Read Moyon Naga 2 KORINTHIA 12 Bible Online

2 KORINTHIA 12 - Moyon Naga bible

2 KORINTHIA 12

¹Ikaanii omahkhang nare, ki ing ruungsava kachiiting bukna; changvakonchu Aafhuw ing ympeeh ruvaam re amandang aanemchu ki ing riirsava kata.

²Kumsuum ariimanrii aphapa, ki ing Khrista ningna yndii mee yngkheh kamanghuwsa (Hakchaang ynvaeva ynvaemahva ki manghuwmah ing, Thangnang ing amanghuwsa), hangchii mee havichu avomanthumnii thangbaen ipha inche vat ajekipa.

³Amanche hangchii mee ichu ki ing kamanghuwsa amachuve, (Hakchaang ynvaeva ynvaemahva ki manghuwmah ing, Thangnang ing amanghuwsa) amachuve hava mee ichu Paradais tingche ajekipa,

⁴amanche mee ing iriir thaangthaang niimah chong ama ing asiipa.

⁵Hangchii mee ae khaena ki ruungniisava kata, changvakonchu kataksah khaena chembe kasuurnii mahnaka ruungniisamah dehning.

⁶Ki ing iruungsah idik ningve, ki ipang ynsuwh mahning, yngkhaena ynchii imbe ki ichumchu chongva kata; changvakonchu achuw yngkheh mee ing imukhangnare, kaningtanii asii vakhangnare, athiseh ing kakhae nache manden vaata ta ingka ynjuursaning.

⁷Vokhehkho kaningna amandang vakhae khaenache kaandingniimah khaena, kahakchaang nache iring ynsinnii yngkheh ympipa, havi katak-sah kaandingniimah inche, akhuning ing eeteenchu umlae vaarmee ynsuwhsa.

⁸Havi khaene kaningtanii aampeennii inche ki ing Aafhuw ningnache vathumchak kaniihsahpa.

⁹Amana Aafhuw inche kaningna ariir, “Katungsiihchu nakhaena ivaehmahdeh ing omna, akhaechuve karuwrengchu isuur mee taklinache amanpirniiva.” Chukhaenache Khrista ruwrengchu kataklina aomnii inche, athiseh ing kasuurnii vakhae nache rotharoh ing yndingniiva kata.

¹⁰Ama khaenache ki ing kasuurnii chaap nache, ruming thinii chaap nache, ijanii chaap nache, ithipak ing kataklina entunii nache, ichir chaap nache kapensahnii ynsuwhsakna; akhaechuve kasuurnii nache karuwreng pirsehna.

¹¹Kataksah ing ipang ymbusing, nenuw ing kichu ipang ymbabupachuw; katak i yntangamah khangningle imanpahva nenchii raprapva, ki chuve Khrista chongthang ae kaarna yntuurlepmah ing.

¹²Atatak ing chongthang nongchu yndangnii khaena, ingiknii vokhehkho laethochu nengkaarna katupa.

¹³Katak i neningna peeh rikniimah ynsuwhniimah naka, reentaang ruwrthiing ae tanii nenuw nensuurnii ynchii omkhang? Hava ynraar khaene kichu ikuhpeehsaruw.

¹⁴Enruw, ki ing neningna kavasinii khaena thoraang katu havi inge avomanthumnii aphapa, amanche ki neningna peehrikniichu ynsuwhsamah ing, havi kariirnii chuve neningtanii iphafhuwchu jongmah dehning kachiiniiva, changvakonchu nenuwchu kajong vachuw; akhaechuve siti ae inche amnuw ampa khaena lerchii ynghuwngpham suwhmah, amnuw ampa inche siti ae khaenache lerchii ynghuwngpham isuwhva.

¹⁵Vokhehkho nenlaetha khaena ki ing kadeenchu aajaehmeh rotharoh ing tingva kate, amanche katakkho itingrap tingva kata. Ki ing nenuwchu hangjaehmeh kaning mansiih ningchuwve, ki ningsiih nache ivaeh reehping?

¹⁶Changvakonchu havi irupeehruw, ki ing nenuwchu losing ing vokhehkho mare tuka ynsuwrva ichii ing amanden mee ynvaenachuw.

¹⁷Ki ing neningna kavechiir achuw yngkheh ajaarnache neningtanii katuungsahnii kaphape?

¹⁸Ki ing Taitas ithohsa ingka amathoh ynruw ing reentaang unae yngkhehchu kachiirpae. Taitas ing nening tanii ynchii yngkheh atuungsahnii aripe? Laetha yngkhehna inuw ing isihakmah muwkhang? Karkhiing yngkhehpangna ikhiinghaknii khaenamah vakhang?

¹⁹Nenuw apha hangsenne kenuw ing nening nache yndiiniipung ichii ing nemandenva, Thangnang mik enna Khrista mee ynsuwh ing ichongpung. Changvakonchu nenuwchu iseemnii khaena aangkhenglaang hunginsuwhsa.

²⁰Ki ynchikning, amachuve laanglam ki ing kathengtahna, ki ing kamanden vaang nenuwchu kaphamah chuwkho arusa, vokhehkho nenuw ing nemanden vaang kikho nenuw ing iphamah arusa; ynnahnii, kallak, thirfhuwr siipak, ataksah khaenapang amanden, thaechii thaenam ichong, meenuw meemahting ichong, ynding, chong suwhnii ynchii yngkheh omkho arusa.

²¹Athar ki ing kathenglae, ka Thangnang ing nentuwr maana kichu ymmanjuur lepkho arusa; amanche athar isii nong tureeh ae naka ki ichap kaphakho arusa ta ingka ynchiksaning.