Read Moyon Naga HIBREEU 1 Bible Online

HIBREEU 1 - Moyon Naga bible

HIBREEU 1

¹Ajaen chembe Thangnang ing apha vakhaena vokhehkho reentaang aajaeh ing fhuwven ae ningnache jaephar ae enjaarna ichong chakva,

²changvakonchu ihungchipha inii nenchembe ama ing asapa jaarna ynningna chongsa. Ama ajaarnache Thangnang ing laaruw paam seemka, akuurchiim nache peeh aangkheng-laang aningna ynsirnii khaenache aateerpa.

³Thangnang alaar isachu aningna chuwngna vokhehkho Thang-nang pingengche tana, achongsae ruwreng inche laaruw paam apuhsa. Laaruw mee isii vakhae kuhniichu atuchir aanuwnache, thangbaen paam nache aangkaangseh ruwreng Thang-nang achangbaen tachang nache ongsa.

⁴Asapa chu vaarmee ae chungna iruungseh ruming Thangnang ing apeeh vaang, enuw ithi ing iruung-sehchu hunginsuwhsa.

⁵Thangnang ing utaraenkho vaarmee ae achuw yngkheh ningna tamah, “Nang kasapa vachii; ataniine ki nangpa ynsuwhsing.” Vokhehkho Thangnang ing vaarmee khaena riirmah, “Ki ampa chuva kata, vokhehkho atakchu kasapa vaata.”

⁶Thangnang ing aren asapa laaruw paamna jenchiir vachii aphanache ariir, “Thangnang vaarmee vakhae inche atakchu rumvaatae.”

⁷Changvakonchu vaarmee khaena chembe Thangnang ing ariir, “Thangnang ing avaarmee aechu siiraang amanguurpae, amanche ameenae aechu mi ichuwh amanguurpae.”

⁸Asapa khaena chembe Thangnang ing ariir, “O Thangnang, naaruwng paamchu ichuwr naemah ing chitha paarvaata! Namee ae taklinache ichum vajeer ing puhvanata.

⁹Nang ing ichumchu naadiknah amanche ynraarchu nabatirnah. Ama khaenache Thangnang inche nangchu eeteerva vokhehkho ynjasuwhpak ing rotharohchu yngkaanghak ing naarang ae chungna naning nache ympiva.”

¹⁰Ama ingkho ariir, “Aafhuw, nang ing aburna basenka laaruw paam naseemva, amanche nakiksah ing thangbaen naseemva.

¹¹Enuw chuve maangvaatae, nang chuve omjaeh vaanta; enuw vakhae chuve peendiir vaang chiirchir vaatae.

¹²Nang ing enuwchu rungopfhuw vaangkhe thepva natae, vokhehkho peendiir vaang ynteh vaatae. Changvakonchu nang chuve apha om bakhae ynreeh mahchii, vokhehkho naringkumchu utaraenkho chenmah.”

¹³Thangnang ing utaraenkho achuw yngkheh vaarmee ningna tamah, “Katachangne ongla, nang ynjeehnii mee aechu nakhi derna kasiih mahtaang.”

¹⁴Chunuwcha vaarmee aechu ynchiipae? Enuw chuve Thangnang rukuumtu laetha chupae vokhehkho manlaenpeeh phavachii aechu rukuum tupeehnii khaena Thangnang ing ajenchiir chupae.