Read Moyon Naga PHILIPPIA 4 Bible Online

PHILIPPIA 4 - Moyon Naga bible

PHILIPPIA 4

¹Amatah nache kaarang ae, inuw yntuwhcheh mahmuw i inempak kaning sikna, nentu nenri chaap nakhe inempak karotha rohna vokhehkho yngaeniining. Kaarang ae, apha vakhaena Aafhuw rumingna inehther ing ngiirruw.

²Iuodia re Sintik, nenuw yngkheh re yngkheh Aafhuw rumingna ningsiih ympiruw ta ingka kathamsah nahchuw.

³Kaanruwfhuw nenuwkho havana rupanuw ae i bomsa aeruw, yngkhaena ynchii imbe Klemen vokhehkho reentaang kaarang ae enruming Thangnang thiimbuwrna ynthin vasah ae inge isa chong kavorlae inempak ymbomsahpae.

⁴Nenuw vakhae Aafhuw ruming nache ynchaar nuwna rotharohchu phasaruw ta ingka athar kariirsahnah!

⁵Amee siirna isa barungriir mandang-ruw. Aafhuw chu athar jungthenglo achiinah.

⁶Barungriir manjamahruw changvakonchu nemanden khaena Thangnang ting ympah thoh ynruw ing heniihruw.

⁷Laaruw mee ing amanghuw aangkheng athiseh Thangnang tanii idae inche, Jesu Khrista jaarna nenbarungriir vokhehkho nenvakharchu ingahpeeh vaata.

⁸Achiniina kaarang ae, ichum, isa barungriir, adongchang omah, iseeng, isapak, thang saknii, isa nong, ympahnii havi omnave, hava vakhae i nenbarungriirna kharruw.

⁹Nenuw ing nentamsah, nenpha, nensii vokhehkho nemu aangkheng havi itupeehruw. Amanche idae ympeeh Thangnang ing nenuwchu eenruwfhuw vaata.

¹⁰Nenuw ing athar vokheh ymbomsahchuw khaena Aafhuw ningna inempak karotha rohsakna. Nenuw ing kichu bomnung chuwka nenchii ichacheh mahchu kamanghuwsa.

¹¹Ki kavaehnii khaena ichong mahping; akhaechuve nemkhang nakho, tuumkhang nakho kapenniichu katamsahpa.

¹²Ki ing omah nakho, omchir nakho iringniichu kamanghuwsa. Ven ynva vakhang nakho, venchaam vakhang nakho, ynriimjor vakhang nakho amanche kavaehnii vakhang nakho ithuwhpak ipensahniichu kamanghuwpa;

¹³yngkhaena ynchii imbe kichu ruwreng ymmanpir Khrista ajaarnache aangkhenglaang katuchehsa.

¹⁴Changkhangnare kajanii nache sarup nenja khaena inempak sakna.

¹⁵Philipia nenuw ing nemanghuwsa, amachuve mamaenna Mesidonia bathen ingka isa chong itong kasirae nenuw mahnaka ruwrthiing achuw kho ipeehsah vokhehkho iphasahnii khaenache omah.

¹⁶Thesalonika nache ibomsahnii kaadik chukho nenuw ing athar athar ynjebathen peehchuw.

¹⁷Ki ing kikthuurchu kajongmahva, changvakonchu nengkhaena ahenthisehnii aanlachu kajongva.

¹⁸Atatak ing aangkhenglaang kaphasa vokhehkho ivaeh omahdeh ing, neningtanii kikthuurchu barim ningsiihniipak Thangnang ing aru vokhehkho penniivachii chaatha ynsuwhvaang, Ipaphroditas tanii phasa ingka ivaeh omahsing.

¹⁹Ka Thangnang inche kaaniivanenchii aangkheng Jesu Khrista ajaarna alaar isa om lerchiichu ipivaata.

²⁰Atii Thangnang vokhehkho apa ningnache ympah ynsuwhrasii.

²¹Jesu Khrista ningna ipaar Thangnang mee vakhae neningna salaam katusahnahchuw. Kithoh nong katufhuw kaarang ae ingkho neningna salaam ynvetunah ae.

²²Hane Thangnang mee vakhae athurfhuw ing, iruwng sejaam eengkuw vakhae ingkho salaam ynvetunah ae.

²³Aafhuw Jesu Khrista tungsiih ing nenuwchu eenruwfuw ynsuwhraiing.