Read Moyon Naga 1 KORINTHIA 8 Bible Online

1 KORINTHIA 8 - Moyon Naga bible

1 KORINTHIA 8

¹Atarae umlae ruthaksii ting empeeh peehchae khaena chembe, inuw vakhae ing ymmanghuw vasah omna. Ynghuw ichii inge yndingnii suwhna, changvakonchu ningsiih inchembe ynseemnah.

²Achuw yngkheh mee inche kive kamanghuw chirsa tanaka manden nave, ama ing manghuw vachiichu manghuw mahri.

³Changvakonchu achuw yngkheh ing Thangnang chu aning mansiih nave, ama meechu Aafhuw inche amanghuwsa.

⁴Chukhaenache umlae ruthaksii ting empeeh peeh isah khaena chembe, lae ruthaksii inge laaruw paamna yntanga mahva ichii amamdangniisa; inuw ing Thangnang yngkhehpang mahnaka reentaang omah ichii ymmanghuwsa.

⁵Akhaechuve thangbaenna chang-mahka laaruw paamna lae aechu omkhang ae nare, havi vaange lae inempak amanche aafhuw inempak omna,

⁶changvakonchu ynningna chembe apa Thangnang yngkhehpang omna; Aafhuw ningtanii peeh aang-khenglaang isuwh chirva amanche inuw chuve Aafhuw khaena omvamuw; amanche Aafhuw yngkhehpang Jesu Khrista chu omna, ama ajaarnache peeh aangkhenglaang re inuw i omvamuw.

⁷Changvakonchu ynghuw ichii ive mee aangkhenglaang ningna omah. Achuw yngkheh chuve ataraen phanii ing anunu ing lae ruthaksii irum barungriir aomjaeh tahna lae ruthaksii ting empeeh vasah peehvaang ensahnah; amanche ichum ynraar ynghuwchehnii enruthuwh-chu suurka, isahfhuw ensah inche manthiing mahsung ichii ing emandenpa.

⁸Isahfhuw peeh inche inuwchu Thangnang thoh ynneengnii mahva, inuw ing samahkhang manuwre yntanga maangmahmuw, sakhang manuwre athiseh ing isaseh khommahva.

⁹Chukhaenache nenuw ing nentu nenricheh havi inge isuur ae ningna khi mansiinii ynsuwhkho arusa tanuwna ynriimsaruw.

¹⁰Amachuve, lae ruthaksii eenna achuw yngkheh ing thaemin nasahrae imunave, barungriir isuur mee ningnache lae ruthaksii ting ympi vasah peehchu isahnii khaena athiseh ing ynjakniimah niikhang?

¹¹Amatah nache nauw nanae khaena Khrista ithiichu namanghuw natu nari inge namamaangpa.

¹²Jinge ichii ing unae ae taklina isii tuchuwka amanche enuw ing ichum ynraar manghuwchehnii enruthuwhchu mansuh chuwka nenuw ing Khrista taklina isii nentupa.

¹³Ama khaenache isahnii peeh inche kauw kanae aechu khi mansiinii vachii vanave, kauw kanae aechu khi mansiiniimah ing, ki athar vokheh sha supsa samahning.