Read Moyon Naga 1 TIMOTHI 5 Bible Online

1 TIMOTHI 5 - Moyon Naga bible

1 TIMOTHI 5

¹Upachu rukuhmahra changvakon-chu nangpa yngkheh ynsuwhvaang tura, naepang aechu nauw nanae aevaang tura,

²rupanuw upa aechu nangnuw aevaang, rupanuw naepang aechu nasar najuwr aevaang manden nana barungriir ynthiingjaeh ing ithohsa aera.

³Atatak ing muwkhuwnuw aechu ynjasuwh ing bariimsa aera.

⁴Chang-vakonchu muwkhuwnuw inche asiti atuti omnave, amaensana enuw ing entaksah engeensungchu Thangnang emandennii ing tuae sana aanuwna emnuw empa khaena tuae nave, amachuva Thangnang mikna ichuw vokhehkho aru nongchu.

⁵Asiti omahka asanaenpang ing ipaar atatak muwkhuwnuw ama inche Thangnang yndentahna ngiirka, siim jaen aangkhengna ithamsah tahna manpehmah.

⁶Changvakonchu ataksah nungaeniipang atu muwkhuwnuw amachuve aringsen ing ithii vasahva.

⁷Chukhaenache enuwchu enthang asikniimah ing, havana chonghak i eningna riirla.

⁸Achuw yngkheh ing ataksahrap a-eengkuw khaena sirpeeh chehmah nave, thachachu ama ing rumahsa, amanche athachamah mee ae chungna athiseh ing isamahva.

⁹Chukhaenache muwkhuwnuw yngkheh ing kum somruk aphamahri raentaang muwkhuwva ichii rumingna ynvaemah rasiing, ama chungna afhuwsar yngkhehpangna rakhii iniivasah vachiiva;

¹⁰isa nong tutahna mee aeng aruming asuur mee vachiiva; ama ing asiti aechu isajaeh ing ahenjuh, khuwr itheng mee aechu ipeehnii amanghuw, ynthiing mee aechu engkhi achaampeeh, ijachaam mee aechu abom mee, isa nongtu chaapna aanuw jiinaka atucheh, changchii meechu muwkhuwnuwsa ichii ruming ikhiing arusa.

¹¹Changvakonchu naepang ing muwkhuwnuw ae chuve muwkhuw-nuwna manvaemahra, yngkhaena ynchii imbe enuw ensha ing rakhii niinungka enchii emanden inche Khrista ningtanii emae embaheernah.

¹²Amachuve enuw ing amaensa enchongiirchu embakhiitah nache eningna vajeer omna.

¹³Havipang mahka enuw ing eensung eensung ting ruwh aeka apha mamaangnii entunah ae; havi chungna thaechii thaenam chong aeka riirmahva enchii aajaehkho enriirnah, tumahva enchii aajaehkho entunah.

¹⁴Chukhaenache ki ing kaadik chuve naepangpeh muwkhuwnuw aechu rakhii niireeh ae rasiing, siti deen ae rasiing, amanche eensungchu ibuwr ae rasiing, amachu vanave ynrumah mee aeng yntaklina isamah ing chongcheh mahnii ae.

¹⁵Yngkhaena ynchii imbe achuw yngkheh ae chuve umlae aanuw enjiipa.

¹⁶Achuw yngkheh thacha rupanuw ing a-eengkuwna muwkhuwnuw ynvae-nave, ama ing bomrasiing; amanche ruwrthiingchu apeeh manrikmah rasiing, amachuvanve muwkhuwnuw tatak aechu ruwrthiing ing isajaeh ing bomcheh vaata.

¹⁷Achuw yngkheh upa aenche aapuh yngkhehpung ichii ing isa ing nongchu tuae nave, athurfhuw ing isa thamin itongna vokhehkho mee manchuwtahna nong atu aechu aanemseh ing ynjasuwhpham suwhnae.

¹⁸Ynthiing thiimziih ing ajeer chuve, “Gehu namanchanii siir-charchu anerku phuwpmah chakchii,” amavaangche, “Nongtu mee inche aruthamen phava chiiva.”

¹⁹Mee ynnii, mee ynthum saarkhii chumah naka, upa yngkheh taklina miraar empeehchu rungaemahra.

²⁰Mee aengkho engaanchiknii khaena, isii atu diin diin upa aechu mee vakhae maana rukuh aera.

²¹Thangnang re Jesu Khrista vokhehhko ynteer vasah vaarmee ae maana adongchang turudeh ing namanjiinii khaena havana ynjii-fhuw vakhae i kamansirsah nahchii.

²²Achuw yngkheh taklina nakik ithoh rungrung mahra, mee reentaang isii icher nongtuna vaanvae mahra; nataksah manthiingla.

²³Chii pang-kha inmahra, changvakonchu nangve ina diidii vachii khaka naven atumnii inche vomrip chii topohpoh manten chakla.

²⁴Mee areh ae isii chuve entaklina vajeernii aphamah rirae yndangna, amanche areh ing isii entu chuve yntuk ing yndangpehna.

²⁵Amachu vaangche isa nongtuchu yndangna, yndangmah khangnare ynthuurjaeh omah.