Read Moyon Naga GALATIA 5 Bible Online

GALATIA 5 - Moyon Naga bible

GALATIA 5

¹Ruwkuwrjoh ympha khaena inuwchu Khrista ing vaesang ing ymbathenpa; chukhaenache icheepther ing ngiirruw, amanche suwh riingkor nache athar umahruw.

²Rungaeruw, Pol ki ing neningna kariirnah amachuve, nenuw vinchiip mee unsywh tanuwve, Khrista chu neningna nentuungsah yntanga omahnii.

³Amanche ki ing vinchiip mee vakhae ningna saarkhii kapeehnah amachuve, ama ing vajeer chonghak aangkheng amanjiichirnii khaena ler atuurva.

⁴Vajeer chonghak ajaar ing ichumchirnii nentu nenuw chuve Khrista tanii ruw yngki ympehsa, vokhehkho nenuw atungsiih tanii jungtak sachuw.

⁵Inuw chuve laetha jaarna thacha inche ichum ynthiing ningmandenchu ynghahva.

⁶Jesu Khrista ningna chembe vinchiip kho vinchiipmah kho yntanga ikaanii omah; changvakonchu ningsiih ajaarna thacha ing nong itu ynchenva.

⁷Nenuw isajaeh inche hungtaennachuw; ichumchu ijiiniimah khaena achuw ing nenuwchu yngkhaamva?

⁸Batheem ichii ive nenuwchu ingeen Aafhuw tanii mahva.

⁹Chor topohti ing apumchu amanruungnah.

¹⁰Nenuw ing reentaang ting nenbarungriir mandenmah tanuw ta ingka Aafhuw thoh ynruw ing kabarungriir ngamna; changvakonchu nentaklina ijachaam ympeehchu achuwchuw vakhangnare, vajeer phasa vaata.

¹¹Kauw kanae ae, ki ing ataraenpha ing vinchiip khaena katongjaeh vana-ve, ynchii khaena ki ataraenpha ing ijachaam kaphava? Amachu vanave khros khaena ijanii omahsa.

¹²Nenuw ijachaam ympeeh aechu vinchiip jaehpang mahka entak phanii ing manchiip ae nave, kangae chiirom vachiiva.

¹³Kauw kanae ae, nenuwchu ruw-kuwrjohnii khaena yngeenpa, havana ruwkuwrjoh inge hakchaang nungaenii khaena tumahruw, changvakonchu ningsiih inche yngkheh re yngkheh rukuum ynturuw.

¹⁴Akhaechuve vajeer chonghak aangkhenglaang chongsae yngkheh ing akuwm chirva amachuve, “Nang ing naveenchaang aechu nataksahrap vaang naning mansiihva nachiipae.”

¹⁵Changvakonchu nenuw ing yngkheh re yngkheh ynsi tanuwka ynsa tanuwve, nenuw yngkheh ing yngkhehchu abasuwmniimah ing ynriimruw.

¹⁶Changvakonchu ki ing kariirnah, ynthiing laetha jaarna siruw, amana chembe nenghakchaang ing aadikchu phamahnii.

¹⁷Hakchaang ing aadik inche ynthiing laethachu ajeehniinah, amanche ynthiing laetha inche hakchaang ing aadikchu ajeehniinah; amachuve nenuw ing nengadik chaapchu nentuniimah ing ynniimeh havi inge yngkheh re yngkheh ynjeehnii aeka mae yntuwhnae.

¹⁸Changvakonchu ynthiing laetha ing nenuwchu ipuhnave, nenuw vajeer chonghak dernache ongmah sachuw.

¹⁹Atarae hakchaang ing atu nong yndangna amachuve hava vakhae iva: Reentaang rumee fhuwsar taklina ichuwhmah itu, ynthiingmah, atu ari isamah,

²⁰lae ruthaksii irum, mee aser, yngensiimah, mee ajeehnii, kallak om, barung isiipak, ataksah khaenapang amanden, barungriir yntinniimah, ichummah ing om;

²¹sehmaner om, miktheh, juw ynruw, isamahna nungae, hangchii nong havi nunu ing atu mee chaap ing utaraenkho Thangnang lipah tungmahnii ae ichii maen ing kamanthang vasah vaangkhe, ataraenkho neningna athar kamanthangnah.

²²Changvakonchu ynthiing laetha aanla chuve, ningsiih, rotharoh, idae, apha iseeh ing ikhaangcheh, mee achaarpeeh, isa, thacha,

²³iduwrjaeh, ataksah yngahcheh chuva. Havi chungna ajeehnii vajeer chonghak yntanga omah.

²⁴Amanche Jesu Khrista mee ynsuwh ae inche hak-chaang ing amandenna barungriir iruwh re aadik chaapchu khros nache athehpa.

²⁵Inuw ing ynthiing laetha jaarna ringmanuwve, laetha ajaarnache isikho sisataruw.

²⁶Inuw yndingmah vaanchiiva, Yngkheh yngkheh thir ynfhuwrvaanchii mahva vokhehkho yngkheh yngkheh kallak omvaanchii mahva.