Read Moyon Naga 1 KORINTHIA 7 Bible Online

1 KORINTHIA 7 - Moyon Naga bible

1 KORINTHIA 7

¹Atarae nenuw ing nenvebaziih chongla khaena chembe, mee ing rakhii iniimah ing sakna.

²Changvakonchu naamak itu om inem khaenache pasar chaap arumeesah omrasiing; amanche rupanuw chaap afhuwsarsah omrassing.

³Fhuwsar ing arumee taklina nong tuvachiichu turasiing, amanche rumee ichenkho afhuwsar taklinache aanghakjaeh ing turasiing.

⁴Rupanuw ing ataksah ahakchaang pangchu aafhuw mahva, changvakonchu afhuwsar chukho ynvaeva; amavaangche fhuwsar inchenkho ataksah ahakchaang pangchu aafhuw mahva, changvakon-chu arumee chukho ynvaeva.

⁵Nenuw nentaksah ing thaemin hitanuwka vokhehkho ithamnii khaena apha yngkheh manaenuwna, amomgpang khaena nenuw ing nengaanrunii mahnaka nenuw yndahnii mahruw; amanche nentaksah ing nenduur-chehmah khaena nentakchu umlae ing ymbatheem chehniimah ing nenuw athar vokheh onghakruw.

⁶Ki ing kariir havi chonghak mahva, irunii khaenache kariirsahva.

⁷Changvakonchu mee vakhae ing ki vaange ichiichu kaadiknah, changva-konchu mee yngkheh kheh ing Thangnang tanii kikthuur adeensa, mee yngkheh inche havi khaena, reentaang yngkheh inche reentaang yngkheh kikthuur amachu adeensa.

⁸Atarae ki ing rakhii iniimah aere muwkhuwnuw ae ningna kariirnah, nenuw ing ki vaange rakhii niiru ing ong inche nengkhaena sakseh vaata.

⁹Changvakonchu nenuw ing nemandenchu duurchehmah tanuwve, rakhiichu niiruw. Mi ichuwh thoh ynchim ing nenbarungriirna mandenva nenchii changve rakhii inii inche saksehna.

¹⁰Changvakonchu rakhii iniimah ae ningna ki ing chonghak kapeehnah; ki kataksah tanii mahva changvakonchu Aafhuw taniiva: rupanuw inche afhuwsar ynsaefhuwmah rasiing;

¹¹ama ing ynsaefhuw nave, atak rakhii niiru ing ongrasiing, changmahka afhuwsar thoh athar aanruniichu turasiing, amanche afhuwsar inchen-kho arumeechu ynsaefhuwmah rasiing.

¹²Reentaang reentaang ae ningna ki ing kariirnah, Aafhuw tanii mahva, achuw yngkheh unae ing arumeechu athacha omah mee naka arumee inche ipaarhakchu runave, ama ing arumeechu ynsaefhuwmah rasiing.

¹³Amanche achuw yngkheh rupanuw ing afhuwsar inche athacha omah mee naka, afhuwsar inche ipaarhakchu runave, rupanuw inche afhuwsarchu ynsaefhuwmah rasiing.

¹⁴Yngkhaena ynchii imbe athacha omah fhuwsarchu arumee thacha ajaarnache Thangnang ing amanthiingpa, vokhehkho thacha omah rumeechu afhuwsar ajaar nache amanthiingpa; amachumah nave ensitichu manthiing mahnii ae, changvakonchu amachu vanave ensiti aechu manthiingsae.

¹⁵Changvakonchu athacha omah mee inche ynsaefhuw ningka tanave ynsaefhuw tahrasiing, kauw kanae ynreehmah, kasar kajuwr ynreehmah, changche ichii nachembe Thangnang ing aphuwp ae dernache ongmahsae. Thangnang ing inuwchu idae ing ipaarnii khaenache yngeenva.

¹⁶Rupanuw, nang ing nafhuwsarchu karchehva kata karcheh mahning ichiichu ynsaangkhe namanghuwse? Vokhehkho fhuwsar nang incha narumeechu karchehva kata karcheh mahning ichiichu ynsaangkhe namanghuwse? Thangnang ing yngeen inuwzii ing paarruw.

¹⁷Thangnang ing mee yngkheh kheh ningna kikthuur pika vokhehkho a-een inuwzii inche sirasiing. Ki ing ruwrthiing vakhae chaapna changche ichii ing kamansirpae.

¹⁸Vinchiip vasah achuw yngkheh meechu a-eenva? Ama vinchiipmah mee ynsuwhmah rasiing. Vinchiipmah achuw yngkheh meechu a-eenva? Ama vinchiipmah inche ongrasiing.

¹⁹Vinchiip kho yntanga mahva, vinchiip mahkho yntanga mahva, changvakonchu Thangnang chonghak ingah chuva.

²⁰Thangnang ing yngeen anong nakhe ongjaehtah ae rasiing.

²¹Nang ing meesuwh ing naonglae yngeenva? Ama khaena jamahra, changvakonchu nang ing ruwkuwrjoh phataniive, amachu tuniira.

²²Akhaechuve meesuwh ing aonglae Aafhuw nongting a-een meechu Thangnang ningtanii ruwkuwrjoh mee chuva; amavaangche ruwkuwrjoh aphavasah ing a-een meechu Jesu Khrista ameenae chuva.

²³Nenuwchu amen ing eeriipa; meesuwh inche ongmahruw.

²⁴Kauw kanae ae, atakchu a-eenpeeh raennii vaangkhe, mee vakhae ing Thangnang thohche ongjaeh rasiing.

²⁵Atii rakhii iniimah ae khaena ki ing Aafhuw chonghak phamah ing, changvakonchu Aafhuw Thangnang tanii tungsiih aphavasah thachafhuw om mee yngkheh vaangkhe, ki ing kamandenchu kariirsahva.

²⁶Chukhaenache inuw yntaklina om ijachaam khaena chembe havi sakna, amachuve, nang ing ongsahjaeh vataniive ongsajaeh tahra.

²⁷Nangchu rakhii iniivasah vachii? Ynsaenii jongmah. Nangchu rakhii iniimahri vachii? Rakhiinii khaena jongmah.

²⁸Changvakonchu nang ing rakhii niitaniive isii omah, amanche lunghah ing rakhii niinave ataklina isii omah. Changvakonchu changchii ae inge hakchaang tingche ijachaam phavaatae, ki ing nenuwchu havi tanii karpeeh ningchuwka kachiinah.

²⁹Kauw kanae ae, ki ing havi kariirnii ichuve: Apha i hunganeengsa; atiive arumee om ae inche omah vaangkhe ta ae rasiing;

³⁰ichap ae inche ichapmah vaang, rotharoh ae inche rotharoh mahvaang ta ae rasiing; amanche peeh aarii mee ae inche enrutumsah isiihfhuw engariimah vaang ing ta ae rasiing;

³¹Laaruw paam tanii peehchae asichinnii ae inche ama ing abarungriir amanruwh dehmah vaangkhe ta ae rasiing, akhaechuve atarae om laaruw paam i seehpak mahnii.

³²Nenuw nenbarungriir fhuwm bavaeru ing ongchu ki ing kaadiknah. Rakhii iniimah mee inche Aafhuw chu ynsaangkhe manpensa kate taka Aafhuw nongchu itunii khaena amandennah.

³³Changvakonchu rakhii iniivasa mee inche arumeechu ynsaangkhe manpen kate taka laaruw paam peehting abarungriir aman-ruwhnah;

³⁴vokhehkho abarungriir ynnii suwhna amanche rakhii iniimah rupanuw re lunghah inchenkho, ynsaangkhe hakchaang nakho, laetha nakho ynthiingnii khaena Aafhuw nong khaenache abarungriir amanruwhnah; changvakonchu rakhii iniivasa mee inche afhuwsarchu ynsaangkhe manpen kate taka laaruw paam peehting abarungriir amanruwhnah.

³⁵Havi nenuw ing kaaniiva nenchii khaena kariirva, nentaklina chaang kadumahva, changvakonchu ynsuwhchak ing, vokhehkho nening amurniimah ing Aafhuw nong tutahna nenuw ing barungriir iruwhdeh nenchehnii khaenava.

³⁶Achuw yngkheh ing juwr akhuwvasa lunghah ningna isajaeh ing sichehmah vachii ing omnave rakhiinii ae ing sakvaata, amachu inche isiiting bukmahnii ae.

³⁷Changvakonchu achuw yngkheh ing abarungrirr isajaeh ing mangiircheh naka juwr akhuwvasa sanuwchu isajaeh ing rukuum atupeeh thoh ynruw ing ikhaang chehnave amachu isasehva.

³⁸Amatah nache pasarpa inche lunghah binave saksa, changvakonchu abimah mee ningna chembe athiseh ing saksehna.

³⁹Rakhii iniivasa rupanuw chuve afhuwsar aring raentaang akusi omah; changvakonchu afhuwsarchu thiknave, ama ing amanden achuw yngkheh thohche Khrista rumingna rakhiinii ruvaata.

⁴⁰Changvakonchu kavajeer nachembe rakhii iniireehmah inche akhaena sakseh vaata. Ki ing kakharsahnah, ki Thangnang laetha kadeensa.