Read Moyon Naga 1 KORINTHIA 15 Bible Online

1 KORINTHIA 15 - Moyon Naga bible

1 KORINTHIA 15

¹Atiive kauw kanae ae, ki ing neningna katong isa chong vakhae nenuw ing iraang chuwka vokhehkho ingiirchuw nening nache kamanthangsahnah.

²Isa chong ki ing neningna katong chongkha nenuw ing icheepther ing bachuw tanuwve, ama ajaar inche nenuwchu yngkarva; changmahnave nenuw aruwh thangsiih ing nenthachapa.

³Ki ingkho kaphasah vakhaechu neningting kapeehsah vachuw, ama-chuve ynthiing thiimziih inuwzii ing Khrista ing inuw vakhae isii khaena thiksa;

⁴Aafhuw chu endimpa, ynthiing thiimziih inuwzii ing Aafhuw chu inii avomanthumnii nache hangringsa;

⁵amanche ahaarpana Pitar ningna, vokhehkho aanuwnache ama asebok suum ariinii ae ningnache yndangsa.

⁶Ama aanuwting chembe, Aafhuw ing mee charunga athi auw anae aethoh yntuwhsa, enuw tanii mee aanem chuve ataraen phanii ing ringnae, changvakonchu areh ae chuve thiksae.

⁷Aanuwnache vokheh Jems thoh yntuwhsae vokhehkho chongthang vakhae thoh yntuwhsa.

⁸Aningkuur dehna, aaniimah siisiina om naepang vaangkhe ichii ing kaning nakho Aafhuw inche yndangsa.

⁹Ki chuve Khrista chongthang vakhae ae kaarna matik ichamah isiingpak chongthang yngkheh ping, yngkhaena ynchii imbe Thangnang ruwrthiing aechu kamanang ae.

¹⁰Changvakonchu ki ing chongthang ynsuwhsah kaphasah i, Thangnang tungsiih ajaar inche ynsuwhsahping, changvakonchu Aafhuw ing atungsiih kaningna ympeehchu aruwhnam mahva. Changvakonchu ki chuve Khrista chongthang vakhae kaarna athiseh ing inuwmhak chuping. Changvakonchu kataksah ing katu ing mahva, Thangnang tungsiih ing kataklina nong atuva.

¹¹Chunuchenve kaningtanii vakhangnare, eningtanii vakhangnare, jinge ichii ing chongchu kenjeersa vokhehkho nenuw ing nenthachapa.

¹²Ataraene Khrista chu ithii vasah tanii hangringsa ta ungka kentong raenche, ithii hangring omah ta aeka nengkaarna achuw yngkheh mee aenche enriir ynvaenae.

¹³Ithii hangringchu omah nave, Khrista chukho hangring mahsa;

¹⁴aman-che Khrista chu hangring mah vanave, kenuw ing kentong havi aruwh thangsii vatah vokhehkho nenthacha chukho aruwh thangsii vatah.

¹⁵Ama chungnache kenuw chuve Thangnang taklina ichummah asaarkhii ipeehchupae ichii ing thang-sung, akhaechuve Thangnang ing Khrista chu amanringpa ichii saarkhii kempeehpa. Khrista chu hangring mahsa ichiichu ataktak vanave, ithii ae chukho hangring mahnii ae.

¹⁶Ithii aechu ihangring mahpae vaniive, Khrista chukho hangring mahsa;

¹⁷amanche Khrista chu hangring mah vaniive, nenuw nenthacha chukho aruwhnamva, amanche ataraen phanii ing nenuw isii nache ongjaehtah nachuw.

¹⁸Amana chembe Khrista athacha ithii ae chukho maangsae.

¹⁹Khrista ningna ningmanden ym-mangomchu ynring raenpang khaena vanave, laaruw mee vakhae tanii ningchuwh niisehchu vamuw.

²⁰Changvakonchu atiive ithii vasah ae kaartanii Khrista ing ithii tanii hangring aren aanlachu hungan-suwhsa.

²¹Laaruw mee tanii ithii isuwh vakhaka, amavaangche mee yngkheh ningtanii ajaarna ihangring chukho isuwhva.

²²Akhaechuve Adam ningna aangkheng ithii vamuw, amavaangche Khrista ning-nache mee vakhae hangring vaata.

²³Changvakonchu amee siirna ningkuur maensa naevaata, Khrista ing aren aanla chuva, aanuwnache Khrista ing ajungtheng raenche Aafhuw mee ynsuwhchu vaatae.

²⁴Ama aanuwnache achiniichu ynsuwh vaata; Khrista ing laetha aapuh mee, aatuaricheh ae vokhehkho ruwreng aadeen vakhae aechu cheh-chir naka aaruwng lipahchu ampa Thangnang ningting mansir vaata.

²⁵Akhaechuve meejeehnii vakhae aechu Aafhuw akhi derna asiihmahri raentaangche, Khrista ing paarvaata.

²⁶Akuurchiimnii meejeehnii ae achehnii chuve ithii chuva.

²⁷Ynthiing chonghak ing ariir chuve, “Aafhuw ing adernache peeh vakhae amangom chirva.” Iseengkiir ing omna amachuve, peeh aangkhenglaang kaderna omvaata taka Aafhuw ing ariirtahna, peeh aangkhenglaang Khrista akhi dernache omchirva ichii i atatakva.

²⁸Peeh aangkhenglaang aderna amangom aphanache, asiti ataksah ing Thangnang dernache siivaata, aangkhenglaang aderna amangom Aafhuw Thangnang inche aderna aangkhenglaang mangomchir naka paarvaata.

²⁹Atii ithii khaena baptais entu mee aechu ynchii tavachiipae? Ithii aechu hangring mah ae nacha, yngkhaena ithii khaena baptais entuva?

³⁰Kenuw ingkho apha siirna isii ikha suwhnii vachii nache ynchii khaena ongpung?

³¹Kauw kanae ae, inuw Aafhuw Jesu Khrista ningna ki ing kaphasah neningna kaandingniichu parsa ingka, ki anasiirna thikning ta ingka atatak ing kariirnah.

³²Laaruw mee nunu inuwzii ing, ki ing Ephisia na lampa sha aethoh laar yntuk ningve, ynchii katuungsah omvaate? Ithii aechu hangring mah ae nave, inuw sataruw vokhehkho intaruw, akhaechuve atuknuw thikvaanchii vatah.

³³Nenuw pangmahruw; “Isamah ruwr inche isa ringkum amamaangnah.”

³⁴Ichum barungriir nache hungomruw amana isii chukho tumahruw. Akhaechuve mee areh ae chuve Thangnang kho manghuwmah ae. Havi ningjak nemanghuwnii ing kariirva.

³⁵Achuw yngkheh mee ing tavaata, ithii aechu ynsaangkhe hangringpae? Enuwchu ynchii hakchaang khavang-khe ichiipae?

³⁶He ipang ae! nang ing amuw navorkha thikmah tanga naka hangmuwng chehmahnii.

³⁷Nang ing navorkha amuwpang vatah, gehu vakhang nakho, asiksik amuw vakhang nakho, chumnii ing amuw pangchu navor vatah, imuwng vasah ing vormahchii.

³⁸Thangnang ing amuw ipika aadik inuwzii inche amamuwngva amanche amuw siirna atakchu asiksik ing amamuwngva.

³⁹Iring hakchaang aechu aang-hakchir mahpae, laaruw mee ing asha yngkheh, shava aenche asik yngkheh, vaati aenche asik yngkheh amanche nga aenche asik yngkhehpae.

⁴⁰Thangnang tanii hakchaang omna, laaruw paam tanii hakchaang omna, thangbaen tanii isa chuve laaruw paam tanii isa thohche ynghakmah.

⁴¹Inii tanii isa asikna, thapa ireng asaknii asikna, aesii ireng asaknii asik yngkheh omva vokhehkho aesii ae kaarnakho asiksiisii isa reentaang inempak omna.

⁴²Havi vaange ithii ae ihangring chukhom vatah. Ithii hakchaangchu aandim raenche imaang peeh ynsuwhna; changvakonchu ahangring raenche imaangmah peeh ynsuwh vaata.

⁴³Aandim raenche ynjasuwhmah ing omna, ahangring raenche alaar sapakna, aandim raenche suurna, ahangring raenche ruwreng pirna.

⁴⁴Aandim raenche hakchaang pangvatah; changvakonchu ahangring raenche ynthiing laetha hakchaang chuvaata. Anunu tanii hakchaang om vaange, laetha tanii hakchaang chukho omva.

⁴⁵Havi khaena ynziih vasah omna, “Ahaarpa mee Adam inche iring mee ynsuwhka; aningkuur Adam inche iringnii ympeeh laethachu ynsuwhva.”

⁴⁶Laetha tanii ing ahaarpa mahva, changvakonchu hakchaang tanii ingva; aanuwting chembe laetha tanii ing isuwhva.

⁴⁷Ahaarpa meechu ruwruw ing aseem vakhaka ruwruw taniiva, amanche avomaniinii chuve thangbaen taniiva.

⁴⁸Ruwruw tanii aseem mee inche ruwruw tanii ynsuwhnae vokhehkho thangbaen tanii ae chuve thangbaen tanii pingeng tiknae.

⁴⁹Inuw ing laaruw paamna ynringrae ruwruw tanii masak ynri vaange, thangbaen tanii masak chukho inuw ing rivataruw.

⁵⁰Kauw kanae ae, ki ing havi kariirnah, sii re hakchaang ynvae ing Thangnang lipah ipha chehmah, amanche imaang inche imaangmah chehmah.

⁵¹Rungaeruw, ki ing neningna ithuwhpak chong kariirnah, achiphana tumpeeh senruwr abaring raenche, inuw eengkhenglaang thikmah manuw, changvakonchu amongpang tina mik eechaprip mongtehna, aningkuurnii tumpeeh senruwr abaring raenche, inuw vakhaechu imantehchir naka ithii chaap aechu maensa ing hangring vaatae.

⁵²

⁵³Akhaechuve maangva chiichu maangmahdeh vachiiting yntehvaata vokhehkho ithii fhuwchu ithiii arumahting yntehvaata.

⁵⁴Havi asuwhraenche imaang aru havi imaang arumahting aantehchir aanuwtingche ynziih vasahchu hungindang vaata, “O ithiichu aacheh inche abaduwrpa.”

⁵⁵“O ithii, nang ing nachehchu utingva? O ithii, namansuh chehnii nahaechu utingva?”

⁵⁶Ithii ing ymmansuh chehnii ruwrengchu isii taniiva, amanche isii ruwreng chuve vajeer chonghakva.

⁵⁷Changvakonchu inuw Aafhuw Jesu Khrista ajaarna ichehnii inuw yntaklina ympipeeh Thangnang chu ympah ynsuwhrasiing.

⁵⁸Chukhaenache ka-ningsiih kauw kanae, nenuw ing nentu nenri vakhaechu Aafhuw ningnache paammah ichii nemanghuw sahthoh icheep ing, ynlaapmahdeh ing Aafhuw nongnache apha om bakhaena matak ynsuwhruw.