Read Moyon Naga 2 KORINTHIA 10 Bible Online

2 KORINTHIA 10 - Moyon Naga bible

2 KORINTHIA 10

¹Ki ing nenuw thoh kaonglae nengkaarna ynjuursah ing, changvakonchu yngonghakmah raen-che neningting kabarungriir iruwh ing kamandensahchuw Pol ki ing, Khrista barungriir idim vokhehkho iduwr ajaarna kathamsahnahchuw.

²Kenuwchu hakchaang manden inuwzii ing isipae ita aeka emanden mee topoh ae taklina, thona mandang kata ta ingka kamanreep thoh ynruw ing thonachu kaningna aomlaenche, kamandangniimah ing neningna kariirsahnah.

³Kenuw hakchaang manden inuwzii ing sikhang nungre, hakchaang manden inuwzii ing laar tukmah ung.

⁴Kenlaar tuknii laangchem chuve hakchaang tanii mahva, changvakonchu ipirpak bang phanii ing abakhiichehnii Thangnang ningna laar chehnii ruwrengchu omna,

⁵aangkheng vokhehkho Thangnang losing jeehnii aeka iruungsah ae yngkaangpak nong aangkhengchu kenuw ing namaang ungka, barungriir aangkhengchu Khrista chongriir ynjii phaniipha ing kenhenreensa.

⁶Vokhehkho nentaklina om chongriir ynjiinii barungriir amakha mapung ahenpharaenche, chongriir ynjiimah aangkhengchu ponti pinii kenthoraang omna.

⁷Nenuw ing nemaana om peeh chupang nengennah. Achuw mee yngkheh ing Khrista meeping tanaka ataksah pangchu ynthacha sanave, ataksah ing athar vakhar turasiing, ama ing Khrista mee ynsuwh vaang, kenuw chukhompung.

⁸Kenuw ing kentu kenrine ruungniisakhang nungkho, nenuwchu iseemnii khaena Aafhuw ing aatuaricheh ympiva, nenuwchu aansehnii khaena mahva, ki utaraenkho ningjak phamahning.

⁹Kabaziih vasah ae chongthen ingkhe nenuwchu kamanchiihnii vachuwvaang nemandenniimah ing havi kariirva.

¹⁰Enuw ing enriirnah, ama achongthen ynziih vakhae i rikna vokhehkho pirna, changvakonchu atak ynvae inchembe suurna, vokhehkho achongriir i yntanga khommahva.

¹¹Changchii mee aenche manghuw aerasii amachuve, kengongmah raenkho amanche nenuw thoh kengongtah nakho tuva kenchii chuve, kembaziih chongthen havi thoh yngkhehpang vatah.

¹²Kenuw chuve achuw yngkheh ataksahpang ympahsah mee ae thohche ruwr yngkhae vokhehkho yndeengnii khaena thona omah ung, changvakonchu enuw chuve enareersahna yngkheh re yngkheh emanghuwchu uur aeka vokhehkho yndeengniisah ae; enuw ichuve ising mahpae.

¹³Changvakonchu kenuw chuve nenuw phanii ing vaphanii Thangnang ing auur chumahnaka, lamrii aaraenjop ing kenuw ruungnii mahnung.

¹⁴Akhaechuve ama lamrii inae sungnache nenuw ynvaevachuw khaka, kenuw ing lamriichu iraenru ing Khrista isa chongchu vereen ungka nening nache ivathengpung.

¹⁵Kenuw ing arii aaraen ing reentaang ae nong nache ruungniimah ung; changvakonchu nenthachachu henthisehseh naka, kenuw ing nengkaar nache iruungpak nong itu phasava kenta ichii ing kemandensahnah.

¹⁶Chukhaenache kenuw ing nenuw veraen nungchuwka isa chongchu tongnungka, vokhehkho mee reentaang ae nong ichivasah nache ruungnii samahnung.

¹⁷Chang-vakonchu iruungsah ama inche Aafhuw khaenache ruungsarasii.

¹⁸Ataksahpang ympahsah meechu rupeehmahnii, Aafhuw ing amanpah meechu rupeeh vaata.