Read Moyon Naga 2 THESALONIA 1 Bible Online

2 THESALONIA 1 - Moyon Naga bible

2 THESALONIA 1

¹Pol re Silvanus vokhehkho Timothi, kenuw ing Thesalonika na om Thangnang vokhehkho Aafhuw Jesu Khrista ruwrthiing mee ae:

²Apa Thangnang vokhehkho Aafhuw Jesu Khrista tungsiih re idaechu neningna om ynsuwhrasiing.

³Apha vakhaena nengkhaena Thangnang ympahchu kenuw kenong churemva, akhaechuve nenuw nenthacha ivaeh omahdeh ing hung-ruungna, vokhehkho nengkhengna yngkheh ing yngkheh khaena ningsiih om ahenthisa.

⁴Chukhaenache Thang-nang ruwrthiingna nenuw vakhae ing icheepchuw vokhehkho ijachaam chaapna nengkhaangcheh khaena kenuw ing nenuwchu kengaanpahnii vachuw.

⁵Hava vakhae inge amandang chuve Thangnang vajeer i manthiingna vokhehkho nenuw ing ijachaam nenpha khaena hungindang chuve, nenuw ing Thangnang iruwng lipahchu ipha matik nenchanii khaenava.

⁶Thangnang ing ichumchu tuvaata, ama ing nentaklina ijachaam ympeeh mee ae taklinache ijachaam pivaata,

⁷vokhehkho ijachaam nenpha nenuwchu kenuw thohche ija basumnii ama ing ipivaata. Havi Aafhuw Jesu ing thangbaen tanii mi ichuwng thoh ynruw ing ipirpak avaarmee aethoh juwng naka,

⁸Thangnang arumah vokhehkho Aafhuw Jesu isa chongchu amanjiimah mee ae taklinache ijachaam pivaatae.

⁹Enuw ing ichen naemah ing imaang nache ijachaam phavaatae vokhehkho Aafhuw alaar isa nache ong phamahnii ae.

¹⁰Ama ing ajuwnglaenche amee vakhae re atakchu ijasaka athacha mee vakhae tanii ympah phavaata. Nenuwkho akaarnache ynvaeva nenta, akhaechuve nenuw ing kenriir isa chong nenthachapa.

¹¹Ama khaene ataniipha inge kenuw ing apha vakhaena nengkhaena kenthamva, havi inge Thangnang ing yngeen nache matik icha ing iringchu nenphaniiva vokhehkho isa khaena nemanden re thacha nongchu aruwreng nache areer nenbasuwchehnii khae-nava.

¹²Amana chembe Aafhuw Jesu rumingchu nenuw vakhae ningtanii ympah phavaata amanche Thangnang tungsiih re Jesu Khrista ajaarnache nenuw ing aningtanii ympahchu phavanenta.