Read Moyon Naga GALATIA 2 Bible Online

GALATIA 2 - Moyon Naga bible

GALATIA 2

¹Kum suum arii manrii aanuwna ki ing Barnabas thoh ynruw ing Taitas ruw ingka Jerusalem ting athar isi ing.

²Amanache kaningna amandang inuwzii ing sisa ingka eningnache reentaang mee ae kaarna isa chong katongchu kamanthang, changvakonchu laanglam ikanii mahna itaenrom ingkho arusa ta ingka enthang isa mee ae ningna ynruwh ing kariir.

³Changvakonchu kaanruwfuw Taitas Grik mee vakhangnare, vinchiipnii khaena mansinteehmah ing;

⁴changvakonchu Jesu Khrista ajaarna inuw ing ruwkuwrjoh ing ong ymphachu ynruwh ing aanbuwr itheng ichummah aenche kenuwchu suwh ynsuwh engadik.

⁵Changvakonchu isa chong ichumchu neningna aomjaehnii khaena, kenuw ing apha topoh pangkho endernache ongmah ung.

⁶Changvakonchu aapuhpung achii mee aechu achuwchuw vakhangnare, kaningna chembe ynchii khommahpae; Thangnang ing maesiing maeruung khaemah vokhehkho kaningna chembe aapuh ae inche ithimahdeh ae.

⁷Changvakonchu rakheh yngtongting vinchiip ae khaena isa chong tongnii Pitar ningna amansir vaang, kaning nakho vinchiipmah ae khaena isa chongchu ymmansirpa ichii enuw ing muaeka

⁸vinchiip ae khaena Khrista chongthang ivi Pitar ningna ajeer vaang, Aafhuw ing reentaang mee ae khaena ki chukho chongthang ing pham ynthinpa.

⁹Kaningna ympeehchu chongthang abur ynsuwh ae enruming isi Jems, Pitar vokhehkho Johon ae inche emanghuw tahna, kenuw inge reentaang mee ae ting amanche enuw ing vinchiip ae ting isinii khaena kaning nakho, Barnabas ningnakho, enuw ing nong ituhakchu vamuw ichii buwtinnii ing salaam yntupae.

¹⁰Enuw ing sara naeriing aechu bahirmah ae manuw enchii amachurap kikho itunii khaena kabarungriir iruwh.

¹¹Pitar ing Entiok na avathenglae, ama ing isii icher ting ibuw khaena karakuh.

¹²Akhaechuve Jems ningtanii achuw tikho avathengmah rirae, ama ing reentaang mee ae thoh thaemin asahhakpa; changvakonchu enuw aechu envathengtah nache ama ing vinchiip aechu chiika, vokhehkho ynsiirka ympeennii atupa.

¹³Jehudi reentaang aengkho amathoh ynruw ing isingpak vaang siaeka Barnabas chukho avekipae.

¹⁴Amana ichum isa chong inuwzii ing simahsae ichii kamutah nache, ki ing emae kungna Pitar chu karakuhpa, “Natakcha Jehudi chiika Jehudi ae vaang siruchii ing, reentaang mee ae vaang sichiika ynchii khaena reentaang mee aechu Jehudi ae vaang siruw nachiiva?”

¹⁵Atatak ing inuw chuve Jehudi chuvamuw, amanche isii icher enreen reentaang mee ae khamahmuw;

¹⁶changvakonchu mee vakhae i vajeer chonghak nong atutahna ichum mahva, Jesu Khrista ithacha nache ichumpeh vamuw ichiichu manghuw manuwka, vajeer chonghak nongchu turu ing Jesu Khrista chu ithacha inche ymmanchumnii khaenache kenuw ingkho kenthachapa; akhae-chuve vajeer chonghak nong inche achuw tikho manchum chehmah.

¹⁷Chukhaenache kenuw ing Khrista ajaarna ichumchu kenjong tahna, isii icher pung ichii phanungve, Khrista chu isii nong atuvakhang? Amachu ynsuwh mahdeh rasiing!

¹⁸Ki ing karen vasah tuning kachiimahchu athar vokheh tureeh ningve, ki isamah itu meeping ichii kataksah ing kamandangpa.

¹⁹Akhaechuve ki ing Thangnang ningna iringnii khaenache vajeer chonghak ajaarna vajeer chonghak nache thiksing.

²⁰Jesu Khrista thoh ynruw ing khros na kichu ynthik fhuwpa; atii iring kaphasah i ki mahping, changvakonchu Khrista ing kataklina aringtah nava, vokhehkho atarae iring kaphasah i kichu aning imansiihka aringkum ympideh Thangnang sapa kathacha ajaarnache iring sahping.

²¹Ki ing Thangnang tungsiihchu manpaam mahdeh ing, akhaechuve vajeer chonghak inche ichum ynthiing ynsuwhcheh vanave, khrista chu ikaniimah dehsa.