Read Moyon Naga 2 KORINTHIA 1 Bible Online

2 KORINTHIA 1 - Moyon Naga bible

2 KORINTHIA 1

¹Thangnang ing amandenna Jesu Khrista chongthang ivi Pol ki ing vokhehkho unae Timothi ing, Akhaia na ong ynthiing ae aangkheng thoh ynruw ing Korinthia na om ruwrthiing neningna:

²Inuw vakhae Apa Thangnang re Aafhuw Jesu Khrista inche tungsiih re idaechu ympeeh ynsuwhrasii.

³Aafhuw Jesu Khrista ampa re ningchuwh ing isip Thangnang vokhehkho aangkhengna barungriir amanungae Thangnang chu manpah-sataruw.

⁴Ama ing kenjaanii vakhaena barungriir amanungae ajaarnache, kenuw ingkho ijachaam apha mee ae ningna barungriir amanungaepeeh chehnii khaenache, Thangnang ing kenuwchu kenbarungriir amanungaepa.

⁵Khrista khaena ijachaam kentaklina ihungnem sehseh vaange, barungriir bathaenii chukho Khrista ajaarnache keningna hungnemna.

⁶Kenuw ing ijachaam phanungve, nenbarungriir bathaepeehnii vo-khehkho manlaenpeeh phanii khaenava; amanche kenbarungriirchu manungaenave, nenbarungriirchu bathaepeehnii khaenava; amanche kenuw ing ijachaam kengkhaang churap nenuw ingkho ikhaangchehnii ympiva.

⁷Chukhaenache kenuw ing neningna ningmanden kemangomchu ynlaapmahdeh, yngkhaena ynchii imbe kenuw ing kemanghuwsa amachuve, nenuw ing ijachaam nache sarup nenjapoh vaangkhe, kenuw ing barungriir bathaenii kemphasah nachenkho sarup ijapeehruw.

⁸Kenuw ing Asia sungna ijachaam kemphachu, kauw kanae nenuw ing ynghuwmah idikmah ung amachuve, kenruthen ifhuwr athi ing athiseh irik inche kentaklina iderka ringva kenta ichii phanii ing mandensamah ung.

⁹Kenuw thikva kenchii phanii ing ijachaam kenphachu kenbarungriir ing kenrusahva, amana chembe kentaksahna yndiiru ing, ithii aechu amanring Thangnang ningnache kengaandiinii khaenava.

¹⁰Aafhuw inche kenuwchu ichiisuwhpak ithiinii tanii yngkarpa vokhehkho ikarrem vaata; kenuw ing athar akarrem vaata ta ungka aningnache ningmanden kemangomsa,

¹¹amanche nenuw ingkho kengkhaenache ithamsahna ymbom sachuw. chukhaenache mee aajaeh ing kengkhaena ynthampeeh aechu basang vaata, vokhehkho Thangnang inche bor ipivaata; amanche mee aajaeh ing aning tingche iruur yndang ing kengkhaenache manpah vaatae.

¹²Kenuw kengaandingniichu haviva: Kenuw ing ichum ynraar yng-huwchehnii kenruwthuwh ing saarkhii kempeehsa, amachuve barungriir ynthiing ing vokhehkho Thangnang yndentahna barungriir iseeng ing, laaruw paam mee ae tanii ising iveer ing mahka, Thangnang tungsiih ruwreng ing laaruw paamne athiseh ing neningting ichum inche isisahpung.

¹³Kenuw ing neningna pacheh mahva nenchii vokhehkho manghuw chehmah vanenchii yntangakho baziihmah ung. Atiive achinii phanii ing manghuwva nenta ta ingka ireep ing kamandennah.

¹⁴Nenuw ing ataraenbe kenuw i topoh chuve ymmanghuw sachuw; changvakonchu iseengkiir ing ihemanghuw vanenta ichii ing kamandensahnah, amana chembe kenuw ing nenta ynsuwh vaang unge, Jesu Khrista aanii nache kenruungniichu nenuw ynsuwhva nenta.

¹⁵Kabarung ingam khaena nenuw ing voniimeh bor nenphanii khaenache amaensana neningna thengning kachiisahva.

¹⁶Yngkhaena ynchii imbe neningna basen naka Mesidonia ting siningka athar Mesidonia tanii nening tingche hunganrireeh ningka, Judia phanii inche nenuw ing lamna ivethak tanuwka ichii ing kamandensahva.

¹⁷Chukhaenache kamandenchu reepmahri ing ichii kamandangniiva? Changmahka kamandenchu karuse rumah ing kachiiniiva changmahka kataksah ing karu inuwzii ing kamandenva?

¹⁸Changvakonchu Thangnang chuve thachafhuw vakhaka, neningting kenchong chuve kenrusa rumah ung ichii chumahva.

¹⁹Thangnang sapa Jesu Khrista khaena nening nache Silas re Timothi vokhehkho kataksahrap ynvae ing kenvatong Aafhuw chu karusa, rumah ing ichiimahva, Changvakonchu Thang-nang ningna chembe karusa ichii chuva;

²⁰Thangnang ningna chongreep chaap chuve karusa ichii chuva. Havi khaenava Thangnang ympahnii khaena asapa ajaarna Amen ichii isuwhchu.

²¹Atii Khrista ningnache kenuw re nenuwchu yngkhehpang ymbasuw vokhehkho ningsiihnii richiithou eetaehchu Thangnang chuva.

²²Aafhuw ama ingkho inuwchu ahak inamka vokhehkho inuw yngkhaena ynsiihpeehchu ynthiing laetha ing ymbarungriir nachenkho saarkhii atupa.

²³Changvakonchu athurfhuw ing nenuwchu rukuh ningchuwka nenja-niimah khaena Korinthia na ki vanuh thengsamah ing ichiichu kalaetha taklina saarkhii aomnii ing Thangnang chu ka-eensahva.

²⁴Kenuw ing nenthacha taklina aafhuw ynsuwhnii khaena mahva, changvakonchu ibomnii khaenache nongtuhak mee chupung, yngkhaena ynchii imbe nenuw thacha nache ngiirnachuw.