Read Moyon Naga 2 KORINTHIA 6 Bible Online

2 KORINTHIA 6 - Moyon Naga bible

2 KORINTHIA 6

¹Thangnang thoh ynruw ing nong tuhak ungka, nenuw inche Thangnang atungsiihchu ikaniimah ing nenpha aansuwhniimah khaena, kenthamsah nahchuw.

²Chukhaenache rungaeruw Thangnang ing ariirchu: “Ynrupeeh aphane ki ing nenuwchu kasiipeeh pachuw; amanche manlaenpeeh iniine ki ing nenuwchu kabomsah pachuw.” Enruw, ataraene irupeehnii apha chuva; enruw, ataraene manlaen-peehnii inii chuva!

³Kenuw kenongtuna ynraar aomnii-mah ing, vokhehkho laanglam khi mansiinii asuwhniimahdeh inche, Thangnang nong kentuva ichiichu kenong inche aangkhenglaangna kemandangva.

⁴Thangnang meenae yngkheh ynsuwh ing, kenuw ing ajaehmeh ikhaangtahna, ijachaamna, laepah isiinii chaap nache, ichirpak nache,

⁵hebin vebin nache, kaeshumna vanuh vanuh ong kenpha nache, chong suwhnii nache, ijapak ing nong kentu aanem nache, jaarrudeh ing maaru kentong thoche;

⁶ynthiing nache, kemanghuw nache, ningsiih nache, ynthiing laetha nache, ichum ningsiih nache,

⁷ichum chong nache, Thangnang ruwreng thohche; tari tachang nache ichum ynthiing laarchem ajaar inche,

⁸kenuwchu ymmanruung ae vokhehkho ynrathiih ae; amanche ningjakkho ympeeh ae vokhehkho ymmanpah ae, kenuwchu emare vatah ichii ing ynriae, chang-vakonchu ichumchu ichong ung;

⁹Ymmanghuw peeehmah ae mee vakhang nungle, kenuwchu mee vakhae ing ymmanghuwsa; ithii mee ae vaangche takhang nungle enruw, kenuw ringnung; imanjakhang ae nare ithehmah ae,

¹⁰ijachaam phakhang nungle anasiir nache kenrotha rohna; sara mee ae vaang takhang nungle, mee aanem savang kembasuwsa; aadeenmahdeh mee ae vaang takhang nungle, ataraen phanii ing keningnache aangkhenglaang omchirna.

¹¹Kaarang Korinthia mee ae! Neningna kenuw ing ichiimjaeh ing chongnung; kenuw ing kembarungriir barang ungka kemanruungnah.

¹²Kenuw kembarungriir sungna nenuwchu manchirtuwng mahchuwng; changvakonchu nentaksahchu nening nemansiih tahnache nenbarungriir manchir chuwka kenuwchu ynthincheh-mah vachuw.

¹³Atiive ki ing kasiti ae ningna vaang ichong sahping; kenuw ing nengkhaena vakhar kendeen vaange, nenuw ingkho nenvakharchu imansii saruw. Nenbarungriirchu ynjaahak ing ibarang peehruw!

¹⁴Thachamah mee aethoh riingkor reenhak mahruw, akhaechuve ynsaang khenche ichum re ichummahchu ynruwhak vaatae? Ynsaang khenche ireng re ynthimchu onghak vaatae?

¹⁵Ynsaang khenche Khrista re Umlae-chu engaanrunii omne; amanche thacha mee re thachamah meechu ynchii nakhe engaanchum haknii omkhang?

¹⁶Vokhehkho Thangnang rumniieen re ichummah lae ruthaksii aethoh ynchii enganrunii chongpham omkhang? Yngkhaena ynchii imbe nenuw chuve iring Thangnang rumniieen vachuw; Thangnang ing ariirvasah vaang, “Ki ing engkaar nache ongva kata vokhehkho karkhiingva kata; Ki enuw Thangnang ynsuwhva kata, amanche enuw inche kamee ynsuwh vaatae.”

¹⁷Chukhaenache Aafhuw ing ariir, “Nenuw ing enuwchu bathen aeruw vokhehkho eningtanii hungsuwh nuwna asik ing tiingruw, amanche ynthiingmah ynchiitanga parmahdehruw; amanache ki ing nenuwchu iraangva kachuw.

¹⁸Amanache ki ing nenpa ynsuwhva kata, vokhehkho nenuw ing kasapa kasanuw ynsuwhva nenta taka aangkhenglaang Aacheh Aafhuw ing ariirnah.”