Read Moyon Naga 1 KORINTHIA 12 Bible Online

1 KORINTHIA 12 - Moyon Naga bible

1 KORINTHIA 12

¹Kauw kanae ae, atarae nenuw ing ynthiing laetha kikthuur khaena nemanghuw mahchu idikmah ing.

²Nenuw reentaang mee ing nengonglae achong omah lae ruthaksii inche aasiir aphuwting ymmansiva ichii nemanghuwsa.

³Chukhaenache achuw ingkho Thangnang laetha ajaar inche Jesu i siraap aphava tanaka riircheh mahnii, amanche achuw ingkho ynthiing laetha ajaar ing mahnaka Jesu i Aafhuw chuva ichii riircheh mahnii ichii nenuw ing nemanghuw inche kaadiknah.

⁴Asiksik kikthuur omna, changva-konchu laetha yngkhehpang inche ympivatah;

⁵amanche nongtunii asiksik omna, changvakonchu Aafhuw yngkhehpang nongtunii vatah;

⁶amanche nong tuchehnii asiksik omna, changvakonchu ataksahsah nongchu itunii khaena Thangnang ing ympeeh barungriir chuvatah.

⁷Laetha tanii iseengkiirchu mee aangkheng saknii khaena yngkheh kheh nache apeehpa.

⁸Akhaechuve mee yngkheh ningna laetha ing losing suwhnii chong apeehnah, amanche reentaang yngkheh ningnache laetha churap inche ynghuwchehnii chong apeehpa.

⁹Mee reentaang yngkheh ningnache laetha churap inche thachanii vokhehkho mee reentaang yngkhehna laetha inche ina amandam chehnii kikthuur apeehpa.

¹⁰Laetha ing mee yngkheh ningna laetho ituchehnii apeehnah amanche reentaang yngkheh ningnache Thangnang chongjeernii, vokhehkho reentaang yngkheh inche laetha taniimah kikthuurva ichii ynghuwnii ruwreng apeehnah, yngkheh ningnache mee ing amanghuw chehmah asiksik bari ing ichongnii apeehnah, amanche yngkheh ningna asiksik bari tanii chongchu abarichehnii apeehpa.

¹¹Changvakonchu Aafhuw ing amanden inuwzii ing nong aangkheng havi mee vakhae ningna semsiirka, laetha yngkhehpang churap inche nong atusa.

¹²Hakchaang i yngkhehpangna amanche asungna mari inempak omna; hakchaang nache mari nempak khangnare hakchaang yngkhehpang vatah, havi vaange Khrista chu-khom vatah.

¹³Amana Jehudi ae changmahka Reentaang mee ae vakhangnare, meesuwh ae changmahka ruwkuwrjoh mee ae vakhangnare, laetha yngkheh ing ama vakhaechu hakchaang yngkhehpang eensuwhnii ing baptais ymmantupa; vokhehkho inuw vakhaechu denkhehpang nache ynginpohnii khaenache laethachu ympeehpa.

¹⁴Hakchaang i mari yngkhehpang mahva changvakonchu nempakna.

¹⁵Khi inche tanaka, kive kik mahping vakhaka hakchaang tanii mahping ichii inche hakchaang tanii mahva ichii rumahnii.

¹⁶Amanche na inche ki chuve kik mahping vakhaka hakchaang tanii mahping tanave, hakchaang tanii mahva ichii rumahnii.

¹⁷Hakchaang aangkhengchu mik pangnacha, chong siinii unakhe omvaata? Aangkheng inche chong siinii ynsuwhpoh nacha barim siinii unakhe omvaata?

¹⁸Changvakonchu atiive Aafhuw Thangnang ing aadik inche hakchaangna yngkheh yngkhehchu mari inae ing ymmangom peehpa.

¹⁹Aangkheng inche mari yngkhehpang ynsuwh nacha hakchaang chucha unakhe omvaata?

²⁰Jinge ichii ing mari nempakna, changvakonchu hak-chaang chuve yngkhehpang vatah.

²¹Chunuwchenve mik inche nang i kaningna yntangakho ikanii omahchii tanaka kik ningnache tacheh mahnii; changmahka rusae inche vokheh nang i kaningna chembe yntanga khomah vachii tanaka khi ningnache tacheh mahnii.

²²Ynlehjoh ingla, hakchaangna aasuurseh churap khamah naka, hakchaang ing yntanga tucheh mahnii;

²³amanche athiseh ing bariimmah vaanchiiva tamuwka yngkhar mari vakhae churachu ymbariimnii sehseh omna, vokhehkho ymmari isaseh aeng abariimmah ae isamahseh vakhae chukho inempak isaseh ing yngennah.

²⁴Changvakonchu ymbariimmah mari taklinache athiseh ing Thangnang ing ymbariimsahnii ipipeehka hakchaang-chu ymmantuwpeehpa.

²⁵Chutahnache hakchaangna asiksik ing aomniimah khaenache mari vakhaechu yngkheh ing areh ae khaena ynchimsiir ing ymbariimsahnii khaenava.

²⁶yngkheh inche ijachaam phanave, mari aangkhenglaang inche ijachaam aphanah; amanche mari yngkheh taklina bariimsah manuwve, mari aangkheng inche enrotha rohna.

²⁷Atii nenuw Khrista hakchaang ynsuwh sachuw vokhehkho amari yngkhehter chukho ynsuwh sachuw.

²⁸Amanche Thangnang ing ruwrthiing sungnache aangkheng mancha chirka asiihpa, amaensa nache chongthang ae, avomaniina jaephar ae, avomanthumniina aanchuw mee ae, aanuwna laetho nongtu ae, ina mandamnii ruwreng apeeh mee ae, ibomnii nong atu mee ae, aapuh mee ae vokhehkho asiksik chong ichongnii amanghuw mee aechu ympisahpa.

²⁹Enuw vakhae i chongthang mahpae vokhehkho Jaephar chumahpae amanche laetho nongtu mee mahpae.

³⁰Amanche ina mandamnii kikthuur aphamahpae vokhehkho reentaang iruwpak chong ing ichongcheh chirnii kikthuur aphamahpae amanche reentaang chongchu abariniicheh kikthuur aphachir mahpae.

³¹Nenbarungriir ingkhe aangkaangseh kikthuurchu nenlaetha iruwhdeh ing idikruw. Amanche neningna isaseh lam mansiipeeh vakachuw.