Read Moyon Naga 1 THESALONIA 2 Bible Online

1 THESALONIA 2 - Moyon Naga bible

1 THESALONIA 2

¹Kauw kanae ae, kenuw ing neningna ivatheng ungkha, aruwh thangsiimah ichii nenuw ing nemang-huwsa;

²changvakonchu isi vasahna Philipi nache ijachaam vokhehkho ningjak phasa khangnungle, nenuw ing nemanghuwsa amachuve kenuw ing Thangnang tanii thir isachu deen ungka ynrumah mee ompak khangnare nening nache Thangnang isa chongchu kemanthangpa.

³Kenuw ing neningna kenriir i ynraar tanii, ynthiingmah tanii, changmahka ichummah tanii chumahva;

⁴changvakonchu Thangnang ing irupeehka isa chong ymmansir vaang, kenuw ing mee ae barungriir manpennii khaena mahka, kenbarungriir chaang yngen Thangnang chu manpensa ungka ichongpung.

⁵Nenuw ing nemang-huwsa amachuve, kenuw ing ympahsah chong inche vokhehkho kengadiksah inche kentu kenri utaraenkho ynsuwhmah ichiichu Thangnang ing saarkhiina;

⁶amanche kenuw Khrista chongthang yngkheh ing kematik omkhang nare, meening tanii vakhang nakho, ympahchu kenjong mahva.

⁷Changvakonchu amnuw ing asiti rukuum atupeeh vaangkhe, kenuw ing nengkaarna barungriir ynjuursahchu ynsuwhsung.

⁸Nenuwchu kening kemansiihpak ing kemandensahchuw inge, neningna Thangnang isa chong itongpang mahka, kenlaetha rap ikho neningna ipeeh kemanden-sahva, akhaechuve nenuw i kening kemansiihpak ynsuwh sachuw.

⁹Kauw kanae ae, nenuw ing kentu kenri vokhehkho ijachaam kengkhaangcheh nengaansiisa; kenuw ing achuw yngkhehkho peehrik areenniimah ing, siimjaen nong tu ungka, kenuw ing Thangnang isa chong neningna kentongsahpa.

¹⁰Kenuw ing thacha om neningna aajaehmeh ynthiing ing, isa ichum ing vokhehkho isii icher omru ing isisah ung ichii nenuw ingkho amanche Thangnang ingkho saarkhiina;

¹¹Nenuw ing nemanghuw vasah kha-vatah, ampa ing asiti aechu rukuum atupeeh vaangkhe, kenuw ing nenuw vakhaechu kengathohsah vachuw amanche thona kempeehsah vachuw vokhehkho kenriirsahva,

¹²Thangnang ing nenuwchu alipahna vokhehkho alaar isa ivaarna yngeen nache matik icha ing nensinii khaenava.

¹³Chukhaenache kenuw ing anasiir nache Thangnang chu havi khaene kemanpahva. Nenuw ing keningtanii nensii Thangnang chong nenphakha, mee ae tanii chongva ichii mandenruwchuw ing thacha mee vakhae barungriirna Thangnang chongsae inche nong atuva ichii ing nenrikha atatak Thangnang chong chuva.

¹⁴Kauw kanae ae, Judia paamna ong Jesu Khrista na ong ae Thangnang ruwrthiing aethoh aanghaksachuw: Akhaechuve enuw ing Jehudi ae tanii ijachaam emba-daarcheh vaangkhe, nenuw ingkho amathoh ynchim ing nenlipah mee ae tanii ijachaam nenbadaarpa.

¹⁵Jehudi aenche Aafhuw Jesu chu-kho amanche Thangnang jaephar ae chukho enthehpa, kenuwkho ynthurpae amana Thangnang chukho manpenmah dehsae vokhehkho mee vakhaechu areh aphuwting emansipa;

¹⁶havipang mahka reentaang mee ae ningnakho ikarpeehnii chong itongkho parden entupa; havi inge entaklina anasiir nache isii icher ing sipsa; chutah nache entaklina Thangnang barung isiichu akuurchiimnii nache emphapa.

¹⁷Changvakonchu kauw kanae ae, barungriir najaeh mahka, hak-chaangna apha topohpang khaena kenuw re nenuw ynsaesamuw, changvakonchu nenuw thoh yntuwhnii khaena inempak kemandensah thoh ynruw ing yntuwhniichu kensirsahpa.

¹⁸Akhaechuve kenuw ing neningting vanuh vanuh vatheng nungka kenchiisahva, athurfhuwseh ing Pol kiping; changvakonchu kenuw ing vathengva kenchiichu umlae inche parden atupa.

¹⁹Aafhuw Jesu ajuwng-laenche atuwr maanache kenuw ing kemandensah rotharoh changmahka ruungniiva kenchii phurchiichu ynchii vakhang? Nenuw chumah vachuw khang?

²⁰Nenuw chuve kemae pahnii vokhehkho kenrotha rohniichu vachuw.