Read Moyon Naga EPHESIA 4 Bible Online

EPHESIA 4 - Moyon Naga bible

EPHESIA 4

¹Aafhuw khaena kaeshumna ong Pol ki ing neningna kariirsahnah, amachuve nenuwchu yngeen inuwzii ing matik icha inche isipeehruw;

²aangkhengna ynjuursah re iduwr thoh ynruw ing, apha iseehpak ing ikhaangcheh thoh ynruw ing ningsiih nache yngkheh ing yngkheh taklina khaanghak nuwna,

³idae ing ipurnache vokhehkho laethana yngkhehpang ing omchu ingahnii inche barungriir iruwh ing itupeeh-ruw.

⁴Nenuwchu ningmanden yngkhehpang nache yngeen vaang, hakchaang yngkheh vokhehkho laetha yngkheh omna,

⁵Aafhuw yngkheh, thacha yngkheh, baptais itu yngkheh,

⁶Thangnang vokhehkho laaruw mee vakhae apa yngkheh omna, amachuve aangkhenglaangna Aafhuw, aangkhenglaangna nong atu vokhehkho aangkhenglaangna omna.

⁷Changvakonchu Khrista kikthuur-chu achaang manaeka inuw vakhae ynningnache atungsiihchu ympipa.

⁸Chukhaenache jinge ariirsa, “Aafhuw ing chungting akarlaenche, ynsuwr aeka om aechu aruwpa vokhehkho laaruw mee ningnache kikthuurchu apeehpa.”

⁹Atii Aafhuw ing chungting karsa ichii ichuve laaruw paam der itadeh-ting Aafhuw ing jungchumkho jungchumsa ichiimah naka ynchiiva chang?

¹⁰Ijungchum Aafhuw ichuve aangkhenglaangna ongchirnii khaena thangbaen vakhae chungting ikarkho ikar Aafhuw churapva.

¹¹Amana Aafhuw ing areh aechu chongthang ing, areh inche jaephar ing, areh inche isa chong ijeermee ing, amanche areh aenche pastar ing vokhehkho aanchuw mee ynsuwhnii khaena kikthuur apeehpa,

¹²ynthiing aechu ynghuwtahna envaeniimah khaena, nongtunii khaena, Khrista hakchaangchu seemnii khaena,

¹³Thangnang sapa ynghuwna vokhehkho thacha tahna yngkhehpangnii ymphamahri raen-taang, mapung apha mee, Khrista vaang imin hungansuwhnii khaenava.

¹⁴Amana chembe ihuung iva ing vokhehkho mare om ing ynchuwpeeh sii ing varaangka hungchi avechi laaruw mee ikaam barungriir inche, ichummah enlosing inche naepang aevaang tamah manuw,

¹⁵changvakonchu ama changdenna ningsiih nache ichum ing chong manuwka, arusae ynsuwh Khrista ningnache aangkhenglaangna hungruungnii khaenava,

¹⁶Aafhuw ningtanii ing hakchaang aangkheng ynjom vokhehkho yntuw ajaarnache ichachak ing ynjomka vokhehkho yntuwka asik asik rutum yngkheh yngkheh achaang nache nong entu inuwzii ing, ningsiih ajaarnache hakchaang aangkhengchu aseemnah.

¹⁷Khrista rumingna ki ing kariirnah, amachuve reentaang mee aeng embarungriir ikaniimah ting empeeh vaang athar nenuw tamahruw.

¹⁸Akhaechuve embarungriirna emang-huwmah re embarungriir ipir inche manghuwva enchiichu vemanthimka, enuw Thangnang ringkum tanii asik meechu ynsuwhsae;

¹⁹vokhehkho embarungriir ipir lamher inche ipen naemah ing ynthiingmah vokhehkho ichuwhmah nong tunii nache entaksah ympisahsae.

²⁰Changvakonchu nenuw chuve Khrista khaenache hava vakhae i nentam mahva!

²¹Nenuw ing Khrista khaena nensiivasah vokhehkho aningna ichumchu om vaangkhe ongtanuwve;

²²ajae nenuw ing mare om ing paarchuwka nengadik inuwzii ing imaangniiting nensinii nenvakhar aangkhengkha mantharruw.

²³Nenuw nenbarungriir sungna laetha omkha manthar nuwna,

²⁴amanche Thang-nang vaang ichii ichum ynthiing vokhehkho ynthiing ing aseem vasah ithar meechu nenuw ing niiruw.

²⁵Chukhaenache ichummah chaap bathen nuwna, nenuw nenveenchaang thohche ichum inche chongruw; akhaechuve inuw vakhae i hakchaang yngkhehpang vamuw.

²⁶Nenthir afhuwrlae isii nong tumahruw, vokhehkho nenthir ifhuwrchu inii bathak mahruw;

²⁷umlae ningna khamtong pimahdehruw.

²⁸Lam abaruwhchak ingkhe athar baruwh-mah rasii, ama changdenna akiksah ing adeennii khaena isa nongchu tusana vokhehkho sara naeriing aechu bomrasiing.

²⁹Nener nache isamah chong manchuwng mahruw changvakonchu ahenseemnii khaena isa chongsae chupang ichong peehruw, amana chembe aasii mee ae khaenache ikaanii ynsuwh vaata.

³⁰Thangnang ynthiing laethachu manjamahruw; akhaechuve ikarvachii aanii khaenache nenuwchu ahak ynnampa.

³¹Chukhaenache ikhapak, mi ichuwng ing barungsii, thirfhuwr, fhuw itamchechor vokhehkho ithipak ing ichong thoh yngensiimah aangkhenglaang neningtanii suwhchir rasii.

³²Hava vakhae i changdenna nenuw yngkheh yngkheh ynchaarruw, nenbarungriir duungrasii, Thangnang ingkho Khrista ajaarnache isii yngkuhpeeh vaang, nenuwkho yngkheh ing yngkheh taklina nenraar omchu yngkuhpeehruw.