Read Moyon Naga 2 TIMOTHI 4 Bible Online

2 TIMOTHI 4 - Moyon Naga bible

2 TIMOTHI 4

¹Iring aere ithii aechu vajeer tuvachii Thangnang re Jesu Khrista vokhehkho jungpaarvachii Iruwng rumingna kamansirsahnahchii.

²Isa chongkha apha om omah naeru ing nong manpir nana mancheep aera, ichah aera vokhehkho ithohsa aera, inehther ing ikhaangthoh ynruw ing manchuw aera.

³Enuw ing ichum ynchuwchu ikhaang chehmahva enchii inii hungom vaata; engadik inuwzii ing entaksah khaena manchuw vachii mee chongchu manjiiva enchii aphachu hungom vaata,

⁴vokhehkho ichum tanii yngheer aenaka abur ichah thamin ting yngheer vaatae.

⁵Chukhaenache nangve aangkhenglaangna nabarungriir suwrteehra, ijachaam badaar, isa thamin itong nongtura, nang ing natu nong nakhe areer basuwra.

⁶Atiive ki kasha ympidehsing; kaangkaenii apha ahenphapa.

⁷Ki ing isapak laarkukchu katukpa, kanongchu kamanchipa, thachachu kangahsahpa.

⁸Atii ichum ynthiing khaena iphafhuw phurchiichu kakhaena ynsiihpeehpa, amachu ichum vajeer itupa Aafhuw inche kaningna ama inii nache ipivaata; havi kakhae napang mahva, Aafhuw ing jungindang vachii aning amansiih mee vakhae khaena khomva.

⁹Kaningting ynlanghak ing ivaknii khaena achehnii vakhae ing tura.

¹⁰Akhaechuve Demas ing ataraennii laaruw paam meepaar i aning amansiih khaenache ibathenka Thesalonika ting sisa; Kreskena ing Galatia ting sisa, Taitas ing Dalmatia ting sisa.

¹¹Luk pangchu kithoh ynruwhaknung. Nang ing Maak kha jongnana veruwra; nongtunii khaena atakkha inempak ikaniiva.

¹²Taikikus chuve Ephisia ting kachiirpa,

¹³Tros na ki ing Karpus ningna kamah isingfhuw peen re kathiimbuwr vakhaekha amanche athurfhuw ing shakoh thuungfhuw kha navathenglae vereenla.

¹⁴Alekjender siir itu mee ingkhe kataklina inempak isamah atupa; ama anongtu inuwzii ing Aafhuw inche aningna ipipham isuwhchu pisavaata.

¹⁵Nangkho ama khaena ynriimla, inuw ing ynjeer chong chaap parden tunii atunah.

¹⁶Havi khaene ahaarpana kaangahsahnii chong kariir raenche achuwkho kaachangfhuw mee omah, changvakonchu enuw vakhae ing kichu ymbathen chirpae, havi entaklina isii ikha suwhmah rasii.

¹⁷Changvakonchu ki ing isa thamin kajeer chaap vakhae i isajaeh ing achinii khaena vokhehkho mee reentaang vakhae aengkho chongjeer vakhae i ensiinii khaena Aafhuw ing kakuurna ingiir peehka ipirnii ruwreng ympeehpa; amanche ki ing ithii phava kachii taniikho yngkarpa.

¹⁸Aafhuw inche isamah nongtu tanii chaap ikarpeeh naka thangbaen iruwng lipah ipha ing eenruwfhuw vaata. Aafhuw ningna ichen naemah ing ympah ynsuwhrasii, Amen.

¹⁹Presila, Akuila, Onesimas ae eengkuw aechu salaam kapeehsahnah ae.

²⁰Erosta ing Korinthia na ongsa, amanche Milita na Trophina nakka kamahpa.

²¹Pharbuw ahungvi mahrirae avathengnii ing atupeehsara. Ubulus, Puden, Linus, Krodija vokhehkho unae chaap aangkhenglaang salaam kapeehsahnah ae,

²²Aafhuw ing nalaetha thoh eenruwfhuw rasiing. Thangnang tungsiihchu nenuw vakhae ningna om ynsuwhrasii.