Read Moyon Naga HIBREEU 10 Bible Online

HIBREEU 10 - Moyon Naga bible

HIBREEU 10

¹Vajeer chonghak chuve hungsuwh vachii isa peeh aruvaam vatah, peeh aruthaksii tatak chumah vakhaka, enuw ing akumsiir aanghakjaeh ing chaatha entu inche aaneeng mee aechu utaraenkho mapung mampha chehmah.

²Thangnang arum mee ae isiicher taniichu manthiingrem naka, athar vokheh kenraar omahsa ichii manden ae nave chaatha ipichu manchen vachiipae.

³Changvakonchu chaatha empisah vakhae inche akumsiir isiicher khaena engaansiiniinah.

⁴Siirchar le keer sii ing isii utaraenkho iri supcheh chehmah.

⁵Amachu khaenache Aafhuw ing laaruw paamna jungthengka ariir, “Aafhuw nang ing chaatha ipeeh re ipeehfhuw ipeehchu idikmahchii, changvakonchu nang ing kakhaena kahakchaang ynsirpeeh pachii.

⁶Thiimkung na apum ing mi nache ynthuka ipeeh vokhehkho isii khaena chaatha ipeeh taklina penmahchii.

⁷Amana ki ing kariir, enruw, thiimbuwr nakhe kakhaena ynziihna, Thangnang, namanden itunii khaenache ki ijuwngping.”

⁸Chaatha ipeeh vokhehkho ipeehfhuw ipeeh, apum ing mi ing ynthuka ipeeh, amanche isii khaena chaatha ipeeh hava vakhae i idikmahchii, vokhehkho penmahchii ichii nariirpa, hava vakhae ichuve vajeer chonghak inuwzii ing ympivatah.

⁹Amana Aafhuw ing ariir, “Aafhuw nang ing namandenchu itunii khaena ki ijuwngping.” Ama ing avomaniiniichu iseemnii khaena amaensachu aripa.

¹⁰Ymmanden inche inuwchu Jesu Khrista hakchaang ing aangkheng khaena ympideh ajaar nache manthiing samuw.

¹¹Jaethiim aenche anasiir isii arichehmah chaatha piaeka nong entu.

¹²Changvakonchu Aafhuw inchembe ichiim omah ing isii kuhnii khaena vokhehpang chaatha ing ympika Thangnang kik tachang nache ongsa,

¹³apha amana ing ataraenphane ajeehnii mee aechu akhibakhong derna asiihmahri raentaangche ahahjaehva.

¹⁴Aafhuw ing ataksah vokhehpang chaatha ing apeeh inche ynthiing aphavasah mee aechu ichen naemah ing mapung amamphapa.

¹⁵Ynthiing laetha ingkho ynningna saarkhii apisa. Amaensana ariir,

¹⁶“Ama inii aanuwtingche ki ing enuw thohche seemva kachii chongiirchu haviva taka Aafhuw ing ariir: Kavajeer chonghakchu embarungriir sungna thinva kata vokhehkho embarungriir sungnache baziih vakata.”

¹⁷Aafhuw ing havi aanuwna ariir, “Ki ing enuw isiicher amanche entu enri enraar nong vakhaechu athar vokheh ynsiipeehmah aening.”

¹⁸Atii hava vakhae i ikuhpeeh om khaenache, isiicher iripeehnii khaena ipeehfhuw omah.

¹⁹Chukhaenache kauw kanae ae, Jesu sii ajaarna ynthiingseh nache thona isa ing ivaruwh ymphapa.

²⁰Laedenpeen ichii Aafhuw hakchaang ajaarna ithar lam, iringnii lam eemongpeehpa,

²¹Thangnang een nache Aanchung Jaethiim yndeenpa.

²²Chukhaenache inuw ing barungriir iseeng vokhehkho thacha thohche, isamah ruwthuwh tanii ynthiing manuwka vokhehkho chii inche iseengjaeh ing ynchaam manuwka Thangnang ineengsa taruw.

²³Inuw ing ningmandenchu ynlaapmahdeh ing ynriirchu icheehpther ing bachuw sataruw, akhaechuve chongreep atu meechu thachafhuw remba.

²⁴Yngkheh ing yngkhehchu ningsiih omnii vokhehkho isa nong tunii khaenache kharsataruw.

²⁵Mee topoh aeng entu nunu vaang, inuw ing yntuwhpoh chakmuwchu bathen samah manuw, changvakonchu yngkheh re yngkheh ynthohsa taruw, nenuw ing Aafhuw aanii junganeengchu nemusa.

²⁶Inuw ing ichumchu ymmanghuw inuwnache ymmanghuw broh ing isii rangmanuwve isii khaena chaatha ipeeh tunii omah.

²⁷Changvakonchu vajeernii khaena vokhehkho Thangnang arumah aechu mamaangchir vachii ipirpak mi ichuwh omchu ihahchu vatah.

²⁸Mosi vajeer chonghak arimah meechu mee ynnii mee ynthum saarkhiina ningchuwh omru ing ithii aphapae.

²⁹Thangnang sapa akhi ing achanii, atakchu amanthiingpeeh chongiir siichu ynthiingmah peehva ichii ing amanden vokhehkho tungsiih laetha ningjak apeeh meechu aajaehmeh athi ing vajeer itu phavachiiva ichii ing nemandenva?

³⁰Inuw ing ymmanghuwsa, “Huw rivachiichu kiping, ki ing ipipham isuwh pivakata taka Aafhuw ing ariir.” Amanche athar vokheh Aafhuw ing amee aechu vajeer tuvaata.

³¹Iring Thangnang kikna ibuwchu ichiisuwh pakva.

³²Nenuwchu ymmanreng aanuwna nenuw ing ijachaam yndaar thoh ipirpak ing yntuwhfhuw chuwka nengkhang mamaennii inii chaapkha ynsiiruw.

³³Apha vokhehna chembe irakuh aeka vokhehkho ijachaam ing nenuwchu kuurva ymbasuw ae, amanche apha vokheh nache ijachaam apha ae thohche sarup nenphahak ynsuwhchuw.

³⁴Nenuw ing kaeshum sungna ong ae thohche ijachaam nenbadaarhakpa, amanche nengkhaena isaseh vokhehkho chiimva chiimah peeh thangbaen nache omna ichii manghuw chuwka, nenpeeh ynsiih aechu rotharoh ing nenru.

³⁵Chukhaenache iruungpak nongmen phava nenchii khaena nenbarung ngamniichu renmahruw.

³⁶Thangnang ing amandenchu nenuw ing tutanuwka chongreepchu nenphanii inche ikhaang pirva nenchiiting bukna.

³⁷Ynthiing thiimziih ing ariirsa, “Apha topoh ompheh naka, jungtheng vachii Aafhuw inche jungtheng vaata; ama jungthirmahnii.”

³⁸Ichum ynthiing aenche thacha jaarna ringvaatae, changvakonchu achuw yngkheh ing aanuw ynrinave, ataklinache ki penmahning.

³⁹Changvakonchu inuw chuve enganuw ynriaeka ymmoh aevaang tamahmuw, ama changdenna thacha muwka ikarpeeh ymphapa.