Read Moyon Naga 1 KORINTHIA 16 Bible Online

1 KORINTHIA 16 - Moyon Naga bible

1 KORINTHIA 16

¹Atiive ynthiing ae rutum khaena seer saenii khaenache, ki ing Galatia ruwrthiingna jinge turuw ta ingka kariirpeeh ae vaangkhe nenuw ingkho itupeehruw.

²Katak katheng raenche seerthaang bathaang aomniimah khaenache, ama ama ing aphasah inuwzii ing Aafhuwnii inii nache meepum siir ing seerchu mangkong ae sana siiae rasiing.

³Ki ing kavatheng raenche, nenuw ing nengkaar tanii thachafhuw achuw yngkhehchu chongthen thoh ynruw ing Jerusalem ting neningsiih kikthuurchu vethaknii khaena chiirva kata.

⁴Amana kikho isinii apha chacheh nave, enuw thohche sihakva kenta.

⁵Ki ing Mesidonia ting kavak aanuwna neningting thengva kata, akhaechuve ki ing Mesidonia veraenva kachii vakhaka,

⁶lamkhii kasinii kasiniina nenuw ing kichu ibomnii khaenache, nenuw thoh ynruw ing apha mongtehna changmahka pharbuw nakho onghakmuw arusa.

⁷Atarae ki ing nenuw thoh lamthahna yntuwhchu idikmah ing; Aafhuw ing irupeeh nave, ki nenuw thoh ynruw ing apha topoh iseehhak ing cheenghak manuwka kachiisahnah.

⁸Changvakonchu Pentikos inii ipha ing Ephisia nache cheengva kata.

⁹Eejeehnii inempak omkhangnare, iruungpak vokhehkho ikaniipak vachii eengkhaar yngkheh kakhaena imongka omna.

¹⁰Neningna Timothi ing thengnave, nenuw thohche onghaknii khaenache aanchikniimah ing isajaeh ing ibariimpeehruw, akhaechuve ki ing katu kari vaange ama ingkho Aafhuw nongchu atusahva.

¹¹Chukhaenache achuw ingkho amachu juummah rasiing, changvakonchu kaningting ahungtungnii khaenache amachu lamthahna ivethakpeehruw, akhae-chuve ki ing amachu unae aethoh kahahsahnah.

¹²Kauw kanae ae, atarae Apollo chu ki ing unae aethoh neningting ivathengnii khaena inempak kamaneemsahnah, changva-konchu atarae ama ing ivasichu mandenmahri, isinii apha apharaenche vatheng vaata.

¹³Nenuw ynriimruw, thacha nache ngiirjaehruw, thona mangomruw vokhehkho pirtherruw.

¹⁴Nenong aangkhenglaang ningsiih ing turuw.

¹⁵Kauw kanae ae, ki ing nenuwchu kathamsahnahchuw, nenuw ing Stephanas eengkuw aechu nemang-huwsa amachuve, enuw i Akhaia tanii amaensa aanla chupae amanche enuw entaksah ing ynthiing mee ae rukuum tupeehnii inche ympidehpae.

¹⁶Jinge ichii ing nong itu mee ae, inuwmpak mee vakhaechu ibomsah thoh ynruw ing nenuw ingkho imanjii peehruw ta ingka kariirsahnah.

¹⁷Amanche Stephanas re Phortu-natus vokhehkho Akhaikus, enuw ae inge entheng tahna karotha rohsakna; akhaechuve nenuw ing nenthengmah tahna enuw inge ber ymbupeehpae,

¹⁸enuw ing nenrotha emanroh pingeng ichii ing katakli nakho rotha ymmanroh peehpae. Hangchii mee ae i inuw ing manghuwpham suwhna.

¹⁹Asia tanii ruwrthiing ae ing nenuwchu salaam ynjetusahnah ae; Akuila re Presila ae ing engeenna yngkong ruwrthiing aethoh ynruw ing khristen salaam ynjetusahnah ae.

²⁰Unae vakhae ing nenuwchu salaam ynjetusahnah ae. Unae yngkheh ynsuwh ing ibeeng yntum nuwna yngkheh kheh salaam ynturuw.

²¹Pol kataksahrap kakik ing havana salaam chong i kabaziih sahva.

²²Achuw yngkheh ing Aafhuw aning mansiih mahnave, ama siraap phara-siing. Maranatha, thenglo O Aafhuw!

²³Aafhuw Jesu ajaarna nengkaarna ningsiih omrasiing.

²⁴Jesu Khrista ajaarna kaningsiih inche nenuwchu eenruwfhuw rasiing.