Read Moyon Naga 1 KORINTHIA 9 Bible Online

1 KORINTHIA 9 - Moyon Naga bible

1 KORINTHIA 9

¹Ki ruwkuwrjoh meemah ping-khang? Ki chongthang mah pingkhang? Ki Aafhuw Jesu Khrista chu kamu vasah meemah pingkhang? Nenuw i kanongtu aanla chumah vachuwkhang?

²Reentaang ae ningna chongthang ynsuwhmah khangningle, neningna chembe chongthang churap-ping; chukhaenache nenuw ing Aafhuw thoh yngkhehpang ing omchuw inge, ki i chongthang ning ichiichu nemandangsa.

³Kataklina chaang yngen mee ae ningna kaangahsahnii ing havi kariirva.

⁴Kenuwcha isahnii innii khaena kencheh omah vakhang?

⁵Reentaang chongthang ae amanche Aafhuw anae ae vokhehkho Pitar, enuw ae vaang kikho karumee thoh ynruwhak kacheh mahva?

⁶Changmahka Ki re Barnabas kenuwkho kenringnii khaena nong itu kencheh mahva?

⁷Achuw inche ataksah lerchii ing laarchang nong atu omkhang? Vomrip phinka aanla asahmah achuw omchakne?

⁸Ki ing laaruw mee nunu inche hava vakhae i ichong pingkhang? Havi vajeer chonghak ingkho ariirmah vakhang?

⁹Havi Mosi vajeer chonghak nache ynziih vasahva, “Siircharchu shaang namanchaniirae anerku iphuwp sakmahnii.” Thangnang ing siirchar khaena akhar vakhang?

¹⁰Havi inuw yngkhaena atatak ing ariirmah vakhang? Inuw vakhae khaena havi abaziihva, akhaechuve ruwrae aatu vokhehkho aakuum inche sarup phava kachiiva ichii manden naka shaangchu ruwpva chiiva.

¹¹Kenuw ing neningna laetha tanii amuw vornungka, neningtanii ikanii phafhuw kuum nungve, amachu iruwpak nong vakhang?

¹²Reentaang ae rap ingkho nening tanii iphafhuw emanden raenche, kenuw inche thihakmah nungkhang! Changchii ruwrengchu chimah ung, changvakonchu Khrista tanii isa chong khaenache parden aomniimah ing aangkhenglaangna kengkhaangsahva.

¹³Rumniieenna nong atuae inche rumniieen tanii ensahfhuw emphanah vokhehkho thiimkungna ipeehfhuw apeeh mee inche sarup topoh aphanah ichii nenuw ing nemanghuwsa.

¹⁴Amavaange isa chong aatong mee aechu enong entunii nache enringniichu phava chiipae ichiichu Aafhuw ingkho ajeerpa.

¹⁵Changvakonchu ki ing havana enunu vakhae havi manjiimah ing, ki ing sarup iphanii khaena chong havi kabaziih mahva. Achuw mee yngkheh ing karuungniichu ikaniimah ting abasuw ynthong vaniive, ki kakhaena chembe ithii ing sakna.

¹⁶Ki ing isa chong katongtahna, karuungsahnii yntanga omah; akhae-chuve kataklina itumah arumah ing imanderka omna; Chumna ki isa chongchu tongmah ningve, kakhaena chembe ijaniisapa!

¹⁷Kadiksah ing kanongchu tuningve iphafhuw nongmen omna, changvakonchu katufhuwrem nongva ichii ing katuva, akhaechuve Thangnang ing kaningna hava nongruw i ymmansirpa.

¹⁸Amana chembe kaphafhuw kanongmenchu ynchiiva? Isa chong katong tahna, amen omah ing katongnii inche, vokhehkho isa chong nong katu khaena iphapham isuwh jongru ing katuva.

¹⁹Ki mee vakhae tanii ruwkuwrjoh mee vakhangningle, mee aechu athiseh ing ikhuumnii khaena katak i mee vakhae meenae ynsuwhsahping.

²⁰Jehudi aechu kavaraam chehnii khaena, ki ing Jehudi ae kaarna enuw vaangche ong ing; vajeer chonghak derna ong aechu ikhuumnii khaena kataksahchu vajeer chonghak derna ongmah khangningle, vajeer chonghak derna ong ae ningnache vajeer chong-hak derna ong vaang ongning.

²¹Havi vaange ki ing reentaang mee ae kaarna nong katurae, reentaang mee ae vaang ing ong ing, akhaechuve enuwchu ikhuumnii khaena chenva. Havana katu kari inge Thangnang chonghakchu kamanjiimah mahva, changvakonchu atatak ing kataksah i Khrista dernache ongping.

²²Ki ing isuur mee aechu kakhuum chehnii ae khaena isuur ae ningna isuur ynsuwhping; kachehsah ruwreng inche mee topoh ae bahamve ikarpeehnii khaenache aangkheng tachu ynsuwh-sing.

²³Hava vakhae katu i isa chong khaena katuva amana chembe nenuw thohche sarup phahak vakata.

²⁴Itaen yntaarnii ae ing engkheng taen aeka mee yngkhehpang ing nongmen aphavatah. Chukhaenache nenuw nongmen aphanii inche taenruw.

²⁵Itaen yntaarniina achehnii ing atuther mee chaap ing ataksahchu aangkhenglaangna achehnii ing atunah. Changvakonchu enuw inchembe maangvachii phurchiichu iphanii khaena taennae, inuw chuve maangmahdeh vachii phurchiichu iphanii khaena taenmanuw.

²⁶Chu-khaenache ki ing achinii ipha ing itaenping ichii ynghuwmah tumah ing, ikanii mahna siiraangchu sukmah ing;

²⁷changvakonchu ki ing mee reentaang ae ningna isa chong tongningka, kataksah rapkho matik ichamah ynsuwh ingkho arusa ta ingka kahakchaang sahchu manpir ingka kachehnii ing katusahnah.