Read Moyon Naga 1 KORINTHIA 13 Bible Online

1 KORINTHIA 13 - Moyon Naga bible

1 KORINTHIA 13

¹Ki ing laaruw paam chong vakhae vokhehkho vaarmee ae chong chongkhang ningle ningsiihchu omah ningve, ki ahuwruwsa ynling siirpeeh re kanta ynlingthoh aanghakjaehsing.

²Amanche Thangnang chong jeernii kikthuurchu ki ing phakhang ningle, ynvaraam chehmah ithuwh chong aangkheng vokhehkho thiimziih manghuwkhang ningle, kathacha ing bung vakhaechu apham peencheh khangningle, ningsiihchu omah ningve yntanga mahsing.

³Ki ing kadeensah vakhae pichircheh khang ningkho, vokhehkho kahakchaang rap ikho mi sungting bathunii khaena pikhang ningle, ningsiihchu omah ningve, katuungsahnii ynchiikho omah.

⁴Ningsiih inge apha iseehpak ing akhaangnah vokhehkho mee achaar-peehnah; ningsiih inge kallakmah, ataksahpang khaena kharmah, yndingmah;

⁵ningsiih inge ithipak ing omah, ataksah khaenapang jongmah, barung siksiimah, ningsiih inge isamahchu mandenmah,

⁶isamah nache rotha manrohmah, changvakonchu ichum nache rotha amanrohnah,

⁷aangkhenglaangna abadaarsa, aangkheng athachasa, aangkhenglaangna ningmanden amangomsa, aangkhenglaang akhaangsa.

⁸Ningsiih chuve ichuwr naemahva, changvakonchu Thangnang chong jeernii vakhangnare chenchir vaata; vokhehkho asiksik chong ichongchenii kikthuur vakhangnare chenvaata; thiimziih vakhangnare omahchirnii.

⁹Akhaechuve inuw ing arakhehpang ymmanghuw vatah amanche Thangnang chong jeernii chukho arakhehpang vatah.

¹⁰Changvakonchu mapung ahenpha raenche arakhehpang chukho omahchirnii.

¹¹Ki kanaepang raenche naepang vaang ichong ing, naepang vaang kamanghuw, naepang vaang kakhar; changvakonchu upa kahenpha tah-nache, naepang vaang ichiichu kabathen.

¹²Atarae inuw ing vaartha sungna ynthim riprip ing ymmunah; changavakonchu nuwting chemve mae re mae yntuwh naka muvataruw, atarae ki ing arekhehpang kamanghuw tahsa; changvakonchu nuwting chembe kichu Thangnang ing iseengjaeh ing ymmanghuw vaange, ki ingkho ynthiingkiir ing manghuwva kachuw.

¹³Chukhaenache ataraen chembe thacha, ningmanden, ningsiih hava ynthummeh i omna; changvakonchu hava vakhae kaarne aaruungseh chuve ningsiih iva.