Read Moyon Naga TAITAS 3 Bible Online

TAITAS 3 - Moyon Naga bible

TAITAS 3

¹Namee ae ing aapuh ae vokhehkho aatuaricheh ae derna ong ae naka, enchongriir emanjiinii ing, isa nong vakhae itunii khaena thoraang atu mee engaansuwhnii inche,

²achuw mee yngkheh ningnakho isamah ing ichongmah, idae ing ipaar, barungriir iduwr, mee vakhaena ynjuursah mandangnii khaena riirpeeh aera.

³Ajaen chembe inuwkho pangmuwka, chongriir ynjiimah, mee ynchae, barungriirna ihungsuwh vokhehkho reentaang aajaeh nungaenii suwh ing ongmuwka, yngkheh re yngkheh yngharmuw.

⁴Changvakonchu inuw Eekar Thangnang ing ynchaarpeeh vokhehkho aningsiihchu jungindangka inuwchu ama ing yngkarpa.

⁵Inuw ing yntu ynri ichum nong inchen mahva, changvakonchu aningsiih inche yngkarva, laetha ynthiing ajaarnache imantharka vokhehkho ynchaamsah inche ithar ringkum ympeehpa.

⁶Eekarpeeh Jesu Khrista ajaarna Thangnang ing ynthiing laethachu ynriimjor ing yntaklina achirpa,

⁷amatah nache atungsiih inche imanchumka inuw ing ichen naemah ringkumchu ningmanden ymmangom khaenache ruw ikuumchu ynsuwhnii khaenava.

⁸Havi ichum chongva. Hava vakhae khaene Thangnang athacha mee ae ing isa nong itutahna embarungriir emanruwhnii inche, nang ing icheepther ing iriirpeehchu kaadiknah. Hava vakhae i isava vokhehkho mee vakhae khaena ikaniiva.

⁹Changvakonchu ipang chong ing ynsang, ajaennii thamin ajong ae, ynnahnii, vajeer chonghak khaena ynnahnii isuwh, hava vakhae i bathenla; akhaechuve hava vakhae ive ikanii omah vokhehkho abariiva.

¹⁰Asiksik suwhnii atu mee aechu vokheh vanii rukuh nana aanuwtingche rimahra.

¹¹Changchii meechu abarungriir ichummahva vokhehkho ataklina isiicher om inche araarchu amandangniisa ichii manghuwra.

¹²Ki ing Aartemas mah khangnare Taikikus naningting kajechiir raenche, Kikopolis ipha ing kaningting ivathengnii khaena imandenpeeh remla, ki amanache pharbuw thana ongva kata ichii kamanreeppa.

¹³Vajeer ihae Zenas re Apolo enuwchu ynchiikho envaehniimah ing barungriir iruwhpak ing vethaksa aera.

¹⁴Vokhehkho inuwtanii mee aenche ikanii omah engaansuwh niimah khaenache, isa nongchu tunana enuw ing nanuchu manjiinii ae rasiing.

¹⁵Kithoh onghak vakhae ingkho nangchu salaam ynvepeehnah ae, amana thacha tahna ening ymmansiih ae chukho salaam piaera. Ningsiih ajaar inche nenuw vakhaechu eenruwfhuwrasii.