Read Moyon Naga 1 THESALONIA 4 Bible Online

1 THESALONIA 4 - Moyon Naga bible

1 THESALONIA 4

¹Achiniina, kauw kanae ae, nenuw ing ynsaangkhe paarva nenchiiva vokhehkho Thangnang chu ynsaangkhe manpensava nenchiiva ichiichu kening tanii manghuw chuwka nensinii vaangkhe, nenuw nema itaar ahenthinii sehseh khaena Aafhuw Jesu rumingna kenuw ing kenthamsahnahchuw.

²Aafhuw Jesu ajaarna siniiva nenchii kenriirpeeh chuwkha nemanghuwsa.

³Thangnang ing amanden chuve haviva, nenuw manthiingva nenchiiva vokhehkho naamak tumahva nenchiiva;

⁴nenuw vakhae ing nenrumeechu ynthiing ing vokhehkho ynjasah thoh ynruw ing irinii nemanghuwnii khaena,

⁵Thangnang chu amanghuwmah mee ae vaang, hakchaang ing aadik khaenamah rasiing;

⁶vokhehkho achuw tanga ingkho auw anae taklina havi khaene yngkuh siimah naka amanchaeniimah khaenava, kenuw ing neningna ajaenkhe kemik manveer ungka vokhehkho saarkhii kempeeh vaangkhe, aangkhenglaang havi khaene Ponti aapeeh chuve Aafhuw va.

⁷Thangnang ing ynthiingniimah khaena yngeen mahva, ynthiingnii khaenava.

⁸Chukhaenache achuw yngkheh ing havi arumah tahna mee aechu arumah changchii mahva changvakonchu neningna Thangnang ing ympeeh ynthiing laethachu arumahva.

⁹Changvakonchu unae aechu ning mansiihnii khaena ynziih ikanii omah; akhaechuve yngkheh re yngkheh ningsiih omnii khaenache Thangnang ing nenuwchu ymmanchuwpa;

¹⁰amanche atatak ing Mesidonia paam aangkhengna ong unae ae nening nemansiihchu thangsa. Changvakonchu apirnii sehseh khaenache kengathohsah nahreehchuw.

¹¹Neningna mamaenna kenriir vasah vaangkhe isajaeh ing nenpaarnii khaena mandenruw, nentaksah nongchu nengadiksah ingkhe tusaruw;

¹²amana chembe nenuw ing thachamah mee ae mik barengna isajaeh ing sichehva nenta vokhehkho mee ningnache yndiimahdeh tanuw.

¹³Changvakonchu kauw kanae ae, mee reentaang ae eningmanden omah vaangkhe, nenbarungriirna ajaniimah ing ithii ae khaenache nemanghuwmah idiksamah ung.

¹⁴Akhaechuve Jesu ing thikka vokhehkho ihangringchu inuw ing thacha manuwve, ama vaangche Jesu ajaarna ithii ae chukho Thangnang ing Aafhuw thohche manring vaatae.

¹⁵Havi khaene Aafhuw chongsae ajaar ing keningna ajeer inuwzii ing neningnache kenriirva, amachuve, Aafhuw ijuwng ipha ing iring inuw inche ithii ae taklina maensamah manuw.

¹⁶Akhaechuve aphanache Aafhuw Jesu atakrap thangbaen tanii iruurthoh, aankaangseh vaarmee tanii iruurthoh vokhehkho Thangnang tumpeeh senruwr thoh ynruw ing jungtheng vaata, changlaenche Khrista chu thachaka ithii aenche maensa ing hangring vaatae;

¹⁷aanuwnache iring inuw inche, ithii tanii ihangring ae thohche minvaenna Aafhuw chu yntuwhnii khaena ruwrduh kaarting ijekihak vaata; amanache Aafhuw thohche apha om bakhaena onghakva taruw.

¹⁸Chukhaenache hava chong inge nenuw yngkheh yngkheh barungriir mangamniiruw.