Read Moyon Naga PHILIPPIA 3 Bible Online

PHILIPPIA 3 - Moyon Naga bible

PHILIPPIA 3

¹Akuurchiimna kaarang ae, Aafhuw thoh yntuwhakchuw khaena rotha manrohruw. Kavebaziih vasah taklina athar kanuumtah nakho aden ing vaechirpak ing kharpakmah ing, havi inge neningna acheepniiseh khaenava.

²Ynriim ing enruw, ichamah uti aekha, mee sikenta ta aeka emandennah.

³Enuw mahpae, vinchiip ympha vasah inuw vamuw, akhaechuve laetha ynthiing ajaarnache Thangnang rummuwka amanche Khrista Jesu thohche yntuwmuw khaena rotharoh ymphava. Inuw ing reentaang asikna ithacha tumahmuw.

⁴Ki ing hakchaangna barungriir mangamnii kadeenkho arusa. Achuw yngkheh mee ing hakchaang nache barungriir mangamnii deennave, kataklina ikharniiseh thengna.

⁵Kikho inii neeriih kapharae vinchiip katu. Katak i Hebreeu siina Isrel yngkheh ing Benjamin sungkhurna jungomping. Jehudi ae vajeer chonghak ingahtah nachembe, katak i Pharisi yngkhehping,

⁶Ki ing kallak ingka ruwrthiingchu kamanang. Vajeer chonghak ynjii ing ichum ynthiing aphava ichiinache karaarnii omah.

⁷Changvakonchu ama vakhaekha katuungsah niiva ichii ing karisahchu atii Khrista khaena chembe imaangnii vatah ichii ing karisahpa.

⁸Amachupang mahka, amen iruwpak ki kaafhuw Jesu Khrista ynghuwnii khaenache, aangkhenglaang imaangniiva ta ingka rimahsing. Ama akhaena aangkhenglaang ikaniimahva kachiipa, amanache Khrista chu kaaniiva kata,

⁹vokhehkho atak thohche yntuwva kata. Vajeer chonghak ynjiina ichum ynthiingchu kaningna atii omahsa. Thangnang ningtanii itheng thacha jaarna ichum ynthiingchu Khrista ithacha jaarna kaningna omsa.

¹⁰Ki ing kaadiksah chuve Khrista chu manghuwnii re atak hangring ruwreng, vokhehkho ijachaam aphanache sarup aja amanche atak ithii khavaang hungchii chuva.

¹¹Changvanuwve katak i ithii tanii imanring vaata ichii barungriir kareensahsa.

¹²Atii havi ki ing kaphasahpa changmahka mapung kaphapa kachiimahva, changvakonchu runave Jesu Khrista ing kichu ynsuwrsah khaena nongmenchu kaphanii inche katusahva.

¹³Atatakva kaarang ae, ki kataksah ing atii saksing tachehmaang; changvakonchu itufhuw nong yngkheh chuve, isivasah chaap vakhaechu bahir ingka, maating heomchu iphanii inche tusa ingka,

¹⁴Jesu Khrista ajaarna Thangnang ing chungting yngeen khaena iphafhuw nongmen phanii khaenache, manden thungnii tingche ki itaensahping.

¹⁵Chukhaenache mapung ympha vasah inuw vakhae ing hangchii barungriir i siisataruw; amanche laanglam nenbarungriir sungna asik barungriir omnave, havikho Thangnang ing neningna imandangpeeh vaata.

¹⁶Inuw ing ymphasah chupang bachuwther taruw.

¹⁷Kauw kanae ae, ki kanu ynjii ynsuwhruw, amanche kenuw ing neningna kenu ynjiifhuwnii yngkheh ynsuwh ungka kensiihne isi mee aechu ibuwr aeruw.

¹⁸Havi hangsenna kariir vasahva, ataenkho kemik richiipum ing kenuumnah, khrista ing khros na ithii ruming ynchohnii nong itu mee inempak omna.

¹⁹Changchii mee aenche longkong ting bukvaatae, yngkhaena ynchii imbe enuw en thangnang chuve hakchaang ing amanden chuvatah.

²⁰Inuw chuve thangbaenna paarvaanchii mee vamuw, amanche thangbaen tanii jungchum vachii Eekarpeeh Aafhuw Jesu Khrista chu hahbrah ing ynghahsahnah.

²¹Peeh aangkhenglaang aderna amangomcheh ruwreng jaarnache, Aafhuw ing inuw vakhae hakchaang isuur maangvachii ichu manteh naka, amanche ataksah ahakchaang vaang manguur vaata.