Read Moyon Naga 1 TIMOTHI 3 Bible Online

1 TIMOTHI 3 - Moyon Naga bible

1 TIMOTHI 3

¹Havana chongjeer i thacharuw, achuw yngkheh ing ruwrthiing sungna aapuh idiknave isa nongtuchu aadikva.

²Chukhaenache ruwrthiing nong atu meechu, isamahna aruming ithangmah, rupanuw yngkhehpang fhuwsar, juw ainmah, abarungriir asuwrcheh, apha amanghuw, mee bariimnii amanghuw, mee amanchuw-cheh,

³juw ynruwmah, meethoh ynnamah, abarungriir iduwr, idae, seerna ikaammah, jinge ichii mee inche tuvachiiva.

⁴Ama a-eengkuw isajaeh ing apuhcheh vokhehkho asiti aeng achongriir amanjii meeva chiiva.

⁵Achuw yngkheh ing a-eengkuw puhchehmah nave, ynsaangkhe Thangnang ruwrthiingchu puhcheh vachiiva?

⁶Chukhaenache barungriir yntehpeh mee ing puhmah rasiing, akhaechuve eentheem athenglae badaar chehmah naka umlae chaangna uvaata.

⁷Chukhaenache athang isa ing isi vokhehkho umlae chaangna umah amanche mee ing aadik mee ing puhva chiiva.

⁸Amavaangche ruwrthiing sungna nongtu Dikan ae chukho isa mee vokhehkho barungriir iseeng meeva chiipae; enuw inche juwna barungriir iruwhmah, vokhehkho seerbaar nakho kaammah vachiipae.

⁹Enuw ing ynthiing ruwthuwh vokhehkho ithuwhpak thachachu bachuwther vachiipae.

¹⁰Amatah nache amaensana enuwchu enjap vaanchiipae, amanache isamahna enruming thangmah nave Dikan nongchu tuaerasii.

¹¹Havi vaange rupanuw ae ing ynriim vachiipae vokhehkho thaechii thaenam tuvachii mahpae, ama changdenna barungriir asuwrcheh vokhehkho aangkhenglaangna thachafhuw om ynsuwhva chiipae.

¹²Dikan ae ing ensiti re engeengkuwchu isajaeh ing puh aesana rupanuw yngkhehpang fhuwsar mee ynsuwh aerasiing.

¹³Akhaechuve ruwrthiing aapuh nong isajaeh ing atu mee ae chuve entaksah khaenakho isa pham emphava, vokhehkho Jesu Khrista ningna thacha taklinache embarungriir chukho ngamvaata.

¹⁴Ki naningting ynlanghak ing ivatheng kamandensahnah;

¹⁵laang-lam vathirdoh ningve Thangnang ynden eengkuw sungnache ynsaang-khe sivaanchiiva ichii nang ing namanghuwnii khaena naningna hava chongthen i kavebaziihva; Thangnang ynden eengkuw chuve iring Thangnang ruwrthiing mangiirnii vokhehkho ichum ingahnii chuva.

¹⁶Chukhaenache Thangnang ing amandenchu ijongnii ruwpakna ichii i achuw ingkho dacheh mahnii: “Aafhuw chu atak ing jungindangsa; Laetha inche ichumva taka amandangpa, vaarmee aengkho emupa; suwnthar siti ae kaarnakho athamin yntongsa, laaruw paam mee aangkheng ing athachapa, vokhehkho alaar isa thohche thangbaen ting ajeripa.”