Read Moyon Naga 1 KORINTHIA 14 Bible Online

1 KORINTHIA 14 - Moyon Naga bible

1 KORINTHIA 14

¹Ningsiihchu omnii turuw amanche ynthiing laetha kikthuurchu nenbarungriir iruwh ing idikruw, changvakonchu athurfhuwseh ing Thangnang chong jeernii chuvachiiva.

²Reentaang ithuwhpak chong ing ichong mee inche mee reentaang ningna ichong mahva, Thangnang ningna vatah; akhaechuve achuw ingkho chongchu manghuw chehmah; changvakonchu laetha ajaar inche ithuwhpak chongchu ichongva.

³Changvakonchu Thangnang chong ajeer ama inche mee ae ningnache iseemnii, ynthohsahnii, vokhehkho rotha manrohnii ichongva.

⁴Reen-taang chong yngkheh ichong ama inche ataksahpang saknii vatah, changvakonchu Thangnang chong ijeer chuve ruwrthiing aangkhengchu aseemniinah.

⁵Nenuw vakhae ing reentaang chong ing ichongchu ki inchembe kaadiknah, changvakonchu Thang-nang chong ijeer inche athiseh ing kaadiksahna. Chukhaenache ruwrthiingchu ahemansaknii inche chong aanrichu omah nave, reentaang chong ing ichong athi ing Thangnang chong ijeer inche athiseh ing ruungna.

⁶Chutahnache, kauw kanae ae, ki ing neningna kathenglae reentaang chong ing chong ningve ynchii ikanii henreen vatakhang, ikanii achiih tikho omah dehnii, ki ing Thangnang ningtanii amandangnii changmahka thiimziih ynghuw changmahka chong ijeer changmahka ynchuwpeeh mahnaka kakanii ynchii omkhang.

⁷Aaruur yndang, alaetha omah peehchae, baasi vakhangnare, bina vakhangnare, aaruurna aantheepnii mandangmah manuwve, baasi atumva changmahka bina atumva ichiichu ynsaangkhe manghuwva tamuwkhang?

⁸Vokhehkho seemruwr amanring mee ing ichummah iruur ing manring nave, achuw ing laar tuknii khaena ynthongva takhang?

⁹Amavaangche nenuw ingkho reentaang chong ichong chuwchu iraecharii ing manghuwnii chong inche barimah tanuwve, ynchii ariirniiva ichii ynsaangkhe mang-huwva tamuwkhang? Nenuw aruwh thangsii ing ichongchu ynsuwhva nenta!

¹⁰Laaruw paam sungne chong yntinmah inempak omna, changvakonchu arutho omah chong ynvaemah.

¹¹Akhaechuve ki ing enchongchu manghuwmah ningve, aachong mee ningnache reentaang meeping amanche ichong meechu kaningna reentaang meeva.

¹²Nenuw ing laetha tanii kikthuur iphachu nengadik vakhaka, ruwrthiing seemnii iruungsehchu jongruw.

¹³Achuw yngkheh reentaang chong ichong mee inche chongchu abarinii kikthuur iphanii inche thamsa rasiing.

¹⁴Akhaechuve ki ing jinge ichii ing thamsa ningve, kalaetha ing athamsahva, changvakonchu kavakhar sarup chuve ynvaemah.

¹⁵Ki ing ynchiikha tukate chang? Ki ing kalaetha inche thamsava kata, vokhehkho kavakhar inchenkho thamsa vakata; kalaetha inche lachu tuvakata, vokhehkho kavakhar inchenkho la tuvakata.

¹⁶Nang ing nalaetha pang inche Thangnang chu namanpah raenche, ynsaangkhe taangtanii achuw yngkheh inche manpah chiika nathamsah nache Amen tavaate? Ama ing ynchii nariirva ichiichu manghuwmahsa.

¹⁷Nang ing isajaeh ing manpahsa taniika Thangnang ting thamsa taniikho, mee areh chuve seempeeh chehmahchii.

¹⁸Ki ing nenuw ithithi ing reen-taang iruwpak chong ing chongning tasa ingka Thangnang chu kamanpah-sahnah.

¹⁹Changvakonchu ruwrthiing nache ki ing reentaang ae chukho manchuwnii khaena, iruwpak reentaang chong lising suum kariirchang chenve, mee ing mang-huwseh vachii chong asae runga rikti iriir inche kaadiksahnah.

²⁰Kauw kanae ae, barungriir ikhartahna naepang eensuwhpeeh mahruw; isamah tuniinache naepang eensuwhpeehruw, changvakonchu ikhartahna upa eensuwhpeehruw.

²¹Vajeer chonghak nache havi ynziihka omna, “Laaruw mee ajaarna reentaang reentaang chong vokhehkho marpah ae ner ajaarnache hava mee ae ningne chongva kata changvakonchu enuw ing irungaepeeh mahnii ae taka Aafhuw ing ajeer.”

²²Reentaang chong ing ichong kikthuurchu athacha om ae khaena mahva, athacha omah ae khaena buwtinnii chuva, changvakonchu Thangnang chong amanthang kikthuurchu athacha omah ae khaena mahva, thacha om mee ae khaenava.

²³Chukhaenache ruwrthiing aang-kheng ing purtanuwka reentaang chong nenchong raenche, taangtanii changmahka thachamah aechu varuwh ae nave, nenuw i baveeh sachuw ta ae naka enuw ing riirmah ae niikhang?

²⁴Changvakonchu mee vakhae ing Thangnang tanii chongchu jeernave, thachamah mee changmahka reentaang mee achuw yngkheh avaruwhtahna, ong vakhae ajaarnache aningna isii amiraar omna ichii manghuwnii vaata vokhehkho aasii vakhae ing ataksahchu vajeer yntusa vaata.

²⁵Amana barungriir ithuwhpak taniichu henphong vaata vokhehkho jinge ichii ing nenuw nengkaarna Thangnang ynvaena ichii riirsa naka ama ing khupnaka Thangnang chu rumvaata.

²⁶Auw kanae ae, nenuw ing nenpurpoh raenche, nengkaarna achuw yngkheh ing ympahnii la, ynchuwpeeh, Thangnang tanii chong amanthang, reentaang chong ichongnii, amachupang mahka chongchu abarinii, hava vakhae i om tanuwve, ruwrthiing seemniichu ynsuwhrasiing.

²⁷Achuw yngkheh ing reentaang chong inche chongnave mee ynnii ynthum ing ynden chakchak inche chongruw; amanche chongchu mee yngkheh ing abaripeeh rasiing.

²⁸Changvakonchu chongchu aanripeeh mee omahnave, ama ing ruwrthiing sungna ahuw turu ing ongrasiing.

²⁹Jaephar mee ynnii ynthum ae ing chong ae rasiing; amanche reentaang ae inche atinva atinmahva ichiichu vajeer tuae rasiing.

³⁰Changvakonchu achuw yngkheh meekongna ong ama inche Thangnang tanii chong phanave, amaensana hechong mee inche ichongchu manchen rasiing.

³¹Akhaechuve mee vakhaechu ynthohsahnii khaena vokhehkho yng-huwchehnii khaena, nenuw yngkheh yngkheh ing Thangnang tanii chongchu ynthang arusa;

³²amanche jaephar laetha yngkheh derna jaephar yngkheh inche ongna.

³³Akhaechuve Thangnang i ynnahnii suwhnii Thang-nang mahva changvakonchu idae chuva. Thangnang ruwrthiing chaapna jinge ichiiva,

³⁴rupanuw ae ing ruwrthiing sungna huwdaejaeh ing ong ae rasiing akhaechuve enuw ichong rumah. Jehudi ae vajeer chonghak inuwzii ing enuw ynjuur savachiipae.

³⁵Enuw ing ynchii yngkheh manghuw nungka ta ae nave, engeen engeenna enfhuwsar ae ningnache siisa ae rasiing; akhaechuve rupanuw ing ruwrthiing sungna ichong i ningjakniiva.

³⁶Nening tanii Thangnang chongchu ithengva, chang-mahka neningna pangche ithengva?

³⁷Achuw yngkheh ing ataksahchu jaephar ping, changmahka laetha tanii kikthuur kaphava tanaka manden nave, ki ing neningna kabaziih havi Thangnang tanii chonghak chuva ichii manghuwsa rasiing.

³⁸Changvakonchu achuw yngkheh ing havi manghuwmah nave, ama ing ariirchu rungae mahruw.

³⁹Chutahnache, kauw kanae ae, Thangnang chong ijeerchu barungriir iruwh ing idikruw, amanche reentaang chong ing ichongchu khaammahruw.

⁴⁰Nong aangkhenglaang ing ynden chakchak ing tuva nenchiiva.