Read Moyon Naga 1 KORINTHIA 3 Bible Online

1 KORINTHIA 3 - Moyon Naga bible

1 KORINTHIA 3

¹Kauw kanae ae, ki ing neningna laetha om mee ae ningna ichong vaang ing chong chehmah ing; chang-vakonchu hakchaang mee ynsuwh ing vokhehkho Khrista ningna iduung naepang vaang ichong ping.

²Ki ing nenuwchu sangkhom kapeeh vachuw, ynchae buw kapeehmah vachuw; akhaechuve nenuw badaarcheh mahchuw; nenuw ing ataraen phanii ing chehmah richuw,

³nenuw ataraenkho hakchaang mee ynsuwhjaeh nachuw. Nenuw nengkaarna kallak, ynnahnii vokhehkho asiksik suwhnii omjaehtah nachuw, nenuw hakchaang mee ynsuwh vokhehkho laaruw mee nunu inuwzii ing sijaehmah chuwkhang?

⁴Nenuw achuw yngkheh ing nenriirnah, “Ki Pol mee ping,” amanche reentaang yngkheh inche, “Ki Apollo mee ping,” nenuw laaruw mee ynsuwhjaehmah chuwkhang?

⁵Chunuwcha Apollo chu achuw vakhang? Pol chu achuw vakhang? Enuw enjaarna nenthacha vasah nong itupaetah, amanche Aafhuw ing enuw yngkheh kheh ningna nongtunii apeehsah thoh aanghakva.

⁶Ki ing amuwchu kavorpa, amanche Apollo inche chiichu apeehpa, changvakonchu Thangnang ing amanruungva.

⁷Amachu vanave amuw avor re chii apeeh meechu yntangamahpae, changvakonchu Thangnang pang inche amanruung vatah.

⁸Amuw avor mee re chii apeeh mee chuve yngkhehpang vatah, enuw enongtu inuwzii ing entaksahsah nongmen phasa vaatae.

⁹Kenuw chuve Thangnang nong ituhakpoh chupung; amanche nenuw chuve Thangnang ruwrae chuvachuw vokhehkho Thangnang eenchu vachuw.

¹⁰Kaningna ympeeh vasah Thangnang tungsiih inuwzii ing, een itu aafhuw yngkheh vaang ing eenphambur kamangiirpa, amanche mee reentaang yngkheh ing ataklinache eenphambur amangiirpa. Changvakonchu mee vakhae inche ama taklinache ynsaangkhe kamangiirse tasana ynriimsa ae rasiing.

¹¹Jesu Khrista mahnaka achuw ingkho reentaang eenphambur mangiir chehmah.

¹²Changvakonchu achuw yngkheh ing eenphambur amangiirchu sana ing, khampher ing, amen iruw rung ing, thing ing, fuwr ichong ing, sapuur ing mangiir nave, mee vakhae ing entu nong vakhaechu mandang vaata;

¹³yngkhaena ynchii imbe Khrista ing ajuwnglaenche mee vakhae nongchu yndangchir vaata, ama inii nache mi ing aangkhenglaang mandangchir vaata; vokhehkho mi inche ama ama ing atu nongchu ynchiiva ichiichu itohchir vaata.

¹⁴Achuw yngkheh ing eenphambur amangiirchu omjaeh nave, ama ing nongmen phasa vaata.

¹⁵Achuw yngkheh mee anongtuchu mi inche kaangnave, ama imaangsahva changvakonchu ataksah chuve mi sungtanii ihungsuwh vaang ikarpeeh phasa vaata.

¹⁶Nenuw i Thangnang rumniieen vachuw vokhehkho nening nache Thangnang laetha ongna ichiichu nenuw nemanghuw mahva?

¹⁷Achuw yngkheh ing Thangnang rumniieenchu mamaang nave, atakchu Thangnang ing mamaang vaata, yngkhaena ynchii imbe Thangnang rumniieen chuve ynthiingva, amachu nenuw vachuw.

¹⁸Achuw tanga ingkho ataksah ynchaesamah rasiing. Nengkaarna laaruw paam losingna achuw yngkheh mee ing isingping tanaka manden nave, ama ing ising aambunii ing, ipang ynsuwhrasiing.

¹⁹Yngkhaena ynchii imbe havana laaruw paam tanii losing chuve Thangnang mik enna ipangva. Amachuve ynziihka omna, “Ising mee aechu enchong nache Thangnang ing asuwrpae”;

²⁰athar vokheh, “Ising mee ae ing emandenchu ikanii omahva ichii Thangnang ing amanghuwsa.”

²¹Chukhaenache achuw ingkho mee ing atucheh aricheh khaena ruungniimah rasiing. Akhaechuve aangkhenglaang havi nentasahva.

²²Pol vatah rasiing, Apollo vatah rasiing, Kaiphas vatah rasiing, laaruw paam vatah rasiing, iring vakhangnare amanche ithii vakhangnare, ataraennii vatah rasiing vokhehkho nuwtanii vakhangnare, aangkhenglaang havi nentasahva,

²³nenuw i Khrista tanii vachuw; amanche Khrista inche Thangnang taniiva.