Read Moyon Naga HIBREEU 13 Bible Online

HIBREEU 13 - Moyon Naga bible

HIBREEU 13

¹Unae ningmansiih omchu ympehmah rasii.

²Lamkhii mee aechu bariimsahnii bahir mahruw. Achuw yngkheh mee ing changche tuka ynghuw ynghamah ing vaarmee aechu abariimsahpae.

³Kaeshum sungna ong mee aechu nenuw thoh aanghak chuwvaang ynden aeruw, ijachaam apha mee aechu nenuwkho hakchaang ipaar vachuw khaka yndenpeeh aeruw.

⁴Rakhiinii ichii i mee aangkheng kaarna ynjasuwh vachiiva, vokhehkho ijaarniichu chohmah vachiiva, changvakonchu naamak vokhehkho reentaang rumee fhuwsar taklina ichuwhmah atu meechu Thangnang ing vajeer tuvaata.

⁵Nenuw seer yndikpak ing omahruw, nendeensah taklinakhe pensaruw. Thangnang ing ariirnah, “Ki ing utaraenkho nangchu mamah ningchii vokhehkho bathenmah ningchii.”

⁶Chukhaenache inuw ing thona isa ing tataruw, “Aafhuw i ki eebom chuva, ki ynchik mahning, achuw inche kaningna ynchii tuchehva chiiva?”

⁷Nenuwchu eepuh ae, neningna Thangnang chongsae ynchongpeeh mee aechu ynden aeruw; amanche enringkum aanlachu kharnuwna enthacha aanuwchu jiiruw.

⁸Jesu chuve ajaennii, atanii vokhehkho ichuwr naemah thoh aanghakjaeh ing omna.

⁹Nenuw asiksik vokhehkho ynghuwmah ynchuwpeeh inche ichum lam tanii ikimah rasii. Barungriirchu Thangnang tungsiih ing ympirther inche isava, isahfhuw thaemin ingmahva, havi inuwzii ing isi mee aenche kaaniimahsae.

¹⁰Inuw ing thiimkung yndeensa amanche chaatha ympichu rumnii-thaam rukuum aatu mee aenche isahchehnii ematik yntanga omah.

¹¹Aanchung Jaethiim inche deenkhaar siichu ynthiingpak apham nache isii kuhnii khaena vechika chaatha api; changvakonchu deenkhaar apum chuve ongnii taangting abathu-nah.

¹²Chukhaenache Jesu ingkho ataksahrap asii ing mee aechu amanthiingnii khaenache khuwruung taangting ijachaam akhaangpa.

¹³Chukhaenache inuw ing ningjak aphachu sarup risa manuwka ongnii taangtingche aningting ma taarsataruw.

¹⁴Havane inuw ing ongjaehnii khuwruung deen mahmuw, changvakonchu thengvachii khuwruungchu inuw ing yngenva.

¹⁵Chukhaenache Aafhuw ajaarna Thangnang ningna apha vakhaena ympahnii chaatha ipeehnii chuve, inuw ynner aanla inche arumingchu manpahsa taruw.

¹⁶Isa nong itu re yngkheh yngkheh ymbom bahir mahruw, yngkhaena ynchii imbe hava hangchii chaatha ipi inge Thangnang ipenva.

¹⁷Nenuw eepuh ae chongriir manjiiruw vokhehkho endernache ongruw; yngkhaena ynchii imbe entu enri khaena akhae pivachii ae vaang, enuw ing barungriir jaarudeh ing rotharoh thohche havi itunii inche nenlaetha khaenache ija akhaangpae; enuw ing rotharoh inche tuae rasii amanche barungriirna ja ae nave entuungsahnii omah.

¹⁸Kengkhaena ithampeehruw, akhaechuve kenuw isa ruwthuwh kendeensa ta ungka kenbarung kemangamsa, akhaechuve apha omba khaena ichumchu tunungka kenchiinah.

¹⁹Neningting ynlanghak ing itheng kaphasahnii inche nenuwchu athurfhuw ing kakhaena ithampeehruw kachiisahva.

²⁰Atii ichen naemah chongiir sii ajaarna Iruungpak Jaocheer inuw Aafhuw Jesu Khrista ithii tanii amanring idae Thangnang inche,

²¹Jesu Khrista ajaarna amik enna apenniichu ynningna nong tusana, amanden isa nong vakhae ituna mapung imanphapeeh rasii, aningnache ichuwr naemah ing ympah ynsuwhrasii. Amen.

²²Kauw kanae ae, ki ing nenuwchu kathamsahnahchuw, havana ynthoh-sah chong i ikhaangpeehruw, ki ing neningna chongsae topohpang inge kabaziihpa.

²³Nenuw ing manghuwruw amachuve unae Timothi ing kaeshum tanii jungsuwhsa, ama ing ynlang ing thengnave, amathoh ynruw ing nenuwchu yntuwhfhuwva kachuw.

²⁴Nenuw eepuh aere Thangnang mee aechu salaam tuaeruw. Itali mee aenche nenuwchu salaam ynjetu-sahnah ae.

²⁵Thangnang tungsiih inche nenuw vakhaechu eenruwfhuw ynsuwhrasii. Amen.