Read Moyon Naga 1 THESALONIA 5 Bible Online

1 THESALONIA 5 - Moyon Naga bible

1 THESALONIA 5

¹Changvakonchu kauw kanae ae, aanii vokhehkho kumtha khaenache neningna kajebaziih tahna ikanii omah.

²Akhaechuve Aafhuw aanii chuve jaenna lamruw itheng vaangkhe tavaata ichii isajaeh ing nemanghuwsa.

³Jinge ichii ing daejaehna vokhehkho isii ikha suwhmahsa ta ae naka enuw ing engongraenche, rupanuw ing asiti abaring phana ina abasen vaangkhe, ynghuw ynghamah imaangnii ijachaamchu entaklinache thengvaata. Changlaenche enuw ing itaen supcheh chehmahnii ae.

⁴Changvakonchu unae ae, lamruw ing itheng vaangkhe aaniichu nentaklina abukniimah ing ynthim nache ongmahruw.

⁵Nenuw nengkheng ireng vokhehkho siim siti chuvachuw. Inuw chuve jaenkho ynthim takho mahvamuw.

⁶Chukhaenache mee ae vaange jaarmah manuw; inuw hangsuw manuwka hahsataruw.

⁷Ijaar aenche jaenna jaarnae amanche juw ynruw mee aenche jaenna baruwnae.

⁸Changvakonchu inuw chuve siim mee ynsuwh vamuw khaka, thacha vokhehkho ningsiih barungphuchu niimanuwka vokhehkho ymmanden manlaenpeeh amachu khumsa manuwka ynriimsataruw.

⁹Thangnang ing abarung siknii khaena ingateer mahva, changvakonchu Aafhuw Jesu Khrista ajaar nache manlaenpeeh ymphanii khaena chenva.

¹⁰Inuw ing ringkhang manuwre changmahka thikkhang manuwre, Khrista thohche inuw ipaarhaknii khaenache ama ing ynthikpeehpa.

¹¹Chukhaenache nenuw ing nentu vaange, yngkheh yngkheh rotha ynroh nuwna vokhehkho hung-ruungnii sehseh khaena ynseemruw.

¹²Unae ae, nengkaarna nong atuae vokhehkho Aafhuw rumingna yncheer ae amanche eechah mee aechu isajaeh ing nemanghuwnii khaena kenriirsahnah,

¹³amanche enongtu khaena iruwpak ing nening mansiih aeruw. Nenuw nenareerna idaejaeh ing ipaarpeehruw.

¹⁴Unae ae, kenuw ing kengathohsah nahchuw, thaachah mee aechu ichah aeruw, barungriir isuur mee aechu rotha imanrohpeehsa aeruw amanche isuur aechu ibompeeh aeruw vokhehkho aangkhenglaang nache ikhaangpeeh saruw.

¹⁵Achuw yngkheh ing yngkheh taklina ynraar nong atudoh tahna huw engaanriniimah ing sirruw, amanche anasiirna nentaksah vokhehkho mee aangkheng khaena isachu ynchiiva ichii jongruw.

¹⁶Apha vakhaena nenrotha manrohruw,

¹⁷ymperudeh inche thamruw,

¹⁸vokhehkho nentu nenri aangkhenglaang khaena heman-pahruw, havi Thangnang ing Jesu Khrista ningna nengkhaena amanden chuva.

¹⁹Ynthiing laethachu thehpak mahruw;

²⁰Thangnang chongjeerchu ikaanii mahva ichii ing rimahruw.

²¹Nong aangkhenglaang ibuwrnuwna isachu bachuw therruw,

²²amanche isamah chaapchu dahruw.

²³Atii idae Thangnang inche nenuwchu imanthiingkiir rasiing; vokhehkho nenlaetha, nenthavae vokhehkho nenghakchaang aang-khengchu Aafhuw Jesu Khrista ing ajuwnglaenche nemiraar aomniimah ing icheer rasiing.

²⁴Nenuwchu yngeen Aafhuw chuve thachafhuwva, ama ing itukho tuvaata.

²⁵Unae ae, kengkhaena itham-peehruw.

²⁶Ynthiing salaam thoh ynruw ing ymbariimruw.

²⁷Aafhuw rumingna havana kachongthen i unae aangkheng ningna ipapeehnii khaena kamansirsah-nachuw.

²⁸Aafhuw Jesu Khrista tungsiih inche nenuwchu eenruwfhuw ynsuwhrasiing.