Read Moyon Naga 2 KORINTHIA 3 Bible Online

2 KORINTHIA 3 - Moyon Naga bible

2 KORINTHIA 3

¹Kenuw kentaksah khaena athar ympahsah kembasenva? Changmahka neningna vakhang nakho, nening tanii vakhang nakho, achuw yngkheh mee aeng entuvaang, kenuw ing ympahnii chongthen inche ikanii kemphase?

²Kembarungriir sungna ynziihka om mee vakhae ing paavachii kendeen chongthenchu nenuw vachuw.

³Muk ing ynziihmahka, iring Aafhuw Thangnang laetha ing ymmanziih, vokhehkho rung taklina mahka, laaruw mee barungriir taklina ynziih Khrista chongthen vachuw ichiichu kamandangnii vachuw.

⁴Kenuw ing kenriir havi akhae chuve Khrista jaarna Thangnang ningnache kenbarungriir kemangam khaenava.

⁵Nong havi kentaksah ing kentuchehnii kentaklina yntanga omah. Kentuchehchu Thangnang tanii kemphava.

⁶Aafhuw inche ithar chongiirchu amanpir mee ynsuwhnii khaena inuwchu ynseemva, havi vajeer chonghak ynziih tanii mahva, changva-konchu laetha taniiva. Ynziih vajeer chonghak inche ithii ahenreenva, changvakonchu laetha inchembe iringnii ympiva.

⁷Rung nache vajeer chonghak ynziih ing ynghaksa, vokhehkho amachu apeeh raenche Thangnang alaar isa yndang. Mosi mae irengchu maang-vachii vakhangnare inempak ipir khaena, Isrel mee aenche aningnache encheh mahsae. Ithii ahenreen vajeer chonghakchu ruwreng aomlaenche hangchii alaar isa thohne thengnave,

⁸laetha nongruw alaar isa inche aajaehmeh athiseh ing ruungseh vaate!

⁹Maangvachii nongruw inche alaar isa omnave, manlaenpeeh ahenreen nongruw inche aajaehmeh alaar isa omseh vaate!

¹⁰Inuw ing iriir arusa amachuve alaar isa om ireng inche ahungom tahnache, atii isivasahna alaar isa ompak irengchu omahsa.

¹¹Chukhaenache maangvachiichu alaar isa omnave, maangrudeh ing chitha paarvachii alaar isa inche aajaehmeh thivaate.

¹²Keningna ningmanden havi om khaenache, kenthona inempak isava.

¹³Kenuw chuve Isrel mee ae ing maangvachii vokhehkho omahvachii Mosi mae yngkhum nache engen thohche aanghakmah ung.

¹⁴Enuw envakharchu atatak ing bachaesa; chukhaenache atanii inii ipha ing baruw chongiir ynziihchu empajaeh tahnache mae mangkhum niikha omjaehna, yngkhaena ynchii imbe Khrista ajaarnache ynripeehpa ichii eningna manthangmahri.

¹⁵Chu-khaenache atanii ipha ing Mosi vajeer chonghakchu empa raenche mae mangkhumnii inche embarungriir yngkhum jaehna.

¹⁶Changvakonchu enuw ing Aafhuw ningtingche emba-rungriir enghenpeeh raenche, mae mangkhumniichu phaenpeeh vaatae.

¹⁷Aafhuw chuve laethava amanche Aafhuw laetha ongnii nache ruwkuwr-johchu omna.

¹⁸Changvakonchu inuw eengkheng mae mangkhumru ing Aafhuw alaar isachuw vaarthana ymmuvaang, Aafhuw laetha ajaarna ama amaethoh aanghakjaeh ing alaar isa tanii iruungseh alaar isa ting ymmantehpa.