Read Moyon Naga 2 KORINTHIA 11 Bible Online

2 KORINTHIA 11 - Moyon Naga bible

2 KORINTHIA 11

¹Ki kapangniisah topoh aom-tahna, nenuw ing kataklina ikhaangpeeh kaadiksanah. Nenuw atatak ing ikhaangpeeh saruw,

²Thangnang ing kallak vaang, kikho nengkhaena kallakping; nenuw i ynthiingjaeh rupanuw pasar yngkheh thoh rakhiinii khaena ki ing chongreep katu thoh aanghak vachuw, amachuve Khrista chuva.

³Changvakonchu baruwr ingkhe Eve ningna amanchae khavaang, laanglam Khrista ningna nenbarungriir ingiir vasah nakhe vokhehkho ynthiing vasah tanii ymbathiih arusa ichii khaena ki ynchikning.

⁴Neningna ivatheng mee ing kenuw ing kentongmah reentaang Jesu tongnave, changmahka nenuw ing nensiimahri reentaang isa chong ritanuwve, ama dernache nenuw ongvachuw!

⁵Ki chuve Khrista chongthang ae kaarna masak inae yngkhehping vokhehkho yntuurmahdeh ing ichii kataksah ing yngkharning.

⁶Changva-konchu ki ing ichong tahna ihaesamah iveer samah vakhang ningle ynghuwmah changchiimah dehping; changvakonchu aangkhenglaangna apha vakhaena kenuw ing havi neningna kemandangsahva.

⁷Ki ing neningna ngareh ing Thang-nang isa chong katong inge, nenuw ahungruungnii khaenache kataksahchu ynsiingsah ingka ki isii katupe?

⁸Ki ing nening nache nong tunii khaena reentaang ruwrthiing ae tanii ruthamen ri ingka enuwchu kasiihpe?

⁹vokhehkho ki nenuw thoh onghak ingka kavaeh raenche, achuw yngkheh peeh rikniichu ki ynsuwhmahdeh ing; Mesidonia tanii itheng unae aenche kavaehnii aangkhengchu ympipeehsah ae; vokhehkho neningna peeh riknii omvachii tanii chaap kataksahna yndiisahping, vokhehkho kataksahna yndiisava kata.

¹⁰Ichum Khrista chu kaningna om khaena, Akhaia paam nache karuungsahnii khaena eekhaam omahnii.

¹¹Ynchii khaenava? Ki ing nenuwchu kaning kamansiih mahchuw khaenava? Kaning kamansiih chuwchu Thangnang ing amanghuwsa.

¹²Changvakonchu reentaang chongthang aeng enong tunache enruungniimah khaenache, ki ing katu karichu itukho tuvakata.

¹³Hangchii mee ae ichuve ichummah chong areen, ichummah nong entu, Khrista chong-thang aethoh entaksah ing emanchim mee chupae.

¹⁴Havi ingiknii mahva, amachuve umlae ingkho ataksahchu ireng vaarmee aethoh aanghaknii ing atuchehnah.

¹⁵Chukhaenache ama anong atu mee aenche entaksahchu ichum ynthiing nong atuae thoh aanghakvaang takhang ae nare, amachu iruungpak chongmahva; engkhaena achiniideh chuve entaksah enongtu inuwzii ing vaata.

¹⁶Ki ing athar kariirnah, achuw mee yngkhehpang ingkho kichu ipangva ichii ing irimah rasiing; changche ichii ing rinave, ki ingkho topoh karuungnii inche, ipang vaangche kichu eeraangsaruw.

¹⁷Ki ing kariir chong havi Aafhuw ing amanden inuwzii ing ichong mahping, changvakonchu ipang ing iruungsahnii khaena, icheep ing kathacha ajaar inche ichongping.

¹⁸Mee aanem ing hakchaang inuwzii ing iruungsah ae khaena, ki ingkho iruungsahping.

¹⁹Nenuwve ising iveer vachuw khaka, ipang aechu rotharoh ing nenbajuum chehsa.

²⁰Achuw yngkheh ing nenuwchu suwh ibasuw nave, achuw yngkheh ing nenuwchu isuwr nave, achuw yngkheh ing nenuwchu chaangna imangu nave, achuw yngkheh ing ataksah ing ruungsa nave, achuw yngkheh ing nemaena eebeeng nave, nenuw ing changchii mee aechu nengahpeeh chehnah.

²¹Kenuw ing suurnung kenchii vaang, kataksah ing ningjak ympisa ingka ichongping. Changvarap khangnare achuw yngkheh ing ynchii yngkhehna ruungniinave (ipang ing ichongping) kikho ruungniining.

²²Enuw Hebreeu chupae? Ki khomping. Enuw Isrel ae chupae? Ki khomping. Enuw Abraham tuti ae chupae? Ki khomping.

²³Enuw Khrista nongtu meenae chupae? (Ki kataksah ing ynveehvaang chongning) Enuwchu inempak ki ing kathisae; nongtu nakho inempak kathisae, kaeshumna ong inempak kathisae, rumor isahna masing naemah, ithii phanii ing phava kachii nemna.

²⁴Jehudi ae ningtanii rumorbuw somanriina yngkheh ita ing varungameh kaaraang.

²⁵Rumor ing kichu vathumchak manvarpae, athar rung ing yndeengpae, vathummeh ruwkuwng ikiichu kaantuwhfhuwpa, jaenkheh siimkheh chifhuw sungna ijachaam kapha.

²⁶Kasi katungnii aajaehna, chii iriim vokhehkho lamruw ae tanii ichiisuwh, kalipah khaena mee ae tanii ichiisuwh, reentaang mee ae tanii ichiisuwh, khuwruung sungna ichiisuwh, lamrakna ichiisuwh, chifhuw tanii ichiisuwh, ichummah mee ae kaarna ichiisuwh,

²⁷ipir ing nong itu vokhehkho ijachaam aajaeh kakhaang; ympehrudeh ing kakhaang nache, venchaam chiilaar nache, maaru itongchak nache, pharbuw isik kaarnache vokhehkho isingfhuw peen ivaeh nache ibusah ing.

²⁸Amanche reentaang riirrudeh ing, athiseh ing ruwrthiing aangkhenglaang khaena ningsa ithi ing anasiir kataklina iderka omna.

²⁹Achuw yngkheh suurnii nache kikho isuurmah pingkhang? Achuw yngkheh ijachaam nache kikho ama khaena mi isuwh ing kakhaangmah vakhang?

³⁰Ki ing ruungsa ningve, kavaehnii aanem khaenache ki ruungsava kata.

³¹Aafhuw Jesu Thangnang kho ampa kho ynsuwh, ichen naemah ing manpah vaanchii Aafhuw inche, ki mare tumahdeh ing ichii ymmanghuwpeehsa.

³²Ki ing Damaskas na kaonglaenche, iruwng Aretas derna lipah aapuh inche kichu isuwrnii khaena khuwruungchu aarung mee asiih.

³³Changvakonchu bukaang nache katakchu ithin aeka bang ihuk nache ibabuw aeka iring kapha.