Read Moyon Naga GALATIA 6 Bible Online

GALATIA 6 - Moyon Naga bible

GALATIA 6

¹Kauw kanae ae, isii ting ibuw meechu nenuw ing suwr tanuwve, nenuwkho ymbatheem arusa tanuwna ynriimruw, amana changchii aechu laethacher mee aenche iduwrjaeh ing ivakipeeh ae rasiing.

²Nenuw yngkheh ing yngkheh peehrik ymbomruw, vokhehkho jinge ichii ing Khrista vajeer chonghakchu areer basuwruw.

³Achuw yngkheh ing atakcha yntangamah naka mee yngkhehping tanave, ataksah ynchaesahva.

⁴Changvakonchu amee siir ing ama anongchu ensarasiing. Amanache saknave ama ing yndingsah phavaata, mee reentaang nongna yndingmah rasiing.

⁵Akhaechuve amee siir ing apeehrikchu reensava chiiva.

⁶Thangnang chong iteen aphasah mee inche aanchuw ningnache isasehchu pirasiing.

⁷Nentaksah ynchaemahruw; Thangnang maniisah mahruw, akhae-chuve mee ing avorsah inuwzii ing ama ing ruwpsa vaata.

⁸Ataksah hakchaang khaena avor mee inche hakchaang tanii imaangchu ruwpsa vaata; laetha khaena avor mee inche laetha tanii ichen naemah iringnii ruwpvaata.

⁹Chukhaenache isa nong ynturae jamah manuw; akhaechuve jungsuurmah manuwve, apha ahungvi raenche inuw ing ruwpvataruw.

¹⁰Chukhaenache inuw ing apha ymphasah raenche inuw ing mee vakhaena amanche athurfhuwseh ing thacha eengkuw ae taklinache isachu tusataruw.

¹¹Enruw kakikrap ing aajaeh iruung ziih ing neningna chongthen i kavebaziihva!

¹²Hakchaang na yndangjoh aadik vakhae ing nenuwchu vinchiip mantuteeh kenta ynchii-paetah, havi khrista khros khaena ijachaam emphaniimah khaena vatah.

¹³Akhaechuve vinchiip rap aengkho entaksah ing vajeer chonghak ngahmah ae; enuw ing hakchaang na changmahka enuw ing nenghakchaang nache enrungniisah khaena nentaklina vinchiip entuvatah.

¹⁴Changvakonchu inuw Aafhuw Jesu Khrista khros khaenamah naka, ki karuungniimah ynsuwhrasiing, akhaechuve Aafhuw khros jaarna laaruw paam ing ka-ningna amanche ki ing laaruw paamna khros nache ithiiping.

¹⁵Akhaechuve vinchiip re vinchiipmah yntanga khommahva, changvakonchu itharpeh mee ing ynseemchu vatah.

¹⁶Amanche havana deenziih inuwzii ing isi vakhae ningnache idae vokhehkho ningchuwh amanche Isrel ae Thangnang taklinache om ynsuwhrasiing.

¹⁷Atii basen naka achuw ingkho kichu imanjamah rasiing; akhaechuve Aafhuw Jesu khaena kataklina abuw inae kareensa.

¹⁸Kauw kanae ae, inuw vakhae Aafhuw Jesu Khrista tungsiihchu nenlaetha thoh ynruwhakjaeh ynsuwhrasiing. Amen.