Read Moyon Naga 2 KORINTHIA 7 Bible Online

2 KORINTHIA 7 - Moyon Naga bible

2 KORINTHIA 7

¹Chukhaenache kaning kamansiih kauw kanae ae, chongreep vakhae havi ymphasah khaenache, yntaksah ing hakchaang re laethachu ynthiing-mah tanii manthiing samanuwka, Thangnang ichiithoh ynruw ing mapung ipha ing inuw manthiingtaruw.

²Nenuw nenbarungriir sungna kenuwchu ongnii ipisaruw; kenuw ing achuw mee yngkheh taklina raarsamah ung, kenuw ing achuw yngkheh pangkho ijachaam pimah ung, kenuw ing achuw mee yngkheh ningtanii kaaniiva kenchii tusamah ung.

³Ki ing nenuwchu ynraarnii khaena kariirmahva, ithiihak vanakho, iringhak vanakho, kembarungriir sungna nenuw omnachuw ta ingka mamaenna kariirpa.

⁴Nenuw neningtingche ichongnii kataklina thona inempak omna, nengkhaena kaangaenii ompakna, tuning riningka ichii thona inche kaningna bariimka omna, kenjanii aangkheng nache rotharoh ing kaningna bariimka omna.

⁵Kenuw ing Mesidonia nache kenvatheng tahnache ija basumnii omahsa, aphamsiirna ijachaam kempha, mee ae thohche ynna ung, kembarungrriir sungna ynchiknii om.

⁶Changvakonchu yntuursah aechu barungriir amanungaepeeh Aafhuw Thangnang ing Taitas ivatheng ajaarna kenbarungriir abathaepa.

⁷Atak ivathengpang inche kenbarungriir bathaejaeh mahka, aajaehmeh nenuw ing aningna abarungriir nenbathae-peehchu amanthang yachen khomba. Ama ing keningna ariir chuve, nenuw ing kichu aajaehmeh munungka ynchiichuw, aajaehmeh ijasahchuw, kakhaena nenruwthuwh iruwh, ama vakhae inche athar athiseh ing karotha rohsa.

⁸Ki ing nenuwchu kachongthen inge nenbarungriir manja khangningle, ama khaena kaning ichimmah tumah ing; kaning chimmah khangnare chongthen ama ingkhe nenuwchu amongpang khaena vakhangnare nenbarungriir amanjasa ichii kamusahsa.

⁹Atiive nenbarungriir amanjanii khaena mahka, nenbarungriir huungnii ipha ing ijachaam nenpha khaena karotha rohsakna; yngkhaena ynchii imbe nenuw ing keningtanii imaangchu nenphaniimah khaenache, Thangnang ing amanden inuwzii ing nenbarungriir amanjapa.

¹⁰Akhaechuve Thangnang ynden tahna ija inche barungriir huungnii basuwka manlaenpeeh aphanah vokhehkho nungaeniimah yntangakho omah, changvakonchu laaruw paam khaena barungriir ija inche ithiichu aphanah.

¹¹Enruw, Thangnang ynden tahna nenbarungriir ija ama ingkhe neningna hungom chuve, nentaksah aajaeh ynriimchuw, ichuwhmah nongtu tanii nentaksah yncheersahchuw, ichiisuwh ipuwngnii nongtanii, aajaeh nenbarungriir iruwh, huwthungnii aajaeh omna! Hava vakhae taniichaap nenuw manthiing sachuw ichiichu nemandangpa.

¹²Chukhaenache ki ing neningna chongthen baziihdoh khang ningle, ynraar atu mee khaena mahva, vokheh-kho araar vasah mee khaena khom mahva, changvakonchu nengkhaena kenuw ing kengariimpeeh chuwchu Thangnang mik enna yndangnii khaenache chongthen havi kabaziihpa.

¹³khaenache nenbarungriir inungaenache kenuw kenbarungriir chukho nungaesa, vokhehkho Taitas arotha iroh khaena chenkho athiseh ing kenrotha rohsa, yngkhaena ynchii imbe nenuw vakhae ing alaetha ijachu nenbasumpeehpa.

¹⁴Amana laanglam ki ing nengkhaena aningna-che ruungnii ningve, kaning ynjaknii omah, changvakonchu kenuw ing neningna aangkhengna ichum ing ichong vaang ungkhe, Taitas taklina kenuw iruungniisah ung chukho ichum ynsuwhsa.

¹⁵Vokhehkho nentaklina aningsiih omchu hungpirna, akhae-chuve ama ing nenuw vakhae ing chongriir ynjii ing omchuwchu aansiisa, amachuve nenuw ing atakchu nenchiisah vokhehkho ynchiim ing nenbariimsahpa.

¹⁶Chukhaenache aangkhenglaangna nentaklina kaba-rung ngamnii om khaena karotha rohna.