Read Moyon Naga 2 KORINTHIA 2 Bible Online

2 KORINTHIA 2 - Moyon Naga bible

2 KORINTHIA 2

¹Ki ing nenuwchu athar ijachaam pinii khaena thengmahning ichii kabarungriir kamangiirpa.

²Akhae-chuve ki ing nenbarungriir manja ningve, ki ing kamanja mee aechu mahnaka, achuw ing kichu ibom savaate?

³Ama khaena neningna chong-then kavebaziih chuve-ki ing neningna katheng raenche, karotha iroh inche nenuw vakhaechu ibomnii ynsuwh vaata ichii ing kabarungriir mangamsa ingka, karotha manrohvachii mee ae ningtanii barungriir ija kaphaniimah ing havana chongthen i kavebaziihva.

⁴Athurfhuw ing inempak ijaacham ing kabarungriir aasum khaenache, ki ing neningna aajaeh richii ynruwm ing kabaziih sahpa; havi nenbarungriir manjanii khaena mahva, changva-konchu kaningsiih nentaklina athiseh ing omchu nemanghuwnii khaenava.

⁵Atii achuw yngkheh mee inche imanja nave, ki chupang ymmanja mahva, changvakonchu (chong ikha ing kamander niimah ing) rakheh yntongting tamanuwve, nenuw vakhae chukho ymmanjava. Havana kariir akhae chuve, ki ing ataklina ipirpak ing chong ningka tamah ing.

⁶Mee aanemhak ing ponti apeeh changchii mee aechu khaena ynsuwh chaksa.

⁷Chukhaenache rakheh yntongting tamanuwve, nenuw ing ama meechu kuhpeeh tanuwka vokhehkho nenbomsah ing sakvaata, changmahnave ama meechu ijachaam inche rupvaata.

⁸Chukhaenache ki ing neningna kariirsahnah, nenuw ing aningna nening nemansiihchu amanghuwnii ing mandangruw.

⁹Ki ing neningna chongthen kavebaziih akhae chuve, nenuw ing aajaehmeh isa ing batheem nache ingiircheh vachuw vokhehkho anasiirna kangiirnii nakhe ngiirnachuw ngiirmahchuw ichii ynghuwnii khaenava.

¹⁰Atiive nenuw ing achuw yngkheh mee ing araarchu kuhpeeh tanuwve, ki ingkho kakuhpeehsa. Yngkhaena ynchii imbe umlae ing yntaklina atuungsah aphaniimah inche, ki ing laanglam kuhpeeh ningve, kakuhpeehchu nengkhaenache Khrista maana kakuhpeehva,

¹¹yngkhaena ynchii imbe umlae ing asirchu inuw ing ymmanghuwsa.

¹²Ki ing Tros nache Khrista isa chongchu itongnii khaena kavatheng tahnache, Aafhuw inche eenkhaar eemongpeehpa.

¹³Changvakonchu kauw kanae Taitas katuwhmah tahnache kabarungriir nache ija basumnii phasamahsing. Chutahnache amana ong mee ae thohche ynsae ungka Mesidonia ting sising.

¹⁴Changvakonchu Thangnang kamanpahsahnah, ama ing ma somka Khrista ajaarnache maepah kemphapa amanche kenjaar nachenkho aphamsiirna Khrista chu ynghuwnii khaenache ningsiihnii barimchu ynsuwhsung.

¹⁵Amachuve ikarpeeh apha mee aere phamahka ymmoh ae kaarnache Khrista barim ningsiihnii Thangnang ningnache ynsuwhsung,

¹⁶amanche ithii tanii ithii barim omna, iring tanii iring barimchu omna. Amana nongruw havi khaena chembe atucheh aricheh meechu achuwva?

¹⁷Kenuw chuve Thangnang chong arimah ae khavaang tamah ung; changvakonchu barungriir ichiimjaeh ing Thangnang mik barengna, Khrista mee yngkheh ynsuwh ing ichongpung.