Read Moyon Naga 2 KORINTHIA 13 Bible Online

2 KORINTHIA 13 - Moyon Naga bible

2 KORINTHIA 13

¹Ki ing neningting vathengva kachii havi inge avomanthumnii vachiiva. Mee ynnii ynthum tanii nerna chong aangkheng saarkhii omvachiiva.

²Amaenna isii atuvasah ae ningna vokhehkho reentaang ae vakhae nakho ki ing ajaenkhe kariirpa, ki ing avomaniina nenuw thoh kaonglaennii vaangkhe, atarae ongmahkhang ningkho, maen ing kariirnah athar vokheh vatheng ningve, enuwchu ki ing karpeehmah aening.

³Khrista ing kabarungriir sungna ichong buwtinniichu nenuw ing nenjongnah; Aafhuw ing utaraenkho nening yntongting suurmahdeh, changvakonchu nenuw nengkaarna ruwrengchu pirjaehna.

⁴Aafhuw chu isuurpak ing khros nache enthehpa, changvakonchu Thangnang ruwreng inche Aafhuw ing hangringsa. Inuwkho Aafhuw thohche suurhak manuw, changvakonchu Thangnang ruwreng inche inuwkho Aafhuw thohche hangringhak vataruw.

⁵Nenuw thacha nache ong vachuw ongmah vachuw ichiichu nentaksah ing ynghuwsaruw, vokhehkho kharsaruw. Changmahka Jesu Khrista chu nenbarungriir sungna omah ichiichu nentaksah inche nemanghuwmah vakhang? Omahnave, nenuwchu ynrumah tahnava.

⁶Chang-vakonchu kenuwchu ynrumah omah ichii nenuw ing manghuwva nenta ta ingka kamandensahnah.

⁷Atarae nenuw ing ynchii tanga isamah nentuniimah ing kenuw ing Thangnang ting kenthamsahnah; havi kenuw ynruchu yndangnii mahka, ynrumah vakhangnare, nenuw inche isachu nentunii khaena chenva.

⁸Kenuw ing ichumchu jeehnii nungka ynchii tangakho itu chehmahnung, changvakonchu ichum khaenache kentusahva.

⁹Akhaechuve kenuw ing kensuur raenche nenuw ing ihungpir chuwchu kenuw atatak ing kenrotha rohna; nenuw nenghungsakniiseh khaena kenuw ing kenthamsahva.

¹⁰Ynsehchirnii khaena mahka, ahen-seemnii khaena Aafhuw ing kaningna aatuaricheh ympipeehsah inuwzii ing, ki ing neningna kaonglaenche ithipak ing yntuniimahchuw ing, kaongmah raenche kavebaziihva.

¹¹Akuurchiimna kauw kanae ae, salaam kajetusahnachuw. Nenlam hemanchumruw, kariir i isiipeehruw, barungriir yngkhehpang ing ompeehruw, idae inche ipaar peehruw, amana chembe Thangnang ningsiih re idae inche nenuwchu eenruwfhuw vaata.

¹²Yngkheh yngkheh ynthiing salaam ynturuw. Khristen vakhae ing nenuwchu salaam ynjetusahnah ae.

¹³Aafhuw Jesu Khrista tungsiih re Thangnang ningsiih vokhehkho anasiirna eenruwfhuw ynthiing laetha inche nenuw vakhaechu eenruwfhuw ynsuwhrasiing. Amen.