Read Moyon Naga 1 KORINTHIA 11 Bible Online

1 KORINTHIA 11 - Moyon Naga bible

1 KORINTHIA 11

¹Ki ing Khrista anu kamanjii vaange, nenuw ingkho kanu imanjiipeeh saruw.

²Nenuw ing aangkhenglaangna kichu eensii sachuwka vokhehkho neningna manchuwchuw ingka kaman-sirchuw amakha icheepther ing nengah khaena kamanpah sahnahchuw.

³Changvakonchu pasarpa rusae chuve Khrista va, amanche rupanuw rusae chuve afhuwsar va, vokhehkho Khrista rusae chuve Thangnang va ichii i nenuw ing ynghuw kaadiknah.

⁴Pasar ing arusae mangkhum naka athamsah changmahka Thangnang isa chongchu jeernave atak arusae ynsuwh Khrista chu aajamahva.

⁵Vokhehkho rupanuw inche arusae mangkhumru ing athamsah chang-mahka Thangnang chongchu jeernave atak arusae ynsuwh Khrista chu aajamahva; chukhaenache jinge ichii rupanuwchu arusae amangkuh rupanuw thoh aanghak jaehva.

⁶Akhaechuve rupanuw ing arusae mangkhummah nave ama asam mangkuh rasiing; changvakonchu asam aten changmahka amangkuh rupanuw chu ningjaknii vakhaka, arusaechu mangkhum rasiing.

⁷Pasar chuve Thangnang tanii masak vokhehkho alaar isa amandang vakhaka, ama arusae mangkhummah vachiiva; changvakonchu rupanuw chuve pasar alaar isachu amandangniiva.

⁸Akhaechuve rupanuw tanii pasar suwhmah, changvakonchu pasar tanii rupanuw isuwhva.

⁹Amanche rupanuw khaena pasar aseem mahva, changvakonchu pasar khaena rupanuw aseemva.

¹⁰vaarmee ae khaena rupanuw ing arusae amangkhum inche afhuwsar derna ongva ichii amandangnii omva chiiva.

¹¹Changkhang nare Aafhuw ningna chembe pasar ynvaeru ing rupanuw suwhmah amanche rupanuw ynvaeru ing pasar suwhmah.

¹²Akhaechuve rupanuw ing pasar tanii isuwh vaangkhe, pasar kho amavaangche rupanuw jaarna isuwhva; amanche peeh aangkhenglaang i Thangnang tanii isuwh chirva.

¹³Rupanuw ing mee kaarna arusae mangkhumru ing Thangnang ting athamchu isava isamahva ichiichu nenuw nentaksah ing mandensaruw.

¹⁴Pasar asamchu suwnave akhaena ichohniiva,

¹⁵changvakonchu rupanuw ing asam suwnave aningnache ympahniiva.

¹⁶Changvakonchu achuw yngkheh ing havi khaene kharther tanuwve, ki ing riirning kachii chuve kening nakho changmahka ruwrthiing vakhae nakho, irumniina reentaang nunu yntanga omah.

¹⁷Neningna kajeriir chongne jemanpah mahchuwng, yngkhaena ynchii imbe nenuw nemeekong ing sakniivachii athi ing asakniimah ahenreensa.

¹⁸Amaensana nenuw ing ruwrthiing sungna ynlehmahchuw ingkhe ikiinii omna ichii kasiisa; amachu ki ing topoh kathachahnah.

¹⁹Amachuve ichumchu iseengjaeh ing yndangnii khaena nengkaarna ynlehmah chukho ombachiiting buksa.

²⁰Nenuw ing apham yngkhehna nenpur raenche nensahpohchu Aafhuw ningsiih thaemin mahva.

²¹Akhaechuve nenuw ing nensahrae mee vakhae ing ataksahsah athen rutum asahnah, amanche mee yngkheh ing aven chaamna, reentaang yngkheh ing juw baruwna.

²²Ynchiiva chang! Nengeen nengeen nacha isah arumahva? Changmahka Thangnang ruwrthiingchu nenjuumva chang? Vokhehkho endeensahmah aechu ningjak nenpeehniiva? Ki ing neningna havi khaene ynchii riirtentah tachuwka yngennii vachuw? Ki ing nenuwchu manpah kachuw chang? Ki ing havi khaene manpahmah dehchuwng?

²³Ki ing neningna kapeeh chuwkha, Thangnang ningtanii kaphasahva, amachuve, Aafhuw Jesu chu arensah jaen nache Jesu ing tarchu jerika,

²⁴vokhehkho Thangnang chu amanpah inuwna bakhiika ariir, “Havi nenuw nengkhaena kasha chuva; Ki yndennii khaena havi turuw.”

²⁵Havihtoh aanghakjaeh ing ensah inuwnache, Jesu ing athar kam chukho jerika ariir, “Hava kam i kasii ing kaseem ithar chongiir chuva; nenuw ing havi nenginchak raenche ki yndennii khaena turuw.”

²⁶Havi ariirnii chuve, nenuw ing tar havi nensahchak raenche vo-khehkho hava kam i nenginchak raenche, Thangnang ing ajungtheng mahri raentaang Jesu ithiichu nemanthangniiva.

²⁷Chukhaenache ynjasuwhmah ing Aafhuw tar asah vokhehkho kam havi ain achuw mee yngkhehchu Aafhuw hakchaang re asii nache araarpa.

²⁸Amatah nache amaensana ama ataksah ing yngensa rasiing, vokhehkho jinge ichii ing tarchu sarasiing, amanche kam tanii chukho inrasiing.

²⁹Aafhuw chu mandenru ing asah ain meechu ataksah vajeer yntunii ing asah ain sahva.

³⁰Havi khaene nengkaarna mee aanem ing suurniinae, inakho naknae, amanche areh ae inche thiknae.

³¹Changvakonchu inuw yntak sahsahna isajaeh ing vajeer yntusa manuwve, Thangnang ing vajeer itupeeh mahnii.

³²Changvakonchu inuw vajeer yntu inge laaruw paam thoh ynruw ing isii ting ymbukniimah khaenache, Aafhuw ing inuwchu eechahniiva.

³³Kauw kanae ae, havi khaene nenuw ing isahnii khaena nenpurraen-che yngkheh yngkheh ynghahruw.

³⁴Achuw yngkheh ing aven chaam nave, nenuw ipur chuwchu Thangnang ing vajeer atuniimah ing a-een sungna sasa rasiing. Amana reentaang areh iriirfhuw chong chuve katheng raenche riirpehva kata.