Read Moyon Naga HIBREEU 11 Bible Online

HIBREEU 11 - Moyon Naga bible

HIBREEU 11

¹Thacha ichii ichuve ningmanden peeh nache ireepva, amanche ymmumah peeh khaenache barungriir ipeeh chuva.

²Yngkhaena ynchii imbe thacha inche tunanii upa aenche entaksah khaena isa saarkhii em-phapa.

³Thangnang chongsae inche laaruw paam aseempa, amatah nache ymmucheh peehchu ymmucheh peeh tanii ing ynseem mahva ichiichu thacha ajaarna ymmanghuwsa.

⁴Thacha inche Abel ing Ken chungna isaseh ing Thangnang ningna chaatha apeeh; ama ajaarnache Thangnang ing akikthuur taklinache saarkhii pika ichum ynthiingva ichii ama ing saarkhii aphapa, amanche athacha ajaar inche ama ing thikkhang nare atanii phane chongna.

⁵Thacha inche Inok ing ithii amumahnii ing atakchu ajeripa, amanche Thangnang ing atakchu ajeri khaena yntuwhmahsa; yngkhaena ynchii imbe atakchu ajerimah rirae Thangnang amanpensa ichii saarkhii aphapa.

⁶Thacha ynvaeru ing Aafhuw manpenchehmah; yngkhaena ynchii imbe Thangnang aaneeng mee ing Thangnang omna vokhehkho Aafhuw ajongsah mee aeng nongmen ipeeh aafhuwva ichii ing thacha vachiipae.

⁷Thacha inche Noah ing amumahri suwhvachii Thangnang ing ariirchu rungaeka, Thangnang achiisahpak ing thacha saka a-eengkuw ikarnii ing ruwkuwngfhuw yngkheh aseem; ama ajaar inche ama ing laaruw paam amanraarpa vokhehkho thacha inuwzii ing ichum ynthiing ruw ikuum Thangnang tanii aphapa.

⁸Thacha inche Abraham ing Thangnang ing a-eentahna iphapham isuwh apham tingche isinii khaena ariirchu amanjjipa, amanche ama ing upha ing siva kachiiva ichii manghuwru inche isi.

⁹Thacha inche ama ing apaammah vaang, chongreep paam nache marpah mee ynsuwhka chongreep amachurap ruw ikuum ynsuwhhak ae Isak vokhehkho Jakop thoh ynruw ing khurpeenthaam nache ongsa.

¹⁰Yngkhaena ynchii imbe ama ing eenphambur om Thangnang ing aseem khuwruung amachu khaenache ahahsahva.

¹¹Thacha inche Sara rap ingkho kumsing aaraen vasah venchinii ruwreng aphapa, yngkhaena ynchii imbe chongreep atupeeh Aafhuw amachu thachafhuwva taka aripa.

¹²Chukhaenache Abraham ing ithii vasah vaang takhangnare, havana mee yngkheh tanii inge minvaen na aesii vaang mee masingna vokhehkho iteennii isamah chifhuw taangna om siihdiih vaang tuti bahsuwm hungomsa.

¹³Enuw vakhae inge Thangnang chongreepchu phamahsae, changvakonchu laarkheh nache musa aeka vokhehkho bariimsa aeka amanche laaruw paamne marpah vokhehkho lamkhii meepung ta aeka thacha inche thiksae.

¹⁴Jinge ichii ing enriir enuw inge empaamsah enjongva ichii ariirniipae.

¹⁵Entak enghungsuwhnii empaamchu manden ae nave, amatingche athar ynriniichu enuw ing phasa vachiipae.

¹⁶Changvakonchu atiichembe enuw ing isaseh eenphambur, ichiichuve thangbaen paamchu emandensahva. Chukhaenache enuw ing Thangnang chu ken Thangnang va enchiitahna iningjaknii omah, akhaechuve ama ing engkhaena khuwruung atupeehpae.

¹⁷Abraham barungriir a-entah nache athacha inche Isak chu chaatha ing apeehpa. amanche chongreep vakhaechu rotharoh ing aphasah ama ing yngkhehpang adeen asapachu chaatha ing apeeh.

¹⁸Thangnang ing ariir, “Isak jaarna chongreep katunah, nang ing tuti bahsuwm deenva nata.”

¹⁹Thangnang ing ithii vasah taniikho ynring achehsa taka Abraham ing amanden; amatah nache Isak chu thikvachii tanii athar aphasahpa.

²⁰Thacha inche hungsuwh vachii om khaena Isak ing Jakop re Iso enuwchu bor apeehpae.

²¹Thacha inche Jakop ing athik phana Josep sapa chaap aechu bor apeehpae; amanche athor nache yndiisaka Thangnang arumsah.

²²Thacha inche Josep ing aringkum ajungchiim phana Isrel siti aeng yngkaeva enchiichu mandensaka, atak aruw khaenache ynchii tuvachiipae ichiichu ariir.

²³Mosi omka thacha inche atakchu amnuw ampa aeng tha ynthum athuursahpae, yngkhaena ynchii imbe amasak isapakchu emupa; amanche enuw ing iruwng chonghakchu chiimahsae.

²⁴Thacha inche Mosi ing ahungruung tahna Pharo asanuw sapa ping ichii rumahsa,

²⁵apha topoh khaena isiicher nache rungaeva kachii changve, Thangnang mee ae thoh ijachaam iphahakchu ama ing aateerpa,

²⁶Ijeep lerchii ipha changchenve Khrista khaena ynrakuh kapha inche iruungpak lerchiiva ichii ing aripa; yngkhaena ynchii imbe ama ing nuwtanii nongmen iphafhuwchu aabuwrpa.

²⁷Thacha inche iruwng barungsiichu chiiru ing Ijeep abathenpa; akhaechuve imu ynchehmah Aafhuw chu ama ing amuvaang amanghuwpa.

²⁸Amaensa ynring aechu amamaang ama mee inche enuwchu aparniimah inche, thacha inche ama ing manlaennii vokhehkho sii ynthikpeehniichu aseempa.

²⁹Thacha inche enuw ing Isen Chifhuw ariknache ikang vaang engaraenpa; Ijeep mee aenche amachu manjiikenta enchiitahna Chifhuw inche enuwchu aruppae.

³⁰Thacha inche Jeriko bangchu inii nisarii enrakuwr aanuwna chimchirsa.

³¹Thacha inche ichuwhmah Rahap ing chong aathak mee aechu idaejaeh ing abariimsah khaena, chongriir ynjiimah ae thohche imaangchu phamahsa.

³²Ki ing havi chungna ynchii riirva kachiiva? Akhaechuve Gidion, Barak, Semson, Jeptha, Devit, Samuel vokhehkho jaephar ae khaena chongva kachii kakhaena apha omah.

³³Enuw inge thacha ajaarna iruwng ipaar lipah vakhaechu achehpae, ichum ynthiing nong entupa, chongreep emphapa, nongsha bae chukho asiingpae,

³⁴mi ichuwh ruwreng athehpae, chem aha yngee tanii iring aphapae, isuur tanii hungpirsae, laartuk nakho enruwreng pirsae, meelipah laarchang aechu enthurpa.

³⁵Rupanuw aenche enthacha jaarna enguw enae aechu ithii tanii iring inche emphapa. Areh aenche athiseh ing isaseh hangring iphanii inche ynthenchu dasa aeka inangniichu emphapa.

³⁶Areh aenche ynniisahna vokhehkho rumor isahna, vokheh ynphuwp empha amanche kaeshum sungna chenkho ong empha.

³⁷Entakchu rung ing adeengpae, ynniimeh isuwh ing atenpae, abatheem-pae, chemfhuw ing athehpae; enuw ing keer re jao avin niiaeka hungsi vasi entu, enuw ing ijachaam pha aeka embadaar vokhehkho enang.

³⁸Enuw engkhaenache laaruw paam i matik chamahsa, paamkangna, bungna, rungkuwna vokhehkho khur sungna hungtaen vataen entupa.

³⁹Enuw enthacha ajaar inche engkheng havi khaene saarkhii phakhang ae nare, enuw ing Thangnang ing chongreep atuchu phamahsae,

⁴⁰yngkhaena ynchii imbe inuw ynvaeru ing mapung iphachu engaansuwhniimah inche, Thangnang ing inuw yngkhaena athiseh ing isachu asirpa.