah.

¹⁶Ki ing tuning kachiimahchu katu vanave, vajeer chonghak i ichumva ichiichu karupa.

¹⁷Chutahnache katu kari amachu ki ing katumahva, kataklina om isii inche ymmantuva.

¹⁸Ki kahakchaang sungna isachu omah ichii ynghuwning. Isa tunii khaena ipirpak yndennii chuve kadeensa amachu ki ing itu chehmah ing.

¹⁹Ki ing tuning kachii isachu tuchehmah ing, ki ing tuning kachiimah isamahchu katunah.

²⁰Ki ing tuning kachiimahchu tuningve, ama aatuchu kimahping, kaningna om isii inche atuva.

²¹Amatah nache ki ing vajeer chonghak havi katuwhpa amachuve, ki ing isa nong tuning kachiirae, isamahchu kithoh ynruw ing ongna.

²²Kasungna ong mee inuwzii inche Thangnang vajeer chonghak nache karotha irohsahva.

²³Changvakonchu kabarungriirna vajeer chonghakchu jeehniika laar yntuk vokhehkho kahakchaang sungna mari om isii vajeer chonghak inche kichu isuwrka ynghenruw reentaang vajeer chonghak yngkheh kahakchang mari sungna kamusa.

²⁴Ki i yntuursahpak meeping! Havana ithii hakchaang tanii ichu achuw inche ikarva chiiva?

²⁵Inuw Aafhuw Jesu Khrista ajaarnava ta ingka Thangnang chu kamanpahsahnah. Chunuw vaniive kabarungriirna Thangnang vajeer chonghakchu kamandensa, changva-konchu hakchaang ingve isii vajeer chonghak anongchu amandensa.