Read Moyon Naga EPHESIA 6 Bible Online

EPHESIA 6 - Moyon Naga bible

EPHESIA 6

¹Naepang ae, nenuw nenpa chong-riir manjiiruw, havi ichumpak itufhuw chuva.

²Nennuw nenpa ijaaruw ichii i aren chongreep thoh ynruwhak chonghak chuva.

³“Havi laaruw paamna ringkum iseehpak ing vokhehkho nungaepak ing nenpaarnii khaenava.”

⁴Ampa vakhae, nensiti ae taklina barung siknii ing chongmahruw, ama changdenna Khristen yngkheh ing sinii vachiina iriirpeeh thoh ynruw ing henjuhsa aeruw.

⁵Suwh ae, nengafhuw aechu ynchik ing vokhehkho ynchiim thoh ynruw ing enchongriirchu manjiiruw; amanche Khrista ningna kentuva ichii ing rinuwna nenbarungriir iruwh ing turuw.

⁶Enuw ing ynrunii ae khaena eebuwr ae raenchenpang tumahruw, changvakonchu Khrista suwh nongtu vaang nenbarungriirna Thangnang ing amanden nongtu ing itupeehruw.

⁷Mee ae ningna nentuvaang mahka, Aafhuw ningna nentu vaang, isa barungriir ireen ing nong turuw.

⁸Suwh vakhangnare suwhmah vakhang-nare, mee vakhae ing isa nong yngkheh atutahna, ama ing Aafhuw ningtanii nongmen athar iraangva kata ichii manghuwsa rasiing.

⁹Aafhuw ae, nensuwh ae taklina nemanchiih chakkha manchenruw. Mee vakhae taklina ynchimchak ing vajeer atu nangkho amakho nengafhuw inche thangbaenna ongna ichiichu ynsiiruw.

¹⁰Aafhuw ruwreng ipirpak thoh ynruw ing nenruwreng hemanpirruw.

¹¹Thangnang ing neningna ympeeh laar tukniichu iniipeehruw, ama inche Umlae losing isamahchu ngahchehva nenta.

¹²Akhaechuve inuw ing mee aechu eenafhuw mahva, changvakonchu thangbaen aphamsiir nache isamah laetha ynsuwh ae taklina, aapuh ae, aachehpung achiiae, amanche ynthim laaruw paam aacheh ae taklina chenva.

¹³Chukhaenache atii nenuw ing Thangnang laar tukniichu niiruw! Isamah iniichu athenglaenche, laarchu badaarchehva nenta; vokhehkho achinii ipha inche laarchu tukcheh tanuwka, nenuw ing ingiir chehva nenta.

¹⁴Chukhaenache ichum inche nendiirriim chiimteeh nuwna, vokheh-kho ichum phukhumchu niinuwna ngiirruw,

¹⁵amanche idae isa chongchu nengkhi nache niinuwna;

¹⁶apha vakhaenache thacha phuchu chiruw, ama inche isamah mi ing ivachuwng envekhu isii aangkhengchu badaar tanuwka thehchehva nenta.

¹⁷Vokhehkho Thangnang chongsae ynsuwh manlaenpeeh laar phukhum vokhehkho laetha laarchemchu bachuw therruw.

¹⁸Aangkhenglaangna laetha nache iniihsah vokhehkho ithamsah thoh ynruw ing thamruw. Akuurchiimnii ipha inche ynthiing ae khaena ithamsah, ikhaangcheh ipirthoh ynruw ing,

¹⁹vokhehkho ithuwhpak isa chongchu thir isapak ing itong kachehnii ing kakhae nakho ithampeehruw.

²⁰Hava isa chong khaene chongdenmee ynsuwh ingka siirruw runoh ing ynphuwp kapha ki ing thir isa ing chong ningka kamandang chehnii khaenache ithampeehruw.

²¹ Aangkhenglaangna thachafhuw Aafhuw nongtu mee ningsiihniipak unae Tikikas ing ynsaangkhe taning vokhehkho ynchii katuva ichiichu neningna iriirpeeh vaata.

²²Ama khaenache neningting atak i ki ing kavechiirva, ama ing kenuw ynsaangkhe ongnung ichiichu riirnaka nenbarungriir ithoh vaata.

²³Apa Thangnang vokhehkho Aafhuw Jesu Khrista ing nenuw vakhaechu idae vokhehkho ningsiih thoh ynruw thachachu ympi ynsuwh-rasiing.

²⁴Aafhuw Jesu ichuwr naemah ing aning amansiih vakhae ae ningnache Thangnang tungsiihchu om ynsuwhrasiing.