Read Moyon Naga 1 KORINTHIA 10 Bible Online

1 KORINTHIA 10 - Moyon Naga bible

1 KORINTHIA 10

¹Kauw kanae ae, havi ki ing manghuw tanuwka kachiinah, amachuve, Mosi aanuwzii inuw vakhae afhuw fhuwven ae inche ruwrduh derna siaeka amanche Isen Chifhuwchu engaraenpa.

²Amanche engkheng ing ruwrduh sungna vokhehkho Isen Chifhuw sungnache Mosi ningna baptais entupa.

³Enuw vakhae ing laetha tanii thaeminchu isah emphapa

⁴vokhehkho laetha ringnii infhuw chukho enginpohpa; enganuw ajii Rungfhuw ringnii laetha tanii chiichu enginpohpae, ama Rungfhuw chuve Khrista chuva.

⁵Changvakonchu enuw aanemhak ae ningna Thangnang ing penmahsa; chukhaenache enuw vakhaechu paamfhuw nache ithiichu emphapa.

⁶Atiive enuw ing isamah itu engadik vaangkhe, inuw ingkho eedikniimah ing hava vakhae inge yntaklina ynchahnii ing amandeengnii chusa.

⁷Enuw areh aenche lae ruthaksii enrum ae vaangkhe nenuw tamahdehruw; mee aenche isahnii innii khaena ong aeka vokhehkho ynlakniiting emanguurnah ichii i ynthiing thiimziih ing ariirsa.

⁸Amanche mee areh aenche naamak itu engomtahna, mee lising songthum arii ynthum inii nikheh pangna ithiiae vaangkhe naamak itu omah rasiing.

⁹Vokhehkho enuw mee areh aenche Thangnang chu chaang engen khaena, enuw chukho baruwr ing bachuk aeka ithiiae vaangkhe inuw ingkho Thangnang chu chaang ensamah manuw.

¹⁰Amanche enuw mee areh aenche thaechii thaenam ing enchong tahna aamaang ing amamaangchir ae vaangkhe, inuwkho thaechii thaenam chongmah taruw.

¹¹Aangkhenglaang havi yndangnii khaena entaklina isuwhva, amanche suwnthar hungvina inuw ing eensiijaeh-nii ing abaziihva. Yngkhaena ynchii imbe inuw i laaruw paam chivachii hunganeeng aphana iringvamuw.

¹²Chukhaenache kabarungriir reep-jaehna tanaka amanden mee inche isiiting ibuw arusa tasana ynriimsa rasiing.

¹³Nenuwchu mee ing yndaar achehmah umlae inche isuwrmahri, changvakonchu Thangnang chuve thachafhuwva, nenuw ing nenchehsah taklina athiseh ing nenuwchu batheem-nii khaenache Aafhuw ing rumahnii; changvakonchu yndaar nenchehnii inche batheem thoh ynruw ing ynlaenchehnii lam iseempeeh vaata.

¹⁴Chukhaenache kaanchaarfhuw ae, lae ruthaksii irum bathenruw.

¹⁵Ki ing ising mee ae ningna kariirvaang ichongping; kariir i ikharpeehruw.

¹⁶Aafhuw thaemin kam taklina borchu Khrista asii changden thoh ymphahakmah vakhang? Inuw ing tar ymbakhiichu Khrista ahakchaang changden thoh ymphahakmah vakhang?

¹⁷Yngkhaena ynchii imbe inuw nemsakhang manuwre tar yngkhehpang vokhehkho hakchaang yngkhehpang chuvamuw, akhaechuve tar yngkhehpang tanii ymphahak pohva.

¹⁸Hakchaang taniina Isrel mee aechu eebuwrpeeh aeruw; enuw ing Thangnang ting empeeh vasah isahfhuw peeh ensahchu thiimkung thohche iphafhuw phahakmah ae khang?

¹⁹Changmaniive ki ing ynchii kariirniiva? Lae ruthaksii ting peehchae ympivasahchu peeh yngkhehva changmahka lae ruthaksii-chu peeh yngkhehva ta ingka riir ingkhang?

²⁰Changchen mahva, reentaang mee ae ing thiimkungna peeh empichuve umlae tingche empeehva, havi Thangnang ningting mahva kachiiniiva. Chukhaenache nenuw ing umlae thohche iphafhuw iphahakchu idiksamah ing.

²¹Nenuw ing Thangnang re umlae kam tanii inhak rumahnii; Thangnang thaemin isahnii nare umlae thaemin isahnii nache isahak rumahnii.

²²Changmahka inuw vakhae ing Thangnang aangae chiiniimah ing daetaruw chang? Inuw ing Thangnang chungna ipirsehping tamanuwka mandentaruw chang?

²³Aangkhenglaang aruchirva ta aeka enriirnah, amachukho chumtahna changvakonchu aangkheng ikanii mahva, “Aangkhenglaang aruchirsa chang-vakonchu aangkhenglaang inge ynseemniimahva.”

²⁴Mee achuw ingkho ataksahpang khaena jongmah rasiing, changvakonchu meekhae nakho kharpeeh rasiing.

²⁵Nenuw ing kithiirna enjuwr peehkha nenbarungriirna isah aruse rumah ichii kharpakru ing saruw.

²⁶“Akhaechuve laaruw paam sungna om aangkhenglaang i Aafhuw ningtanii chirva.”

²⁷Thachamah ae kaarna achuw yngkheh ing nenuwchu imaar yngeen aechu sinungka tatanuwve, nenbarungriirna isah aruva arumahva tanuwna kharmahruw, nemaana envesiihchu sajaeh tahruw.

²⁸Chang-vakonchu achuw yngkheh ing neningna havi laeting ympivasahva tanaka neningna riirnave, nenbarungriir ing amanghuw vakhaka samahruw.

²⁹Ichum ynraar ynghuwnii barungriir ki ing kariirchu nengkhaenarap kariirmahva, reentaang ae khaena chenva; chukhaenache reentaang achuw yngkheh ichum ynraar barungriir ynghuw inche ruwkuwrjoh ing ongsah ingchu ynchii khaena vajeer yntuva?

³⁰Ki ing kasahfhuw khaena Thangnang manpah ningve, ynchii khaena achuw yngkheh ing isahfhuw khaena kamanpah nache isamah ing ichongva.

³¹Nentu nenri chaapna nenuw ing nensah vakhangnare, aangkheng-laangna Thangnang alaar isa yndangnii ing turuw.

³²Jehudi ae, Grik ae, vokhehkho Thangnang ruwrthiing ae ningnache khi mansiinii tumahruw.

³³Ki ing mee vakhae saknii khaenache kataksah kaaniiva kachii bathen ingka, mee aangkheng apennii khaena vokhehkho ikarpeehchu mee aangkheng ing iphanii khaena katu kari vaange nenuwkho turuw.