Read Moyon Naga HIBREEU 2 Bible Online

HIBREEU 2 - Moyon Naga bible

HIBREEU 2

¹Chukhaenache inuw ing ynsii ichum changchiichu athiseh ing ringriijaeh vaanchiiva, changmah nave inuwchu ikivaata.

²Afhuw fhuwven ae ningna vaarmee ae ing ichong aechu ichumva ichii yndangna, amanche achuw yngkheh ing amachu ajiimah changmahka amanjiimah inche iphapham ponti aphapae.

³Changchii manlaenpeeh ting barungriir pimah manuwcha, ynsaangkhe ponti taniichu ynjuwhchehva tamuwkhang? Aafhuw ataksah ing havana manlaenpeeh i maen ing amanthangva, amachu aasii mee aenche ichumva ta aeka ynning nache emanreeppa.

⁴Amathoh ynruw ing Thangnang ing eningnache laetho aajaeh vokhehkho ingiknii aajaeh atu ajaar ing saarkhii tuka amanche amanden inuwzii inche ynthiing laetha kikthuur vakhaechu asempa.

⁵Inuw ing ynriir ithar laaruw paam jungtheng vachiichu ipuhnii khaena Thangnang ing vaarmee aechu mansirmah.

⁶Ama changdenna ynthiing thiimziih denkhehna ariirsa, “O Thangnang, nang ing namanden mee havi ynchiiva? Changmahka nang ing rukuum natu mee jaeh vachiiva?

⁷Nang ing apha mongteh khaena vaarmee derna namansiing hakpa; amanche atakchu alaar isa re ynjasuwh phurchii namangkhumpa,

⁸vokhehkho peeh aangkhenglaang taklinache aapuh nabasuwpa.” Amana ariir chuve Thangnang ing mee seemka peeh aangkhenglaang taklina aapuh abasuw; havi inge aangkhenglaang akuwmchirsa. Changvakonchu ataraenbe peeh aangkhenglaang taklina aapuh mee chuve mumahmuw.

⁹Changvakonchu inuw ing ymmu chuve Jesu tahna, atakchu amongteh khaena vaarmee ae derna mansiing hakka amanche Thangnang tungsiih jaarna laaruw mee changden nache ithii apha. Atiive alaar isa vokhehkho ynjasuwh phurchii akhumchu inuw ing ymmusa, yngkhaena ynchii imbe ijachaam ing ithii khaena chenva.

¹⁰Havi inge chaana amachuve Thangnang ing seemka vokhehkho asiihjaeh peeh aangkheng inche, Jesu ing ijachaam apha ajaarnache atak mapung phanaka, ama alaar isachu iphapohnii khaenache siti sanae aajaehchu ahenruwnii khaena chenva.

¹¹Ama ing mee aechu isiicher chaap tanii amanthiingpa, amanche atak vokhehkho ynthiing apha ae thohche empa aanghakjaehsa. Amatahna chemba Jesu ing enuwchu kauw kanaepae ichii ningjaknii omah ing athachu.

¹²Ama ing Thangnang ningna ariir, “Natu nari vakhae chaap unae ae ningna tongva kata; enuw meekong nache nangchu mampah vakachii.”

¹³Ama ing ariir, “Ki kathachachu Thangnang ningna siiva kata.” Ama ing ariir reeh, “Thangnang ing ympeeh naepang ae thohche havane ongnung.”

¹⁴Naepang aechu shabachii re sii tanii vakhaepae khaka, Jesu atakrap enuw thoh aanghakna vokhehkho laaruw mee barungriir kho areen haksae. Havana areen inge atak ithii ajaar inche ithii taklina ruwreng adeen Umlaechu mamaang naka,

¹⁵ithii enchii khaena enring kumpung suwh ing ipaar aechu enruw manjaang vaata.

¹⁶Havane ynthiingkiirna amachuve Aafhuw ing vaarmee aechu abommahva, changvakonchu Aafhuw ing Abraham tuti bahsuwm aechu abomva.

¹⁷Ama khaenache Aafhuw ing mee ae isii chaapchu ikuhpeehnii inche, ama ing Thangnang nongtu tahna thachafhuw vokhehkho ningchuwh ing isip Aanchung Jaethiim aansuwhnii khaenache, atak i auw anae ae thohche aangkhengna aaghakjaeh vachii ting buksa.

¹⁸Atii chembe isii ing abatheem aechu bomcheh vaata, akhaechuve atakrap isii ing batheemka ijachaam apha vasahva.