Read Moyon Naga KOLOSIA 1 Bible Online

KOLOSIA 1 - Moyon Naga bible

KOLOSIA 1

¹Thangnang ing amandenna Jesu Khrista achongthang ki ing vokhehkho unae Timothi thoh-

²Kolosia na ong ynthiing ae vokhehkho thachafhuw om kauw kanae ae, inuw vakhae Apa Thangnang tanii tungsiih re idaechu neningna om ynsuwhrasii.

³Aafhuw Jesu Khrista ampa Thangnang chu ympahthoh ynruw ing apha om bakhaena nengkhaena kenthamsahnah.

⁴Akhaechuve Jesu Khrista ningna nenuw ing nenthacha, vokhehkho ynthiing mee vakhae taklina neningsiih omchu kenuw ing kensiipa.

⁵Havi thangbaen nache nengkhaena ynsiihpeeh vasahchu nemanghuw khaenava; havi khaene ahaarpana nenuw ing isa chongchu nensiipa.

⁶Hava isa chong i laaruw paamna aanla omka ihungruungchu, nenuw ing Thangnang ningsiih ichum nemanghuw inii nache basenka nening nakho omba.

⁷Havi kenuwthoh nong kentuhak keningsiih Ipaphras ningtanii siichuwka nemanghuwkha vatah; atak i kenuw kenchangdenna thachafhuw om Khrista nong atu meeva.

⁸Laetha jaarna ningsiih omchuwchu ama ing keningna amanthangpa.

⁹Hava chong khaene kensii inii nache basenka nenuw ing laetha tanii ising iveer ing, vokhehkho nemanden vakhae nache Aafhuw nemanghuwnii khaenache kenuw ing nengkhaena ithamsah manchenmah ung.

¹⁰Nenuw ing isa nong nentu vakhaena aanla omsana, Thangnang chu nemanghuw nache hungruungruw.

¹¹Rotha irohthoh ynruw ing ikhaangcheh nache apha iseehpak ing khaangnuwna, Aafhuw alaar isa ing aangkhenglaang nache nenuwchu imanpir sana,

¹²ynthiing mee aeng phava enchii thenchu iphahaknii khaena ympicheh apa Thangnang chu manpahtaruw.

¹³Apa Thangnang ing inuwchu ynthim ruwreng tanii ikarsaka, aningsiih inche asapa ongnii tingche inuw chukho ymmangongsahpa.

¹⁴Inuw vakhaechu ikarpeehnii vokhehkho isii kuhpeehniichu asapa ningna ym-phapa.

¹⁵Aafhuw chuve imu ynchehmah Thangnang thoh aanghakva. Peeh aangkhenglaang Thangnang ing aseemmah rirae atak i ombasahva.

¹⁶Amachuve thangbaen nakho, laaruw paam nakho ymmucheh, vokheh-kho ymmuchehmah, iruwngpham ongnii changmahka aatuaricheh vokhehkho ruwreng ipirseh aangkheng Aafhuw Thangnang inche aseem chirva; amachupang mahka peeh aangkhenglaang Aafhuw ajaarna anong mandangnii khaena aseempa.

¹⁷Aafhuw chuve aangkhenglaangna maensa ing heom vasahva, chutah-nache akiklina aangkheng omchirna.

¹⁸Atak i ruwrthiing arusaeva, vokhehkho aangkhenglaang kaarna aren pham vika, aren ithiiae kaartanii ihangring Aafhuw chuva.

¹⁹Chukhaenache ataklina isip ing aomnii khaenache

²⁰laaruw paam nakho amanche thangbaen nakho om aangkhengchu khros na ynta asii ajaar inche yngkhehpangnii khaena aanrunii atu inche Thangnang barungriir pennii ynsuwhsa.

²¹Ajae nenuw chuve nenongtu chaap inche nenbarungriirna ijeehnii mee vokhehkho asik meechuw,

²²changvakonchu atiive Aafhuw ithii ajaar inche nenuwchu ynthiingjaeh ing, isamahna thang isimah ing vokhehkho miraar omahdeh ing Aafhuw maanache ipeehnii khaenache aanruniichu atupa;

²³nenuw ing nensii vasah, thangbaen derna om ynseem vasah aangkhengna yntong vasah, Pol ki ing anong katu isa chong nache ningmanden ymmangom tanii ynlaaprudeh ing, abur ineh ing vokhehkho icheep ing anasiir nache omtanuwve, hava vakhae i nenta ynsuwhvaata.

²⁴Atarae nengkhaena ijachaam kakhaang khaene karotha rohna, amanche ruwrthiing ynsuwh Aafhuw hakchaang khaena, kahakchaangna Khrista ijachaam ivaehchu amanchinii ing katuva,

²⁵Thangnang ing kaningna ymmansir inuwzii ing nengkhaena anongtu mee hunginsuwh ingka, Thangnang chongsaechu mapung ipha ing ynthangnii khaenache,

²⁶juk jukna vokhehkho suwnthar aajaeh hungpaarna ithuwhpak ing thuurjaehka omba changvakonchu atiive ynthiing amee ae ningnache amandangpa.

²⁷Chukhaenache Thangnang ing reentaang mee ae kaarna havana ithuwhpak chongsae alaar isa ichu ynchiiva ichiichu mandang ningka achiipa; amachuve nenuw nengkaarna nemanghuw ing nemanden Khrista chuva.

²⁸Chukhaenache kenuw ing mee vakhaechu Khrista ting aanla amangomnii ing, ising iveer inche mee vakhaechu ichahsa ae ungka, vokhehkho manchuw ungka, Aafhuw isa chongchu kemanthangsahva.

²⁹Havi khaene kabarungriir sungna ynthinchu ruwreng manpir ingka, Aafhuw nong inuwzii ing kama taarsa ingka kahentusahva.