Read Moyon Naga 2 KORINTHIA 8 Bible Online

2 KORINTHIA 8 - Moyon Naga bible

2 KORINTHIA 8

¹Kauw kanae ae, Mesidonia ruwrthiing ae ing Thangnang tungsiih thoh ynruwhaknae ichiichu nemanghuwnii inche kemanthang sahnah.

²Amachuve ijachaam aajaeh sungna enrotha irohpak inche enuw ing deensahmah khang ae nare, adeensah-mah ningna barungriir iruung thohche ipeehtahna hungpir sehsehnae.

³Ki ing saarkhii kapeehsanah amachuve, enuw enchehsah inuwzii ing endeensah tanii inempak pinungka ichii ing empeehpa.

⁴Enuw ing ynthiing ae ningnache ibomsahnii khaena keningna ynthamsahpae.

⁵Havi kenuw ing kemanden chumahka, Thangnang ing amanden ajaarna enuw ing amaensana entaksah ing Aafhuw ningnache vokhehkho keningnache ympeehpae.

⁶Chukhaenache havana nong i abasen Taitas ningnache inuumnii khaena, vokhehkho athurfhuw ningsiih nong havi aman-chinii inche atakchu kembasohsahva.

⁷Chutahnache nenuw ing thacha nache, ichongnii nache, ynghuwnii nache, bariimsah nache, vokhehkho kentaklina neningsiih om, hava vakhaene iruungchuw vaang atungsiih nachehkho hungruungruw.

⁸Ki ing chonghak kapeehmah vachuw, changvakonchu mee areh aeng ibomsah engadikchu kamandangniiva, ki ing neningsiihchu aajaehmeh man-thiingne ichiichu ka-enniiva.

⁹Nenuw ing Aafhuw Jesu Khrista tungsiihchu nemanghuwsa; amachuve Aafhuw ing savang khangnare, Aafhuw asara inche nenuwchu savang basuwnii khaena ama ing nengkhaenache sara ynsuwhsa.

¹⁰Ki ing kamandensah chuve ajaenkum nenbasen amakha atarae nemanchi inche nengkhaena sakseh vaata. Nenuw vatahchuw maensa ing tukenta ichiijaeh mahka, tunungka nenchii ing nentuchu.

¹¹Changvakonchu tunungka ichii nemanden om vaangkhe, nenuw ing nemandensah tanii chaap nemanchinii inche, nentu nong chukho atarae manchiruw.

¹²Nenuw ing pinungka tatanuwve, nendeensah inuwzii ing nenpeehchu Thangnang ing iraang vaata, nendeen sahmah inuwzii ing mahnii.

¹³Ki ing mee reentaang aechu jabasumnii khaena amanche nening nache peehriknii khaena kariirmahva.

¹⁴Changvakonchu aanchimnii khaenava, enuw aanem aengkho nenvaehnii nache ymbom aenii ing, apha havane enuw aanem ing envaehnii nache nenbom inche sakna; amatah nache aanchimnii khaena vatah.

¹⁵Havi jinge ichii ing ynziih vasahva, “Inem amangkong mee inche ynchiikho bariimah, amanche topohpang amankong mee inchenkho vaehmahdeh.”

¹⁶Taitas ningna kithoh aanghak ing nenuwchu ibomsahnii barungriir eepeeh Thangnang ningnache manpahsa taruw.

¹⁷Aningna ken-thamsahchu atatak ing ynrupeeh pangmahka, ataksah ingkho ynriimsahpak vakhaka siningka ichii ing neningting ivasiva.

¹⁸Vokhehkho Taitas atakthoh ynruw ing isa chong nong tunii khaena ruwrthiing vakhae kaarna ynjasuwhpak unae havi kenuw ing kenvechiirva.

¹⁹Havipang mahka atak i ruwrthiing vakhae ing iteerka vokhehkho pham thinka, kenuw thoh ynruw ing Aafhuw alaar isa khaena ningsiih nong havi ituhaknii ing vokhehkho bom nungka ichiichu mandang nungka kenchii khaenava.

²⁰Kenuw ing itufhuw nong kentuna aaruunghak kikthuur havi khaene achuw yngkheh ing kenuwchu ymmanraar niimah ing havi kemansirva.

²¹Akhaechuve Aafhuw mik en nachenpang mahnaka, mee ae mik en nakho nong aangkheng asaknii khaena kenuw ing maensa ing vakhar kentu.

²²Amanche nong aanem nache, apha aanem nache ynriimne ynriimmah ichii khaena apha aajaeh ibuwrsa ungka, neningna inempak abarungriir ireep ing thacha om khaenache, atak i enuw thohne neningting kenvebathenva.

²³Taitas khaena chembe, atak i kaanruwfhuw meeva, vokhehkho nengkhaena kithoh nong kentuhak meeva; amanche unae ae enuw ichuve Khrista alaar isa ruwrthiing ae chong aareen mee chupae.

²⁴Chukhaeanche itheng ruwrthiing ae maane nentaklina ningsiih om vokhehkho nengkhaena kenruungniichu imandangpeehruw.