Read Moyon Naga 1 KORINTHIA 4 Bible Online

1 KORINTHIA 4 - Moyon Naga bible

1 KORINTHIA 4

¹Mee ing kentak i Khrista meenae aepae vokhehkho ithuwhpak Thangnang chong rukuumtu meepae ichii ing imanden ae rasiing.

²Atii athurfhuwseh yngkheh chuve thacha-fhuw om rukuumtu mee yngkheh ituwhpham suwhna.

³Changvakonchu nenuw ing changmahka laaruw paam vajeer ing ki vajeer yntuchu kaningna chembe isiingpak peehvatah. Atatak chuve kataksah rapkho vajeer yntusamah ing.

⁴Kataksah miraar rapkho manghuwmah ing, changkhang nakho havi inge kichu ymmanchum mahva; changvakonchu kichu vajeer yntu mee chuve Aafhuw chuva.

⁵Chukhaenache Aafhuw ing ajungtheng mahri raentaang, aphachu ahenpha mahri raentaangche achuw ningnakho vajeer tumahruw. Aafhuw ing ynthim sungna ynthuurka om peeh vakhae chaap ireng tingche hembasuw vaata, vokhehkho barungriir ing aman-den chukho mandang vaata; amana chembe Thangnang tanii ympahsahchu ameesiir ing phasa vaata.

⁶Kauw kanae ae, nenuw achuw yngkhehpang ingkho mee yngkheh khaena reentaang yngkheh taklina rumah tanuwka nenruungniimah ing, ynziih vasah nakhe ynraenjop sakmahnii ichiichu kenjaarna nenuw ing nemanghuwnii inche, nengkhaena katak re Apollo taklina aandangnii katuva.

⁷Achuw ing nangchu asiksii ymbasuwva? Vokhehkho nang ing naphamah ynchii omkhang? Changva-konchu nang ing napharem vanave, yngkhaena naphamahri vaang iruung-chichuh vachii?

⁸Atiive nenuw nenven bavasa! Atiive nenuw savang sachuw! Kenuw ynvaeru ing iruwng vaang paarsachuw! Sakna, kenuwkho nenuw thoh iruwng vaang ipaarnii khaenache, nenuw ing iruwng vaang ipaarchu ki ing kaadiksahnah.

⁹Chukhaenache thikvachii mee ae vaang, Thangnang ing chongthang kenuwchu akuurchiimna ynghen basuwpa ichii ing kamandensahnah, akhaechuve laaruw paam nakho, vaarmee ae amanche mee vakhae maana ynniisahnii ing omsung.

¹⁰Khrista khaena kenuw chuve ipang-pung; changvakonchu nenuw chuve Khrista ningna isingchu vachuw! Kenuwve suurnung, changvakonchu nenuw chuve pirnachuw! Nenuwve ympah nemphasa, changvakonchu kenuw chuve ynjasuwhmahchu kemphapa.

¹¹Apha ataraen phane kenuwve kenven chaamjaeh tahna amanche kenchii raarjaehna; peen yntukmah ung, rumor isah kenphanah amanche kengongnii jaarnii naemah;

¹²Amanche kengkiksahrap ing nong kentusahva, siraap ympiae raenche bor kenpeeh ae; ymmanang ae raenche kengkhaangsah;

¹³Kenthang mansik khang ae nare, isa ing kenthamsah ae. Kenuwve ataraen phanii ing laaruw paamne yntirsuwh peehchae vaang aangkhenglaangna lamchohnii ynsuwhsung.

¹⁴Ki ing nenuwchu nening ynjaknii khaena chong havi kabaziih mahva, changvakonchu kaning kamansiih siti vaang ichii ing nenuwchu kaachahnii vachuw.

¹⁵Nenuw ing Khrista thoh ruw ingki ing maensa naka ariirpeeh vachii lising suummeh omkhangnare, nempa nemmah, akhaechuve isa chong ajaarna Jesu Khrista ningna nenuwchu kabaring vachuw.

¹⁶Chukhaenache ki ing kamaneemnahchuw kanu imanjii-peeh saruw.

¹⁷Havi khaena rapche kaning kamansiihpak vokhehkho thachafhuw om kasiti Timothi chu neningting kajechiirpa. Apham siirna, ruwrthiing siirna, ki ing kaman-chuwchuw vaangkhe, Jesu Khrista ningna om kajii lamchu ama ing imanthangpeeh vaata.

¹⁸Changvakonchu ki ing nening-na thengmah vakachii vaang, achuw yngkheh aenche yndingsae.

¹⁹Changvakonchu Thangnang ing amanden ynsuwh nave apha aasenru ing ki thengva kata, changlaenche ynding mee ae enchong chumahka enruwreng manghuwva kata.

²⁰Akhae-chuve Thangnang iruwng lipah chuve chong ing mahva, changvakonchu ruwreng ingva.

²¹Nenuw ynchii nengadikva? Ki ing neningna rumor thoh ynruw ing changmahka ningsiih ing vokhehkho iduwrjaeh laetha thohche thengkate?