Read Moyon Naga 1 KORINTHIA 2 Bible Online

1 KORINTHIA 2 - Moyon Naga bible

1 KORINTHIA 2

¹Kauw kanae ae, ki ing neningna kathenglae yngkaangpak ing vokhehkho ising iveerpak ing Thangnang chongchu tongmah ing.

²Ki ing nenuw thoh kaonglae, athurfhuw ing Jesu Khrista vokhehkho khros na ithii thamin mahnaka reentaang chaap kabahirnii ing kabarungriir kamanreep.

³Chukhaenache ki ing nenuw thoh kaonglaenkhe, isuurpak ing, ynchikpak ing vokhehkho ynchiim riirii ing ongsa ingka,

⁴amanche kamanchuwchuw re kachongchu laaruw mee ising iveer chongsae ingmahka, laetha re Thangnang ruwreng ingva.

⁵Amana chembe nen thachachu laaruw mee ising iveer ningna mangomru ing, Thangnang ruwreng nache omnii khaenava.

⁶Changkhang nare kenuw ing laethana imin ae kaarnache ising iveer chong ing ichong ung, changva-konchu laaruw paam havi tanii ising iveer ingmahva vokhehkho laaruw paam aapuh ae havi tanii yntangamah ynsuwh vachii ising iveer ing mahva.

⁷Changvakonchu laaruw paam aangkheng aseemmah rirae Thangnang ing inuw vakhae ynlaar isa omnii khaena maensa ing amantukchir vasah thuurjaehka om Thangnang tanii ising iveer chong inche ichong ung.

⁸Havana ising iveer i laaruw paam aapuh ae achuw ingkho manghuwmah ae; enuw ing manghuw ae nave alaar isa om Aafhuw chu khros na thehmahrom vachiipae.

⁹Changvakonchu ynziihka omna, “Mik ing amumah, na ing asiimah, vokhehkho laaruw mee barungriirna isuwhmah aangkhengchu, Thangnang aning amansiih ae khaena Thangnang ing asirpa.”

¹⁰Thangnang ing inuw ynningna ynthiing laetha ajaarnache ymman-dangpeehpa, akhaechuve laetha ing aangkhenglaang ajongva. Chumna, Thangnang tanii ithuwhpak chong phanii ing ajongva.

¹¹Mee yngkheh ningna om laetha inche ataksah khaena amanghuwsa. Havivaange Thangnang ynthiing laetha inche Thangnang khaena aangkheng amanghuwsa.

¹²Ataraene inuw laaruw paam tanii laetha ymphamahva; changvakonchu Thangnang ing ajenbathen laethachu ymphava, amana chembe Thangnang ing ynningna ngareh ing ympeeh aangkhengchu ymmanghuwnii khaenava.

¹³Havana vakhae i laaruw paam ising iveer ing ymmanchuw chong ichong mahpung, changvakonchu laetha chong ing imanchuwka, laetha adeen ae ningnache laetha chong ichumchu ichongpung.

¹⁴Achuw yngkheh laetha omah mee chuve Thangnang laetha kikthuurchu phamah, akhaechuve aning nache enuw pangsae, amanche enuwchu ama ing manghuwpeeh mahsae. Yngkhaena ynchii imbe laetha inche enuwchu asiksii ing amupae.

¹⁵Laetha mee inche aangkhengna vajeer atuchirsa, changvakonchu ataksah chuve achuw ingkho vajeer tumah.

¹⁶“Achuw ing Aafhuw barungriir manghuwka chong atahpeeh chehse?” Changvakonchu kenuwve Khrista barungriir kendeen-sahsa.