Read Moyon Naga 2 THESALONIA 2 Bible Online

2 THESALONIA 2 - Moyon Naga bible

2 THESALONIA 2

¹Kauw kanae ae, atii Aafhuw Jesu Khrista juwngvachii iniina yngkongpoh manuwka yntuwhfhuw vaanchii khaenache kenthamsah nahchuw,

²amachuve laetha ing vakhangnare, chong ing vakhangnare, kembaziih ing vakhangnare, Aafhuw aaniichu thengsa ichii khaenache nenbarungriir fhuwm bavaeniimah rasii.

³Achuw tanga ingkho nenuwchu imanchaemah rasiing; akhaechuve yngkheh yngkheh laar yntuk ing maensa vaata, vokhehkho isii icher mee, imaangvasah ichamah inche aandangmahri raentaangche aniichu suwhmahrinii.

⁴Ama mee inche irumfhuw lae chaap chukho rumah naka, ataksah ing aanchung sehping tavaata; amachupang mahka Thangnang eenna ongnaka Thangnang ping tavaata!

⁵Ki ing nenuw thoh kaonglae havi khaena kariirkha nenuw nengaansii-mahva?

⁶Vokhehkho ataksahrap aanii nache aandangnii khaenache, atarae aakhaamchu nenuw ing nemanghuwsa.

⁷Akhaechuve vajeer chonghak amanziimah ingikniipak ingkhe ataraenkho nong atunah, changvakonchu ataraene aakhaam meechu aamphuwng mahri raentaang-che akhaamsah vatah.

⁸Vajeer chonghak amanziimah ichamah meekha yndangvaata, changvakonchu Aafhuw Jesu ing ajuwnglaenche aahuwh inche seemnaka mamaang vaata.

⁹Vajeer chonghak amanziimah thengvachii umlae anong chuve aangkhenglaang ruwreng, ichummah buwtinnii vokhehkho laetho,

¹⁰amanche laethana ymmoh ae khaena ichummah mee manchaenii aangkhengchu ynruwfhuw vaata; enuw ing ikarpeeh phanii vokhehkho ichum ningsiihchu rimahsae,

¹¹vokhehkho ichummahchu thachanii khaena, Thangnang ing entaklina ipirpak ynraar barungriir ajenbathenpa,

¹²chukhaenache ichumchu athachamah ae, ichummah nache nungae nungka enchii vakhaechu vajeer tuvaata.

¹³Kauw kanae ae, nenuw nengkhaena apha vakhaenache Thangnang ympahchu kenongva, Thangnang ing nenuwchu aburna basenka laetha ajaarnache nemanthiingnii khaena vokhehkho ichumchu nenthacha inche ikarpeeh phanii khaena eeteerpa.

¹⁴Havi khaene nenuw ing inuw Aafhuw Jesu Khrista alaar isachu iphanii khaenache, kenuw ing isa chong kemanchuwchuw ajaarnache yngeenpa.

¹⁵Chuvanuwve kauw kanae ae, icheep inche ngiirruw, kenchongsae ing vakhangnare, kenchongthen ing vakhangnare, kemanchuw chuwkha icheep ing bachuw therruw.

¹⁶Atiive inuw Aafhuw Jesu Khrista ataksahrap ing vokhehkho inuw vakhae aning ymmansiih apa Thangnang ing ichen naemah rotharoh re ningmandenchu atungsiih ajaarna ympeeh inche nenbarungriir manpirnii rasiing,

¹⁷vokhehkho isa nong re chongsae vakhae inche imancheepther rasiing.