Read Moyon Naga 1 KORINTHIA 1 Bible Online

1 KORINTHIA 1 - Moyon Naga bible

1 KORINTHIA 1

¹Thangnang ing anong tunii khaena eeteer Khrista Chongthang Pol ki ing vokhehkho unae Sosthenes tanii thoh ing-

²Korinthia na om ruwrthiing, Jesu Khrista ningna ynthiing vasah mee ae, vokhehkho Aafhuw Jesu Khrista ruming aareen amana ong vakhae neningnache:

³Apa Thangnang vokhehkho Jesu Khrista tanii tungsiih re idaechu omrasiing.

⁴Nentaklina ympeeh vasah Thangnang atungsiih khaenache, ki ing nengkhaena apha vakhaena Thangnang chu kamanpahsahnah.

⁵Atiive neningna Aafhuw chu om khaenache nenuw aangkhenglaangna, ichongtah nakho amanche losing nakho aangkheng ahenthi chirsa.

⁶Khrista saarkhii ipeehnii khaenache nengkaarna amanehtherpa,

⁷chutahna-che Aafhuw Jesu Khrista jungindang vachii khaena nenghahjaeh nenuw ing nenphafhuw kikthuurchu yntanga ivaeh omahdehnii.

⁸Aafhuw Jesu Khrista ajuwnglaenche nenraar aomniimah ing, Aafhuw ing nenuwchu imanehther vaata.

⁹Thangnang chuve thachafhuwva, Thangnang ajaar inche asapa Jesu Khrista thoh yngkhehpangnii khaena nenuwchu yngeenpa.

¹⁰Atiive kauw kanae ae, nenuw vakhae ing chongkheh ichihaknii khaena, vokhehkho nengkaarna ynleh-niimah yntanga omru ing barungriir aanchimnii khaena, Aafhuw Jesu Khrista ruming nache thamsa ingka neningna kariirsahnah.

¹¹Kauw kanae ae, nengkaarna ynnahnii, ynlehmah omna taka Kloi eengkuw aeng kaningna enriirpa.

¹²Amachuve nengkaarna achuw yngkheh ing ki Pol meeping, ki Apollo meeping, ki Kaipha meeping, vokhehkho ki Khrista meeping ichii ynvaenachuw.

¹³Nenuw Khrista chu nensenva? Nenuw nengkhaena Pol chu khros na entheh vakhang? Changmahka nenuw ing Pol rumingna baptais nentuva?

¹⁴Krispa vokhehkho Gaija mahnaka, ki ing nenuwchu baptais kamantu mahchuw khaenache Thangnang chu kamanpahsahnah.

¹⁵Atii nenuw ing kaanuw ijiinii khaena baptais kentupa ichii achuw ingkho riircheh-mah tanuw.

¹⁶(O chumna, ki ing Stephanas eengkuw aekho baptais kamantu ae; changvakonchu mee reentaang achuwkho baptais kamantu ynsiimah ing.)

¹⁷Ki i baptais yntunii khaena Khrista ing ynchiir mahva, changvakonchu Khrista ing khros na ithiichu ngareh aansuwhniimah khaena, laaruw mee losing chong ynvaerudeh ing, isa chong itongnii khaena ynchiirva.

¹⁸Jesu Khrista ing khros na ithii thamin i ymmoh ae ningna chembe ipang chongva; changvakonchu ikar-peeh ympha inuw yngkhaena chembe Thangnang tanii ruwreng chuva.

¹⁹Havi ynziihka omna, “Ki ing ising ae losingchu mamaangva kata amanche vakhar kharnii amanghuw ae barungriirchu ki ing yntangamah riri basuwva kata.”

²⁰Ising iveer meechu utingva? Thiimthang aechu utingpae? Ataraen-nii laaruw paamne ichongnii amanghuwchu una ongva? Thangnang ing ipangchu laaruw paamne ising mee amanguurmah vakhang?

²¹Chukhaenache Thangnang losing inche, laaruw paam mee aeng entak-sah losing ajaarna Thangnang chu ynghuwchehniimah ing atupa. Ama changdenna ipang chongva enchii kenuw ing kentong thamin athacha mee aechu ikarpeeh inche Thangnang apenniichu ynsuwhsa.

²²Ama khaena Jehudi ae ing buwtinnii yndang engadiknah amanche Grik ae ing losingchu enjongnah.

²³Kenuw chuve khros na entheh khrista thaminchu kentongnah, khros na enthehchu Jehudi ae ningnache khi mansiiniiva vokhehkho reentaang mee ae ningnache ipangniiva;

²⁴changvakonchu Thangnang ing a-een vasah ae Jehudi aere Grik ae aaniimeh khaena chembe, Khrista inche Thangnang ruwreng vokhehkho Thangnang losing chuva.

²⁵Chukhaenache Thangnang ing apangnii nache laaruw mee chungna singsehna, vokhehkho Thangnang asuurnii nache laaruw mee ipir chungna athiseh ing pirna.

²⁶Atiive kauw kanae ae, Thangnang ing yngeenchu ynsiiruw, amachuve hakchaang inuwzii ing ising iveer nemmah, ipir nemmah, yngkaangpak ing iruung nemmah.

²⁷changvakonchu ising iveer mee aechu ningjak pinii khaena, laaruw paamna ipangchu Thangnang ing aateerva, amanche ipir aechu ningjak pinii khaena laaruw paamna isuurchu Thangnang ing aateerpa,

²⁸vokhehkho laaruw paam ing arathiih re meejuum ita aechu Thangnang ing aateerpae, amanche laaruw paam ing iruungpakva ichii ing ari vakhaechu yntangamah abasuwpa,

²⁹amana chembe achuw ingkho Thangnang maana ruungcheh mahnii.

³⁰Changvakonchu nenuw chuve Thangnang ing Khrista ningnache ymmangongpa, amanche Khrista inche inuw vakhae ynsing ynveernii Thangnang ing abasuwpa. Ama ajaarnache inuw ing ichum ynthiing, iseeng vokhehkho ikarpeeh ymphapa.

³¹Chukhaenache ynziihka omna, “Achuw yngkheh inche ruungningka tanave, Thangnang ing atu ari nache ruungniirasiing.”